Ruihhlo zuarte halral tel an ngai!
Kum liam ta leh kumin chhung ringawt pawha ruihhlo tam tham tak tak mana halral a nih thu local TV channel-ah leh chanchinbu hrang hrangah thlalak nen tarlan a ni ṭhin a. Heng hi a hralhna man tur zat nen chhut chhuah a ni nghal zel a, sum tam tak man hu an halral ṭhin a ni. Hemi kawnga hma latu kan tlawmngai pawl leh police te an fakawm ṭhin hle mai.
Chutih ruala ngaihtuahna a lo lang ve ṭhin chu an man chhuah lem loh hi eng zata tam nge ni ang le tih hi a ni? Chanchinbua an tarlan ṭhin kan mithiamte chhut danin kumin hian ruihhlo leh a kaihhnawih hi a hluar zual niin a sawi a, dik pawh a dik ngeiin a rinawm. Hetianga tam ruihhlo man tur a awm reng theih chhan hi thuneitute hian nasa leh zualin chhui sela a chhan an hriat theih ngei a rinawm.
Ruihhlo zuartu an man tam zawk hi a zuar ngai leh ngaia te bawk an ni tih thuneitute hnen aṭanga thu dawn a ni a, eng tin nge a zuar ngai bawkte hian an zawrh nawn leh ngam fova, thuneitute hian eng hremna dan nge an pek ṭhin? Ruihhlo zuar hremna dan hian awmzia a nei thui miah lo a nih chuan awmze nei thei tur khawp dan siam a ngai tihna a ni ang. Chuti a nih lova ruihhlo zuarten reilo te chhunga man leh pawisa tlemte chawia ruihhlo an zuar leh zel thei a nih chuan ruihhlo zawrh hi an tan sumdawnna hlawk tak a ni reng dawn a, sim a har khawp ang le. Mihring nunna suattu an ni reng dawn tihna a ni.
Hetianga nih chuan thi leh thau pawlha ruihhlo dotute hna thawh hian awmzia a nei thui lo hle tihna a ni. Ualau taka ruihhlo tam tham tak mana halral reng ringawt hian hmasawnna min thlen thui dawn lo.
Ram ṭhenkhatah chuan ruihhlo zuar an mante hi an zawrh nawn leh ngam tawh lohna khawp hremna dan an siam a, chuti chung chunga zuar lui te chuan an lu zawrh tel pawh an pawiti lo tihna a ni. Kan ramah hian kan hremna dan siam hi a khauh tawk lo em ni? nge pawisa tlemtea lei mai theih em ni zawk? nge dan h kan lekkawh zo lo zawk?
Hetianga harsa lo taka ruihhloa an sumdawn reng theih chhung chuan kan ṭhalai tam tak kum naupangtein an thi zel dawn a ni. Ruihhlo zuarte mante hi hremna na zawk kan pek loh chuan ram leh hnam tana ruihhlo do pawlte thawhrimna hi a lo thlawn mai a ni dawn e.
Roreltute leh dan kengkawhtute hian kan ram hi ruihhlo laka chhanhim an duh tak tak chuan tuna kan hman mek ruihhlo zuarte hremna dan hi an siam ṭha tur a ni ang. Chutiang ti ngam hruaitu chu kan mamawh ta viau e.
- V.Lalrindika, Mission veng Aizawl