Mitin ban phak damdawi man tlawm

Tunlai hian mi nawlpuiin kan buaipui lem loh, damdawi lam kaihhnawih mite, chanchinbumi leh khawtlang tana ṭhahnemngaiten an buaipui em em a awm a, chu chu doctor-te damdawi chawh dan tur chungchangah central sawrkar kal tlanga Medical Council of India thuchhuah hi a ni.

Kan hriat angin India ram chuan Prime Minister huaisen leh thil siam ṭhat duh mi, Narendra Modi kan nei a, India ram hmasawnna kawngah hruaitu dangte tih ngaih loh thil tam tak a ti tawh a, tunah pawh ama hmalakna zulzuiin ram puma medical doctor-te enkawltu Medical Council of India (MCI)-in ni 21, April, 2017-a a thupekah chuan doctor-ten damlo damdawi an chawhin brand name-a ziak lo tur leh generic name-a ziak a, a theih phei chuan hawrawppuia ziak turin a ti a, he thupek zawm lo chu hrem theih an ni dawn niin a tarlang. April ni 17, 2017 khan Surat khua Gujarat-ah a PM in charity hospital a hawnna a a thusawi hnu lawkah he thuchhuah hi siam a ni a, kum 2016-a MCI in hriattirna a lo chhuah tawh, clause 1.5 of the Indian Medical Council (Professional Conduct, Etiquette and Ethics) Regulations, 2002 siamṭhatna (amendment) in a tarlan, doctor-in damdawi brand ni lovin generic hmingin damdawi a chawh tur a ni tih na zawka kalpui tumna a ni ngei ang.

Enge generic & branded drug chu?

Damdawi thar hmuhchhuah hi hna hautak tak mai, sum tam tak leh hun rei tak (kum 10 chuangte a ni thei) ngai, mithiamte thiamna sang tak tak hman ngaihna a ni a. Hetianga mi in insengso char chara kum tam tak research an lo tih hram hramna man hi an tel theihna atan sawrkarin damdawi thar hmuchhuaktu hnenah neitu nihna ‘patented rights’ a pe ṭhin a. Hei hi kum 20 chhung atan a ni ṭhin. Hemi chhung hian midangin kha damdawi kha an siam chhuak ve thiang lova, an thawhrim man telin sum an lalut ve thung ṭhin. Hetianga damdawi hmuchhuaktuin an damdawi hralh chhuahna atan hian mi nawlpui hriat nuam leh awlsam zawk hming an vuah a, anmahni company ta bil liau liau, an damdawi brand chu ‘branded drugs’ emaw ‘innovators product’ emaw tiin an sawi ṭhin.

Kum 20 a lo ral erawh chuan chu an neitu nihna (patented rights & exclusivity) chu a lo tawp ta a, a damdawi siamchhuaktu pawhin a damdawi hming tak zawk (Pharmaceutical Salt Name)-in an tichhuak ve ta a. Chu damdawi chu company dang pawhin entawnin harsa taka miin a hmuchhuah damdawi ang chiah kha an lo siam ve thei tawh ṭhin a ni. Hetianga branded drugs-te neitu bik nihna a lo tawp a, company dangin an lo siam ve theih kha generic drugs an tih chu a ni. Chu generic drug chu company dang dangin lo siamin, mahni company siam kha hralh chhuah atan sumdawnna hming (brand name/ trade name) an pe ve leh ta ṭheuh a, damdawi generic pakhat pawhin brand name chi hrang hrang a lo nei phah ta ṭhin a ni. Paracetamol (generic name) pawh a siamtu company a zirin Dolo 650, Calpol 650, Dolopar 650, Paracip 650, Parasan 650, etc a lo awm ta nual a, a vai hian a damdawi tak chu Paracetamol 650mg vek a ni. Hetiang zel hian damdawi generic hrang hrang chu brand name inang lo tak takin a lo chhuak ta a ni. Damdawi brand a zirin damdawi inang reng pawh ṭhenkhat tlawm tak tak a awm laiin man to tak tak pawh a awm.

Company tam takin damdawi hming tak generic hming puttirin an siam bawk a, chutiang damdawite phei chu a man a tlawm lehzual a, branded drug nena a man inthlauhna hi a let sawm chuangte a ni ṭhin a ni. Ram chhung mipui, a tam zawk rethei tak takte tan Generic Drug Store/ Jan Aushadhi Yojana, damdawi man tlawm zawrhna mai duh tawk lovin MCI pawhin hetiang thupek hi a chhuah ta niin a lang.

Damdawi siamtu company chuan anmahni siam damdawi brand ṭheuh chu a tam thei ang ber hralh chhuah an duh a. A hralh chhuah lam an buaipui loh pawhin damdawi hralh chhuah buaipuitu (marketing company/ stockist/ wholesaler)-te nen inthurualin hna an thawk ṭhin a ni. Mahni damdawi ṭheuh chu chak taka nawr kal an tum a, an aiawha thawkchhuaktu medical/ sales representatives ten anmahni ruaitute damdawi ṭheuh kha damdawi chawhtu doctor-te hnenah fakmawi siakin, doctor-ten damlo hnenah a tam thei ang ber an brand/ hming an chawh theihna turin theihtawp an chhuah ṭhin.

Generic drug chu engnge a ṭhatna?

Dan ang thlapa siam a nih chuan damdawi pakhat generic drug leh brand name drug hrang hrang chu a inang reng a, a hnathawh dan, a hmanna, a ei dan tur, a ei hun chhung leh thildangah a inang (bioequivalent) a ni, a danglamna chu a man a tlawm em em hi a ni. Generic drug hman a nih chuan damdawi mana sang chuang fe kan senna ṭhinah khan damlo natna a zirin cheng zanga pawh tling mang lovin kan in enkawl dam ve thei tho dawn tihna a nih chu. Damdawi chi hrang daih brand name inang deuh deuh a awm ve thei a, hei vang hian damdawi dik lo hman palh theih a ni a, thil duhawm lo zawk a thlen thei a ni.

Entirna'n mut tichhuak thei leh ruihna atana mi ṭhenkhatin an hman sual alprazolam te nena chhungkaw khat, kaih, inzai hma a hnim hlum damdawi zing ami leh thil dang danga hman Midazolam injection chu Medzol brand-in a awm a, Medzol brand name tho hian pumpui a acid insiam nasa lutuk tur vengtu pantoprazole injection pawh midang siam a awm bawk.

Heng damdawite hi a generic en chiang lovin miin lo hmang ta se, damlovah nghawng duhawm lo ber a thlen thei. Damdawi brand tam tak hi damdawi pakhat aia tam inpawlh sa a awm a, damlovin ṭul vak lovah damdawi chi hrang hrang a ei phah thei. Thil buaithlak deuh chu ‘damdawi vâng’ hi a ni. Damdawi tam zawk a vâng kan tih ṭhin nachhan erawh brand name drug kher kan zawn ṭhin vang a ni. Kan damdawi duh ang hming kher kha kan hmuh loh avangin kan buai phah fo. Khawilo chhuahnaah chaw fun kan han fak dawn a, ka nau pakhat chuan thianghlim tak thova kan chi pai chu ei duh lovin, kan choka a chibur ami kher kha va lak tum ngat ngat ta sela chutiang deuh chu a ni, Tata iodine chi theuh theuh a al dan in ang reng dawn si a.

India ramah hian sawrkar hriatpui damdawi siamtu industry hi sing hnih chuang a awm mek a, generic a damdawi ziah chungchangah hemite damdawi siam zawng zawng hi uluk taka enkawl leh vil a nih leh nih loh hian nghawng nasa tak a nei thei dawn a ni. An damdawi siamchhuahte chuan a nih dan tur (standard) sawrkarin a bithliah hrang hrangte a hlen zo em tih endik a pawimawh hle. United States FDA chuan generic damdawi chu a thianghlimna, a chakna, a nihna hrang hrang uluk taka enfiah vek hnuah chauh hman tur a ni a ti a, a siam dan a pack dan leh a enchhinna zawng zawngte chu sawrkarin a pawm a ni ngei tur a ni a ti bawk. Anni ang hian kan kal thei ang em? India ram hi USA-ah generic drug supplier lian ber pawl kan ni mek a, uluk taka sawrkarin ruahmanna a siam chuan thil theih a ni ngei ang. Hemi bakah hian doctor-in damdawi chu a hming tak (generic name) in lo ziak ta reng pawh ni se, damdawi zuartu lamin damdawi company rin ngam harsa leh hlep ṭhatna tur ringawt ngaihtuahin an lo hralh chur chur ang tih a hlauhawm a, hei pawh hi ruahmanna leh dan mumal tak a awm chuan pumpelh harsa lo tak a ni.

Engtin nge kan lo dawnsawn ang?

Mizote hi a tam zawk mirethei kan ni a, sawrkar ṭanpuina mamawh leh thlahlel tak tak awm khawm kan ni. Hemi avang ringawt pawh hian mirethei leh harsa zawkten damdawi man tlawma an lei theihna tura central sawrkar hmalakna hi thlawp tur kan ni. He hmalakna avang hian ram pum hmun hrang hranga damdawi siamna lama thawktu ṭhenkhat chuan an tuar dawn a, Mizoramin damdawi mana kan sum tam tak state danga kal erawh a tlem phah thung dawn a ni.

Mi ṭhenkhat, Mizoram hi damdawi ṭha lo thehthangna hmunpui (dumping ground) ti a ngaihdan nei an awm. A chhan chu damdawi company an rawn lut nasa a, heng damdawite endik tur hian Mizoram sawrkar hian ama bilin damdawi ṭha leh ṭha lo endikna (Drug Testing laboratory) a la nei bawk si lo a ni.

Mipuite man tlawm zawka kan inenkawl theih phahna a nih chuan a ṭha a, sawrkar duhthusam pawh a nih ngei a rinawm. Kan doctor-te pawh hian central lama an hotute hmalakna hi an thlawp ve ngei a rinawm a, dan kenkawh ṭhat erawh a ngai viau ang. Mizo mipui hi tlemte chauh kan ni a, kan mamawh damdawi ṭha chauh lak luh pawh a harsa lo ang. Kan FDA lamin generic drug lo lut tur reng reng uluk takin a siamtu company lo endik se. Hemi atan hian kan sawrkar hian Food & Drugs Administration leh hmun hrang hranga damdawi enkawltu pharmacist-te tha tichakin, generic drug prescription hi chu kalpui bawk se a lawmawm khawp ang.

Khawvela ram hausa ber USA mipui damdawi hman zaa 88% chu damdawi man tlawm generic drug a ni. Keini ram, India-ah pawh state rethei ber zing ami hian he thupek hi kan kal tlangpui thei a nih chuan khawvela hriselna ngaihtuahtu pawl lian ber, World Health Organisation thil tum lian ber pakhat damdawi reng reng a dik thei ang ber leh ‘a tlawm’ thei ang bera hman tur (rational drug use) a tih hi Mizoram hian state dang leh ramdangte entawn tlak khawpin kan kalpui thei dawn a ni. Damdawi chungchangah hriat fiah duh i neih chuan Drug Information Centre, RIPANS hi rawn hmang ṭangkai ve ṭhin ang che: email-dicripans@gmail.com, sms-8730955168

- Dr. C. Zothanmawia, Pharm.D. Drug Information Centre, RIPANS