Raltlan ngaihtuah a ngai e!

Kan ṭhenawm Myan­mar ram buaina a la reh lo. Myanmar aṭanga sa himna zawnga Mizorama rawn tlan thla tam tak an haw kir leh ta a, hetih rual hian mi tam tak an la tangkhang thung. Engtia rei nge an awm dawn hriat a la ni lo.

Tun hnai khan Thingsai khuaain raltlante vanga harsat­na an tawh thu kan hria. Chanchinbu lama tarlan a nih dan chuan, Myanmar aṭanga ráltlânte enkawl­­naah Thingsai khuain harsatna an tâwk ṭan tih a ni.

Myanmar ram buai avanga sahimna zawnga Mizorama rawn lut zinga eng emaw zatin an pan Thingsai khuaah ráltlân chhungkua 57-a mi 356 an awm mek a, ei leh in lamah harsatna an tâwk ṭan a ni. Hei hi an thil tawn mek a ni a, khawtlang hriatu lam tan chuan a luhai thlak khawpin a rinawm.

Thingsai khaw­tlang hruaitute chuan, tun dinhmunah khaw­­chhak tlang­dunga ráltlân la awm tamna ber khua an nih an rin thu an sawi a, "Ráltlân­te enkawl nana páwl, Kohhran leh mimal anga ṭanpuina eng emaw zat kan dawn tawhte chu a kangchah ṭan vangin ráltlânte hnena ration sem turah harsatna kan tawk ṭan," an ti.

Chhiat tawk an awm a, ṭanpuina sem a ngaih hian a hunlai leh vanglai a awm. Khawtlangin kan bengkhawn a, kan ngaihven tlan lai chuan a awlsamin tihdan a awm mai ṭhin. Khaw hrang hrang aṭangin ṭan­puina a lut ruih ruih reng a, mikhual thlengtu tan buaina lutuk tur a awm hran lo, an buaina zawk chu an thil dawn sem darh dan turah a ni zawk a, hemi buaina hi chu chinfel awlsam leh nuam zawk a ni ngei ang.

Ráltlân an tam vanglaiin mi 900 chuang Thingsai khuain an mikhual, mi tam tak kir leh tawh mah se sipaiin an in leh lo an hâl chhiat vek avanga kìr lehna tur nei tawh lote chu tunah hian Thingsai khuain an la enkawl mek; kîr lehna tur nei tawh lote chu chhungkaw 57-a mi 356 an ni.

Mi 300 chuang ei leh in tur ngaihtuah sak hi ni khat atan chuan a harsa lutuk kher lo mai thei. Mahse, nitin, zantin leh kartin a ngaih chinah chuan, a ngaihtuahtu tan a luhai thlak hle dawn.

Fur ruahtui tlak tam lai a ni a, mahni khua leh veng bak kan ngaihtuah tam hman lo a ni maithei. Thingsaiin harsat­na an tawh ang hi Myanmar ramri depa awm khaw hrang hrangin an tawk ngei ang tih chu inhrilh nawn ngai loa hriat theih a ni.

Aizawl khawpui chhunga veng lian hrang hrang an che chhuak nasa tawh a, thingtlang leh zokhawpui dangte pawh an che chhuak ansa ve tawh. Chutih rualin a la tawk zo lo deuh, kan Mizo pui raltlante kan ngaih­tuah nasat leh deuh a ngai niin a lang.

Mizoram sorkar hmasalakna leh hma a lak dan in hrilh nawn kan ngai lo, sorkar chak tak hian raltlante hi a ngaih­­sak teh vak lo tih hretu kan ni e. Chuvangin sorkar lam aṭanga dawn theih kar pui ai chuan, kan phak tawkah midang tan i luang chhuak tak leh ṭheuh ang u.

- Lala, Aizawl