Hlawh tihpun leh sorkar hnathawk
Samagra hnuaia thawk inzawmkhawm pawl, Federation of Mizoram Samagra Employee (FEMSE) chuan tun hnaiah hlawh tihpun an ngiat a, Mizoram sorkarin an beisei anga hma a laksak loh avangin July 7, Ningani aṭang khan badge (pawnthem) dum belin hna an kal hial.
FEMSE thuchhuah aṭanga a lan danin an badge dum bel hian awmzia a neih loh chuan July 11, 2022 aṭangin pisa kai chungin hna an thawk dawn lo a, pen down strike an kalpui dawn bawk.
Samagra hnuaia thawkte thuchhuah aṭanga a lan danin sorkar pawhin thui tak hma a la tawh niin a lang a, cabinet meeting agenda-ah meuh dahsak an nih hnua an hlawh tihpun a ni leh ta lo chu na an ti ni berin a lang.
June 10, 2022-a FEMSE-in inkhawmpui an neih khan, khuallian CM Zoramthanga chuan, Samagra hnuaia thawkte hlawh a pun dawn thu a lo puang daih tawh a, "Hun rei tak chhung hlawh ngai reng in hlawh a, in hlawh hi a pung dawn hrim hrim. In hlawh punna zat tur erawh a la hriat loh. In hlawh a pun theihna atan hian Education Minister a ṭang na hle," a ti a nih kha.
FEMSE leh sorkar lo indawr tawhna thlirin FEMSE lamin an lungawi lohna an lantir hi thil awm tak niin a lang a, chutih rual chuan Mizoram sorkar sum dinhmun, kan ram dinhmun leh an nawrhin a nghawng tur ngaihtuah hian ngaihtuahna seng ṭha leh thei hram se, tih erawh rilruah a lian duh hle.
Vanglaini, July 8, Zirtawpni chhuaka FEMSE thuchhuah ngeia a lan danin pen down strike an neih ngat phei chuan, exam hnai tawh tak naupangte chu a tuartu tur an ni dawn a, hei hi a pawi takzet a ni.
FEMSE hotute pawhin zirlaite hmakhua ngai tak chungin ngaihtuahna seng ṭha thei se, chutih rual chuan Mizoram sorkar pawhin, kan ram sum leh pai dinhmunin a tlin loh hi chu beiseiawm takin thlah zung zung lo ṭhin se, ngaihtuahna fim tak sen nachang hre ṭhin se, hotu lu ber ngat phei chuan tiam tur leh tiam loh tur chin thliar thiam ṭhin se a duhawm hle a ni.
Zirlaite hi kan nghahfak, nakin lawka kan ram enkawltu tur an ni tih hre reng ila, kan duh leh beiseite tihhlawhtlinna atan chuan i tawrh tir lul lo ang u.
- Zoramngaia