ZU KHAP BURNA HLIP TAWH ILA?

Mizote hi tunhma hun aṭang tawh khan kan nunah zu hi a bet tel a ni awm mang e tih turin, se chhun, khuangchawi leh kut ni vangthlaah reng reng zu hi kan lo leklam hle ṭhin a ni tih chu kan tunhma chanchin han chhiar hian a hriat theih a. Kan rama Kristianna a lo luh khan kan missionary sapte khan zu hmang thiam vak lova min hmuh vang ni fahmiang min han khapsakin, Kristian mi chuan zu in lo tur zawngin min han zirtir ta a. Keini lah chuan kalphung tur reng emaw tiin do sa lohvin kan do ta run mai a, zu chu sual lian ber hmuhin kan hmu ta run mai zawng a nih hi maw! Tun thleng pawhin he ngaihdan hi kan la pu reng a ni ber awm e.

Kan sorkar hrawn mek leh kan lo hrawn tawhte pawhin zu hi an buaipui em em vek mai a. A ni lah tak a, zu hi in thiam a har fut emaw ni, mahni incontrol-na tlachham hial khawpin kan rui leh mai ṭhin a. Hei vang hi a ni chek ang chu maw sorkar pawhin hnawk a tih ṭhin ni. Hetih rualin Kohhran lam lahin hnawk an ti em em reng a, an member-te control thei si lovin sorkar kuta rul kaw zenin, zu khap tura an phut leh ngawt ṭhin ni! Kohhranten an do tih rualin a dotu lian ber chu kan ram Kohhran lian ber hi niin, an do nasat em avang hian sorkar pawh an nawr nasa reng a, a sorkar lah mipui siam sorkar a nih tlat si avangin mipui neih tlem hlauvin adik adawk thlu hman lek lovin a khap burna lam an buaipui leh mai ṭhin zawng a nih hi!

Sorkar lam pawh kan tiluhai ve hle ṭhin zawng a ni ngei ang, ṭum hnih ngawt zu zawrh phalna a lo siam tawh reng a ni. A phal hmasak zawk ṭum kha chuan huaisen takin zu zawrh phalna a siam hmiah mai a, khawpui chhungah pawh zu in theihna hmun hial pawh a siam kha maw. A tir lamah kha chuan kan thiam lo fut dawn a ni awm mang e tih theih tur khan kan han rui buai deuh a, mahse hun a lo kal deuh a, kan thiam ta viauin zu dawr aṭang pawhin kan chakkhai lei ve ta mai mai a, han rui buai hmuh tur pawh an awm lo hmanin, khawpui khawlai pawh a reh huai hman a nih kha maw! Kan thiam ṭan hle tih lai khan Kohhran lam nawrna avangin a khap burna dan kan han hmang leh ta a, tichuan zu chu ralpui dovin kan do leh ta tluk tluk mai chu a nih kha. Mahse kan do hneh leh meuh lo chu a ni ang e, zu zawrh phalna kan siam leh ta ringawt mai a. Hemi ṭum hi chuan zu tihluzual turin zu lei theihna permit leh card hial siamin, hetiang nei lo tana zu lei theih loh turin an han ti ta mauh mai a. Zu chu a hma aiin kan tihluzual ta sauh mai a. Hetih avang hian zu lei thei leh in thei nih kha chu mipui chunglam angah an inngai tlat mai a, chuvangin zu in thiam lo pawh an pung deuh hluai chu a nih kha.

Hun a lo kal leh deuh a, sorkar chu sawi loh, Kohhran berin zu do turin sorkar lam an nawr nasa ta lutuk a, inthlan dawnah pawh zu do thei ngei tura ngaih chu sorkar ngei turah an ngai a, an ngaih ang ngeiin sorkar lo piang pawhin an intiam angin zu chu an sorkar tirh phatah an khap leh ta bur mai reng a. Kan sorkar leh kan Kohhrante hian zu hi kan ralpui ber emaw kan ti a nih ber hmel tlat a ni. Kan ram hruaitute lah hian zu chungchanga mahnia ngaihdan ngelnghet tak han nei fel nalh hi an awm mang lova, kohhran tihlungawi loh hlau an ni deuh fur mai. Hetih kawngah chuan Pu Laldenga kha ngaihdan fumfe nei awmchhun a ni awm e. A ni chuan, "Zu hi kan ram hmelma a ni lo va, kan ṭhian pawh a ni lo. Thil ṭha pawh a ni lo va, thil chhia pawh a ni lo. Thil a ni ringawt mai. A chhiat leh ṭhat chu kan inlaichin danah a awm zawk. Kan ramah hian zu hi kan buaipui lo, zu buaipuitute kan buaipui zawk a ni," a ti then mai a. Hetiang ngaihdan fumfe nei hian min kaihruai se la chu kan fel mai awm asin le.

Tunah ngat hi chuan zu hi kan tihlu lutuk a, sap zu ngat phei chu um khat hi sang hnih/thum a kai a, rakzu mai mai pawh sang chuang chuang man a ni ta mai a. Hetih avang hi a ni chek ang chu ruihhlo chi dang a hluar ta em em mai a, thingtlang khaw kilkhawr ber ber thlengin No.4 ngaite an awm phah tak hial ni! Zu aia ṭha lo, kan tu kan fate'n an ngai palh ang tih kan hlauh ngawih ngawih ṭhin khan, kan khua leh kan kawngka an han dak ta, a pawi hian a pawi vawng vawng a ni ber e. Heng thil ṭha lo mai pawh ni lo, hlauhawm takten min kiansan leh theih nan ZU KHAP BURNA DAN hi ennawn leh thlahdul leh ni thei se la, kan ram hi a la dam leh thei ngei chuan a rinawm e.

- Patrick Z, Chhingchhip