ZAWLNEI NGAIHSAN MAWLH MAI HI

Mizote hian zawl­nei kan ngaisang mah mahin ka hria. Kan thil sawiah zawlnei nia kan hriat thu leh hla hi a tam thin a. 

Tu pawhin (Pastor a ni emaw, Evangelist a ni emaw) hma lam hun hi lo sawi ta se, ‘Chhura um pui mu hriat’ bak a thleng tak tak lo! An sawi dik emaw sawi dik lo emaw a ni mai dawn tho tho a ni. Keini ang mi satliahte pawh hian han sawi ila, dik ve kurh thei a ni tho a, dik lo thei a ni tho bawk. ‘Rin thu’ a ni vek mai. 

Chuvangin in­nghahna tlak leh chaw tak khuka khuk­pui tur pakhat mah a awm lo. Mi zawlnei thupuan hi a sawi pawh sawi chhawn tawh lo a tha ka ti.

Pathian Thu zirmi tam takin ‘prophe­sy’(zawlnei) nihna hi, thil lo thleng tur hrilhlawk (foretelling) zawng chuan, Thlarau thilpek ‘tihban’ tawh zinga tel tawhah an ngai. Thil lo thleng tur hre lawk thei pawh lo awm ta reng reng se engnge an tangkaina? A inpuanna famkim Krista Isuaah kan nei a, 'kan Bible hi a tawk a ni' (sufficiency of scripture) kan pawm bawk si. Dik lo thei a dang khukpui ruai leh sawi chhawn fo emaw hi thil tul lo tak a ni. Isua Kristaa Pathian inpuanna Bible-in a lo record bak hi kan mamawh tawh lem lo a ni.

Hriat lawk ai chuan, Habakuka anga eng pawh lo thleng se Pathian ring tlat nun neih hi Pathian min duh dan zawk a ni. Bible-a inziak bak hmalam hun tur hriat tum lutuk te, hre thei bik deuh anga inngaih emaw, hetiang mi an awm bika hriat tlat hi a him lo fo. Hriat lawk lam ni lovin ‘rinawm tlat’ tur kan nihzia hi Pathian Thuin a uar zawk a ni awm e.

Zawlnei hna kan ngaisang a nih chuan dikna leh felna kalh thil kan khawtlang nuna awm sawi chhuah (forthtelling) te, Pathian leh thiang­hlimna kawng sial te, tuar huama thuneitute do a ngaih pawha do mai te pawh a ni zawk ang. Thuthlung Hlui zawlneite hnaah pawh khan 'sawi lawk'(foretelling) aiin sawisel(forthtelling) a tam zawk fe a ni awm e. 

Kan boruak tawn chhoh mekah hian he hna hi a pawimawh viau dawn pawh a ni zawk mai thei. Hetiang ti thenkhat lah hi kan ngai 'thlarau' leh mang bawk si lo!