THLAMUANG TAKA CHIAI

Curfew vangin ram a buai lo va, ram buai vangin curfew puan a ni zawk ṭhin. He thu hre thiam lo naupang chhiate tan chuan ‘bawn kaw raw’ tia an lailung dawt nen min um haw ṭhintu sipaihote kha an ngeiawm ṭhin a, mi sual ber anga hmuh mai pawh awl tak ṭhin a ni. 

Chutiang deuh chu kan tunlai khawvel dinhmun pawh hi a ni e. Ram hruaitute vangin inah kan tawm ta ṭhup a ni lo va, hri leng vangin kan inkhung a ni zawk a. Kohhran hruaitu tute emaw vangin kan inkhawm a khaihlak ta a ni lo va, hri chhia a len vangin kan inkhawm a khaihlak ta rih a ni zawk e. 

Heti taka min chawk buaitu hi virus a ni a, a hming pum chu Coronavirus a ni a, COVID 19 tiin an ko va; an koh duatna phei zawng a ni hran lo vang. 

He hri chhia hi a tet em avangin mit lawngin tu mahin an hmu thei lo va. Hmuh theih ni sela chuan, keini ang hnam tlawmngai Mizote hi chu min ngam lo khawp ang le. Information centre aṭangin hnatlang turin mipui min han au khawm ang a, kan han pung khawm nghal rup ang a; kan deh puak pawp pawp ang a, kar lohvah an mang phiar mai ang. Mahse, hmuh theih loh hmelma, ramri kana eng lai pawh rawn lut thei (a lo tawm ru khiau tawh pawh a ni thei bawk) a ni zawk si a. 

Hmuh theih loh a nih vang hian thlarau a ni tihna erawh a ni lo va. Thlarau beiha beih chiam a, hnehna puan khum a, lo invilik chiam chiamna tur chi pawh a ni awm lo ve. 

Hri a ni a, hri ṭha lo a ni ve mai a. He hri hian Mizo leh vai a thliar hrang thiam lo va; mi ngo leh mi hang pawh a hre hrang chuang hek lo va; ringtu pawh, ring lo pawh, rin hran neite pawh nise, a vai hma vek ringawt rih chu a nih hi. 

Hetia kan sawi avang hian Pathian hming lam loh kan tihna erawh a ni lo. Pathian hming chu kan lam ngei tur a ni zawk a, kan lam reng bawk a nih hi. Nimahsela, engtin chiah nge Pathian hming chu kan lam ang a, eng lam hawiin nge dilna kan thlen ang, tih erawh chu Pathian thu kan hriat thiam dan leh pawm danah thui tak a innghat a ni. 

Isua huna Judate anga, “Tuin nge thil tisual, he mi hian nge a nu leh a pain?” (Joh 9.2) tia he hri hi sual hnathawha ngaite chuan, he hri leng mek chimawm tak hi, sual hnathawhah an puh ang a. An vau ang a, an hau vak vak ang a, an ankhum chiam pawh a ni ang, sual hnathawhah an ngai a nih miau si chuan. 

Chutih rualin, Isua anga, “Pathian hnathawh a chunga a lanna tur zawk a nih hi” (Joh 6.3) tia he hri hi lo thlirtute erawh chuan Pathian ropuina hmuh tumin harsatna tui fawn mek karah ngei hian thlarau lam mit an lo len thung ang. Pathian hriat loh leh a hmuh lovin eng mah a thleng ngai lo tih hre chiang chungin, an chiai ve a nih pawhin thlamuang takin an chiai ang. 

Lir nghing te, tui lian te leh chhiatna chi hrang hrangte hi chu kan hre fo va, a thlir dan tawk pawh kan thiam viau va. He hri chhia erawh hi chu pandemic a ni miau va le, hetiang taka rapthlak hi keini generation hi chuan kan la tawng ngai bawk lo si va, mi an lo chiai ta viau a nih pawhin a mawh lo ve. 

Engtin ber chuan ngekan awm tak dawn le?

“Ringtu kan nia lawm,” tia he hmuh theih loh, thlarau ni bawk si lo, hri chhia hi lo inhum sek khum mai lovin, luhlul leh ngawhngawlsan hek lovin, Isua ang khan ‘Pathian hnathawh kan chunga a lanna tur a nih zawk hi’ ti then thei ila. Kut sil tur an tih leh fai takin kan sil ang a, mahni in lama inkhung tur nih leh kan inkhung zel mai ang a. Amah pawl tura biak in kan pan a rem rih lo a nih pawhin, amah zawkin min rawn len chilh ve tawh mai a ni ang chu. Hri te chu a leng a, a reh leh mai thin a lawm. I lo chiai ve ta a nih pawhin thlamuang takin aw ni ang.