Dawrkaite hian an dinhmun an hria em?

Tlem lai khan dawrkai hote hnena thuchah ka ziak a. Kha kha mi engemaw zatin an lo chhiar a, ‘comment’ an pe a; mi ṭhenkhatin an hlawkpui thu min hrilh. Dawrkaite ngei pawhin ṭha an tih thu min hrilh bawk. Kha article chhiartute zingah khan awm ngaihna hre lo, kal ngaihna pawh hre lo, dawrkai ṭhenkhatin an lo cheksawlh deuh an awm a.

Chung zinga mi pakhat chuan hetiang hian message min thawn a, “Ka pu, dawrkaite (a bikin thawmhnaw zuar) hnen aṭanga thil kan lei hian pawisa faia kir leh an phal ngai lova,”. Ka chhanna chu, “A ni maw! a va pawi ve, ka sawi duh chu... thil lei dawnin i thil lei tur chu uluk leh fimkhur takin i en chik hmasa tur a ni a. Cash memo hi dil hreh miah loh tur a ni bawk. Dawrkai nu emaw pa emaw hnenah chuan i thil lei chu a ṭhat loh chuan i thleng leh tur thu hrilh ang che. Consumer Protection Act hi thil leitute inhumhimna a ni, thil lei tawh hnu thleng theih loh tih hi khawi dawrah mah a awm lo. Mahse, huaisen a ngai,” tiin.

Dawrkaiho zingah hawih­hawm tak tak an awm a, dawr pawh an nuam a, malsawmna pawh an dawng nge ngein ka hria. Dawrkai leh sumdawng zingah hawihhawm lo tak tak, chapo tak, hlep duh hrim hrima dawr hawng an tam hle. Hengho hian an dawrkai puite hmel an tihem ṭhin. Heng ang mi dawrkai nelawm lo takte hi hausa tlak pawh an ni lovin ka hria. Anni ang ho hi chu ram pawhin a thlahlel lo, mipui tana tuarna thlentu mai chauh an ni. Midangte tana malsawmna an ni ngai hauh lovang.

Mi chi hrang hrang kan awm a, keimahni zawn ṭheuhah ram tan kan rilru kan seng a. Ram tan kan bei mek a ni. Kei ve tehlul pawh hi mipui chanvo ka vei avangin consumer right champion duhna lian tak ka nei a. Chuvangin, ṭhangkhat lian zet chu helamah hian ngaihtuahna ka hmang ta. Ka thu leh hla chanchinbua lo chhuakte chu mi chi hrang hrangin an lo tuipui thu min hrilh a. Engtikah emaw chuan consumer te tan kawl a lo en ve ngei ka beisei.

Hmanni lawk pawh khan officer lian tak pension-a kal ta, tuna sawrkar office pawimawh tak luah zuitu nu pakhat chuan a office a ka len ṭumin chanchinbua ka thuziak a lo chhiar ṭhin thu leh consumer te chanvo a veizia min hrilh a. Ka lo hmuh ṭhin dan nen a inpersan! Consumer-te harsatna a lo vei ve ṭhinzia a sawi khan min tiphur a, nasa takin min tichak a ni.

ATI-ah hian Consumer Protection lam sawi tir ka ni ve ṭhin a. Pi Manuni ten min lo la hre rengte kha ka lawm hle a ni. Tlawmngai pawl hrang hrang, MUP leh MHIP etc. hruaitute an lokal a, Consumer Forum chanchin te, Consumer Affairs te kan inhrilh a. Kei pa berh te hi meeting zawh hnuah thla min lak pui a, a nuam ve viau.

Consumer Right Aware­ness hi pawl leh office ṭhen­khat hmaah ka sawi ṭhin a. Ṭhenkhat chuan sum an neih loh avangin min lo sawm hreh deuh a. Kei chuan hlawh neih kher a ngai lo ve, a thlawnin ka rawn sawi ang, ka ti ve mai ṭhin bawk a. Ka dam a, hunin min dal loh chuan heng Consumer Gospel te hi chu englai pawhin tlangaupui turin ka inpeih a ni tih ka sawi ṭhin.

Nia, dawrkaiho chungthu kan sawi ṭhin a, kan sawite hi ṭhahnemngaihna thil vek a ni. Consumer te pawh hawihhawm a ṭul. Mi dawra kal a, rak bawrh bawrh ringawt ṭhin te, an thawmhnaw leh bungruate chin leh chiam te, hawihhawm taka dawr ta lova, tlawm dil leh ringawt te hi mawlna chi khat a ni. Dawr thil pawh nise, ṭhat leh ṭhatnaa inlawm tawn tur kan ni e. Tute mah hi mahnia ding chhuak thei kan awm si lo a.

- Lallunghnema, Charity Lodge