Hunthar Veng leh environment

Hunthar Venga leimin chung­changah Zonet-in hemi venga chêng, a tuartute a kawm kualna kha ka lo en ve a, hetilai hmuna harsatna thleng hi a bul ber chu environment kan chinphulh lutuk vang niin alang.

Hunthar Venga awm hlun tak an kawmnaah khan tuna leiminna lai velah hian tunhma chuan kawr a awm ṭhin niin a sawi a. Kawr chu a hnu zela in sakah te lei vung leh mihring hnawlin a khuh bo ta niin a sawi. Kha kawr kha leivung leh hnawlin chhilh vek tawh mah se, a hnuaia tui luang erawh a tawp chuang lo a, chu chuan chhiatna nasa zawk a thlen ta a ni berin ka hria.

Mizoram hmun hrang hranga leimin tam tak hi chu envi­ronment kan chin phulh nasat lutuk vang a ni ber mai. Tui luanna tur kawr pawh ngaihtuah lek loa kan chhehvel kan chap hi chu kan la tuar zel dawn a ang. Environment humhalh kan tih hian thing leh mau leh nungcha chauh a ni lo tih kan hriat a ṭha. Khuavang ri siam sate zah pah lek loin kan nawr chhia a, kan siam danglam a, chu chuan kan leilung hi a tichê a ni.

Mizoram phei chu ruahtui tamna a ni a, furah phei chuan hmun hrang hrangah tuitai a put a, a luang dur dur ṭhin. In kan sa a, chung tui luanna chu ruahmanna nei hauh loin kan tichhia a, a hnu zelah kan tuar leh ṭhin.

Kawr ruam kan neihte hi kan hum­halh a, ṭha taka tui an luan theihna tura kan siam loh chuan leimin te hi kan la tuar nasa zel ang.

In sak vel entu­te pawh hian ṭhen­awmte tana hlauh­awm tur leh tur loh lam ringawtte en lo hian, environment-in a tuar loh theihna tura in sak a nih theih nan hma la se, chu chuan kum 10 hnua thil ṭha lo lo thleng tur a veng thei dawn a ni.

Hmun awl a awm avanga in sa khat zel lo hian, kan lui leh ruamte humhalh chunga in sak dan ruahmanna kan siam thiam a ngai.

- Ramropuia