Ṭhalaite nun siamṭhatna

Matric result a chhuak a, media hrang hrang a luah a ni ber mai. Matric-a a ti ṭha deuhten Science leh Commerce an la a, a bak zawng Arts stream-ah an kal ṭhin. Zirlai hlawhtling an awm ṭeuh a, zirlai fel leh tum nei rana zir chu chhiar tham lek an ni ṭhin. Hmathlir thui tak neih loh vang leh chhungkaw harsatna vanga nih tum ang ni pha ta lo engemaw zat an awm bawk. Heng vang te hian eizawnna tlak hna mumal thawh a har ta. Ṭhalai hna thawh tur nei lo an tamna hmun apiangah sualna a pung a, zu, ruihhlo leh sualna pung zel tihrem hi kohhran leh khawtlang NGO ten hna pui berah kan nei ta hial a nih hi.

Mi ṭha kan tehna value system a nih vang pawh a ni ang, Mizote hi pawn chhuak hnem, kohran leh khawtlanga inhmanna ngah tak, mahni in lum chhuahsan reng mai kan ni. Thil ṭha tak anga lang ni mah se midang tana thil ṭha ti tura rawngbawlna leh pawl hrang hrang avanga pawn kan chhuak hnem lutuk hian kan inchhung a tichhe ve fo ṭhin.

NGO leh Kohhran thilah mahni ina awm hman lo khawpa pawn chhuak kan va tam em! Nu leh pa ni ve si, mahni dinhmun leh nihna hai leh hlen zo lo kan pung tial tial bawk. Hei hian a sual zawngin ṭhalai a ti zalen tulh tulh a, nu leh pa pawisak lohna an nei a, thunun theih loh khawpin an awm ta ṭhin a. A tawpah JAC, YMA leh kohhran hmanga siam ṭhat kan tum leh lawi si ṭhin.

Mahni chhungkua ṭheuh aṭanga khawtlang nun, zirna, kohhran leh ram siamṭhatna hna kan thawh tak tak hunah zirlai fail, hna hmu lo leh nun sual an tlem chauh ang. Hei hi kan Mizo society-in a mamawh em em. Keimahni fate nun siam ṭhat nan chhungkaw awp lum hi Pathian rawngbawlna pui ber a kan neih phawt chuan chhungkaw tin nun a lo ṭha ang a, khawtlang siamṭhatin a awm nghal bawk ang. Revival crusade ngai kher lovin kohhran pawh kan hlim a ni mai.

Lehkha kan zir chhan ber chu eizawn­na tlak sum lalut thei tura hna belh tlak mumal tak neih theih nan a ni. Infiamna, entertainment program, biakin a lam mup mup te kan tui pui viau lai hian, kan thil tuipuite hi kan mamawh ber leh min siam ṭhatu a ni fo lem lo.

Kan ṭhalaite nun leh zirna siamṭhatna hmanraw pawimawh ber chu hnathawk tlaka siam a ni. Eizawnna ṭha nei turin zirna leh nunphung hmasawnna chapter thar kai ila, mi ṭha kan tehna value system pawh thlak ang u. In chhung lum chhuahsan tam lutuk zawnga NGO leh koh­hran hmanga insiam ṭhat tum ila. Zirna, ṭha­lai leh kan ram siam ṭha turin chhung­kuaah bul ṭan ṭheuh ila a va duhawm em!

- Chhungpuia Renthlei