KHAWPUI FAINA LEH INRALRINNA DAR

Covid-19 buaia kan buai mek lai hian inral rinna tur kawng dang i aupui ve ṭan ang aw. Aizawl khawpui, kawng tinrenga hmasawn mek hi hmuh ava nuam em! Kan insak ten hma an sawn a, a nghet ṭha chauh ni lo, a mawi tur zawngte pawh kan zawng ta hle mai. Architect rawih kan intihhmuh ta te hi hmasawnna ropui a tling. He lam kawnga hma latu kan AMC te pawh an fakawm e. 

Kawngpui kam leh hmun kilkhawr deuh a mi pawh, mi mal dawr leh company te an chang kang ta em em mai a. An mawiin mit an tihahdam. An thil zawrh kan lei dawn leh dawn loh hriata hmaa coffee min lo offer nghal maite hian ram changkang awh an tibang. 

Dawr leh office vawn fai leh thianghlim hi hri leng dona atan pawh kan hmalakna tur chi khat chu a ni hrim hrim mai. Kan office te hi zahawm takin vawng theuh ila, hna pawh a sawt zual ngei ang. 

Fur kan la thleng rih lo bawk a, kan kawngte pawh an mamin an dum tha hlawm hle mai. Veng tin a ni vek nge vek lo erawh ka sawi thei lo. Kan sawrkar hian an thawk tha viauin a lang e. Kawng pawp an thawl nghauh nghauh mai te hi ava lawmawm em! 

Fur hmaa kawng pawpte hi an thawl vek chuan fur tuar a huphurhawm lo sawt dawn a ni. Hetih rual hian tui luan kawrte tihfai hna hi ngawrh taka an thawh a pawimawh. Khawpui chhunga kan lei min leh lei tla hniam tam ber hi a chhunga tui luh vang a ni. 

Ṭhal ruah sur, ruah baw hawk, a lo thleng leh hnai tawh mai thei a, pawn lamah kan fai viau emaw kan tih lai a, kan bawlhhlawh thuhrukte motor kawng dang ping khawpa min phawrh chhuahsak leh loh nan kan lui kawrte tihfai hna pawh hi ngaihthah chi a ni hauh lo mai. Khawlai bawlhhlawh kawra hnawl liam mai a reh thei rih si lo. 

Kan khawpuiin kawng tin renga hma a sawn viau lai hian a phiat faitu department lam hian tan an lak a ngai deuhvin a lang. Ram dang khawpui an fai kan tihna chhan hi eng dang a ni lo. 

Pakhatnaah chuan mipui mi mirin faina an ngaisang a, khawlai tibawlhhlawh turin mei zial bung, kuhva hnah pawhthler leh sweet leh thil eina kawrte an paih ve mai mai lo. Hmanlai aṭanga an khawpui khawlai fai leh thianghlim taka lo vawng thin tawhte hian vawiin thlengin mipui zirtirna kawngah tha an thlah chuang lo. 

A pahnihnaah chuan ram changkangah chuan khawlai phiah fai hna hi zingkar hna mai ni lovin nileng hna a ni ve a. An hun hman tur bi tukin zan lama hnahthel tla chauh phiat lovin chhuna tla pawh an phiat zel a, chu chuan an khawlai a vawng fai reng a ni. Ṭhenkhat chuan chhun laia khawlai phiat nih an zak a ni mai thei e. Zak lova phiat tur tam tak an awm ka ring. 

Department tana thil enfiah ngai ka tih em em chu Aizawl khawpui chhung han kal kuala chawlhni leh sawrkar office chawlh nia hmun ṭhenkhat a binga phiah loh lai lo awm ṭhin hi a ni. Hmun phiat ṭhenkhat department-in a confirm an awm a. Heng mite hian Sawrkar office chawlh niin ‘kan chawl’ tiin an phiat ve lo va. An chan chin hi a phiattu tur siam a ni bawk si lo va, chuvang chuan sawrkar chawlhni leh Pathian nia hnawk em em bik lai a awm 

ṭhin a lo ni. 

A changtu department-in khawngaih takin hei hi lo ennawn teh u. Khawlai fai tak kara confirm-te phiah tur chanpual phiat tur ruahman loh avanga a lo hnawk bik 

ṭhin hi a mawi lo ve.