ABE MANGṬHA LE...

Nunna hi a hlu a, mihring nunna phei chu a hlu lehzual. Nimin khan Japan Prime Minister hlui Shinzo Abe chu mipui hmaa thu a sawi laiin zing dar 11:30 ah kah a ni a, vawi hnih ngawt a awmah kah a ni, A hliam tuar lovin a hnu darkar 4 ah a thi zui. A kaptu pawh hi man nghal a ni a. He thil thleng hian kar lovah khawvel a fanchhuak nghal a. A kaptu nia sawi an man nghal hi a hming chu Tetsuya Yamagami a ni a, silai siamchawp a lo keng nghe nghe.

A kaptu hian hel pawl pakhat nena inbei an nih thu leh, chu hel pawl leh Abe chu inzawmna an neia a rin thu a sawi a, chumi avanga Abe hi kap ta a ni awm e. Abe-a awmah hian silai mu pahnih hmuh a ni a, a lungah hliam a tuar bawk. Tualchhung mite sawi danin a that tupa hi Japan Maritime Self Defense Force-a awm ṭhin, kum 2005-a chawl ta niin an sawi.

Abe hi Japan Prime Minister ni rei ber a ni a, kum 2006 khan Prime Minister Office a luah ṭan. Kum 2012-2020 chhungin Prime Minister atan thlan nawn leh a ni a, kum 2020 khan hrisellohna avangin a chawlhsan ta a ni. Prime Minister a nih chhungin foreign policy-ah a hlawhtling hle a, chu bakah ram chung ei leh bar (economics) siamṭhatna kawng­ah a thawh hlawk hle. Economics lama a thawh­ṭhat avang hian a economic policy chu 'Abenomics' tiin an vuah hial a ni.

Japan rama US Amba­ssador Rahm Emanuel-a chuan, "Japan hruaitu ropui leh US nena inzawmna siamṭhatu" tiin Abe a uizia a sawi a, British Prime Minister (bang ta) Boris Johnson-a pawhin he thihna hi inbeihna tenawm tiin misual chet dan chu a dem thu a sawi bawk. Chinese Foreign Ministry thupuangtu Zhao Lijian-a pawhin he thil thleng hian a barakhaih takzet thu a sawi.

Japan mi ropui pakhat a liam leh ta. Khawvelin mi ropui pakhat a chan leh ta. Mihring nunna hi heti mai mai hi a ni a. Kan thi thut thut mai zawng a nih hi. Kan hmalam hun kan hriat lohzia hi hre chiang ṭheuh ila chuan tun ai hian kan nun hi kan ulukin kan fimkhur ngei ang. Bible-in kan nunna hi chhum, reilote lo langa ral leh mai ang a tih hi a dikzia a lo lang zel a nih hi.

Keini pawh, engtik hunah emaw chuan he khawvel hi kan la chhuahsan ve thut ang a, chatuan hmunah kan la haw ve thut dawn chu a ni si a.

Abe chuan Japan ram tan thil ropui tak tak, an ram mipuiin an theihnghilh ngai tawh loh tur thil ṭha tam tak a hnutchhiah a, Japan mipui thinlungah a nung reng tawh ang. Keini ve hi le? Khawvel hi chhuahsan ve ta thut ila Mizoram tan hian eng thil ṭha nge kan hnutchhiah ve le? Hmanah khan thlirtu Kaphleia khan, "Kan dam rei leh rei loh te hi kan kum hian a hril ber lo ve, kan nun leh thiltihin a hrilh ber zawk" a lo ti daih tawh a. Ni e, he kan chenna khawvel tan leh kan mihringpuite tan hian eng thil ṭha nge kan hnutchhiah ve tih hi a pawimawh ber fo. Chu chuan mihring damreiah min siam a, kan thih hnuah pawh thu min la sawitir ṭhin zawk a lo ni.

Kan ram tan, kan hnam tan, kan khua leh veng tan thil ṭha pakhat tal hnut­chiah i tum ve ang aw.

Mangṭha le Abe...

- PC Nghaklianmawia