An tling dawn chuang lo...

Politics hi sawi loh theih a ni lo a; Pathian thu kan awihna rah lanchhuahna pawh ram rorlena politics-ah hian a ni. Zawlnei tam tak rawngbawlna pawh kha, ram leh hnam enkawtu, sorkar roreltute tih dik loh siam ṭhat leh sawisel etc a ni. Kristian kan nihna lanchhuahna tur langsar ber pakhat pawh kan ram rorelna khawlah hian Pathian thu kan awih em tih hi a ni.

Mizoram politics a kan buaina langsar ber chu, kum 40 chuang sorkarna lo siam tawh party mi leh sa ni lote chunga rinna kan nghat ngam lo hi a ni. Ram leh hnam siam ṭhat duh, mi ṭha tak tak leh mi dik takte pawhin ke pen tumin politics an luh chilh a. Mipuite rilru an tehna aṭangin party lian sa, ngelnghet zawk leh hlun zawk an bel zel a. Mahse chu mi rah chhuah chu - tuna kan din hmun hi a ni.

Party te zawk, independent leh hmel thar hmanga ram siam ṭhat tura politics khelh tum chu kan ngam lo a. Mipui pawhin 'an tling dawn chuang lo' tih rilru an pu tlat. Party lian leh hlun kan sawisel lo; ram hruaitu hlun, mi ṭha leh rintlakte kan sawisel lo. Heti chen Mizoram an enkawl mekah hian kan lungawi tlat si lo hi a ni.

Ram leh hnam hmangaih tak taktu ṭhangthar lungfing zawkte hian thlak danglam kan duh tawh a ni. Khawii party a mi pawh, mi tha leh dik hi chu kan ram rorelna fawng chelh tur hian kan thlang tling zel duh.

An tlin kan rin zawh loh vang ringawtin mi tha tak takte kan hnawl a; party lian mi leh sa, ṭha kan tih loh te bawk kan thlang tling leh a. Chuvangin mipuite hian eng party mi leh sa pawh, independent-a ding te pawh, mi ṭha chu vote ngam turin i huaisen ang u.

Aam Aadmi Party te pawh kum 2012, November thlaah a ding chauh a, mipuite'n huaisen taka thlawpin vawiin­ah chuan India rama Cheif Minister ṭha ber pawl chu Delhi khuan an nei. Danglamna siam turin i huaisen ang u. Ram siam ṭha tur ni lo, party mi leh sa thlan tlin ngei ngei duh mi tam tak kan la awm a. Chung mi pahnih chu vawiinah hian kan insual mek a ni.

Ram leh hnam hmangaihna politics a ram siam ṭhat tumin ṭan an la a. Chumite chuan hnehna an chan hun hunah Mizoram hian hmel thar a hmu ang.

Mahni inhaivura politics hi tihbo a hun. Party politics ringawt hi chu a hlawhchham chiang lutuk. Kan ram leh hnam tan nang leh kei hian huai­sen takin mi dik leh ṭha, ram leh hnam hma­ngaihtute kuta kan ram rorlena hi a awm theihna turin i dang­lam ngam teh ang.

- Rinfela Zadeng