Hunthar Vengah sorkar a che chak tawk lo

Hunthar Venga lei tlahniam avangin chhungkaw tam takin in leh lo an chân tawh a, an khawngaihthlak hle. Sorkar hi che chak deuh hlek se chuan hetiang zat zat chhungkua hian an tuar lo tur a ni a, a pawi hle a ni.

Hunthar Venga lei chê hi a rei tawh a, kum 2015 pawh khan chhungkaw 10 chuang zet chuan an in leh lo an tlansan tawh a. Kum 2015-a Vanglaini chhuak ka hai chhuahah Disaster Management & Rehabilitation dept chuan helai hmun hi a him lo tih tun hma aṭangin an lo sawi tawh tih tarlan a ni. Chhungkaw tam tak chenna hmun a ni a, mihring an him theih nan leh, chhungkaw tam takin in leh lo an chân loh nan a hma aṭangin hma lak ni tawh ta se chuan tun ang em em hian mihringa a nghawng hi a nasa lo tur a ni.

Kum 2015 pawh khan sorkar chuan hma a la angin a lang a, detailed project report pawh thehluh a ni tawh a, kum khat chuang a liam hnuah, kuminah hma­lakna tak tak chu ṭan a ni dawn chauh angin a lang. Nikum chhungte pawh khan hma han lak belh em em a awm lo a nih hmel. Kumina hma an han lak ṭan tak tak pawh hi chhungkaw tam tak in leh loin a chhiat phah hnuah chauh a ni.

Sorkar hian a tir aṭangin mut mawh hnar mawhah nei tak tak se tun ang em emin chhiatna a thleng lo tur a ni a, chhiatnain sorkar a nawr tho chauh a ni ber mai. A him lo tih DMR dept-in an sawi aṭangin hma la ta se chuan hetiang em em a ni lo ang. Thil kal tawh chu thil kal tawh a ni a, siam ṭhat theih a ni tawh lo. Amaherawhchu sorkar hian tun aia chak zawka hma a lak chhoh zel a ngai. Chhiatna a thlen hma leh mi tam takin an tuar hma hian hma lak ṭhin a ṭha hle.

Tunah pawh hian furpui khaw hnâwm kan thleng chho leh ṭan a, Hunthar Veng kher lo, hmun hrang hrangah chhiatna kan hriat belh leh nual ang. Hmun ṭhenkhat hi chu a tir aṭanga lo ven theih a ni. Chhiatna a thlen hnuah chauh chet tur emaw ti loin, chhiatna thleng tur hi a ven theih a ni tih hre chunga hma kan lak loh chuan chhungkaw tam takin in leh lo an chân leh dawn a ni.

- Lalkhaw-ngaihthanga