Shillong-ah Aizawl, Aizawl

Tlai khawhnuah Aizawl Football Club (AFC)-in India rama professional football league sang ber - I-league-a an match hnuhnung ber, Shillong-a an khelh tur chu en tumin chawpchilh takin ṭhiante nen kan han rawt a. Last-minute-a che chi 'media' lama ka thawhpui - Joseph Lalnuntluanga (Zonet), Zo­hmingmawia Khawlhring (The Aizawl Post) leh Alfred Vanchhawng (DDK) te bakah mi eng emaw zat kalna tur mini-bus chu vanneihthlak takin Mizoram Football Association (MFA) President - Lal Thanzara chuan min ruahmansak a, a zarah Shillong lam kan pan vut vut a.

Zan dar 8 hnu lama inrawt phur chawp a, a tuk zing dar 4:30 ah Aizawl Press Club aṭanga Shillong pan thei tur chuan kan han inruahman a. A ruk tak chuan kan zinga tlangval pakhat zawk (tlangval pahnih leh nupui fanau nei tawh pahnih kan ni) chu a zing thawh hun ngaihtuahin varṭiana Aizawl chhuahsan tur chuan kan huphurhpui deuh kha a ni a. Mahse, mak tak maiin kaihthawh a ngai lo. 'Record' thar kan siam nghal!

Aizawl kan chhuahsan dawna kan driver fel takin chunglam a dil a, kan ṭawngṭaina chu chhanin a awm niin kan hria a. Kei phei chu kan pu hnena Shillong ka kal dawn tia tepter taka ka dil laia, "In thleng hman dawn em ni?" tia a sawi fiamthu kha ka hre kar a, tlai dar 5:30 rik hma hreta Shillong kan lut kha ka hrilh vang vang ṭep a ni!

Kalkawngah Silchar-a tukṭhuan kan kil zawk te, hmun hnih thum vela kan insangmar vel tih loh chu kan tlan par par a. Shillong kan lut chu, Aizawl FC jersey haa lo ding khawm te, motor-a flag sen intar te kan hmu zui nghal a, kan tlangnel nghal hle. Mizoram House-a innghah phawt a, insilfai thuak a, Jawaharlal Nehru Stadium lam pan kan rilruk deuh mai. Mahse, chuti mai chuan kan thei bik lo.

Mizoram House chu 'Full House' a ni ringawt a. Mi pang­ngai tan chuan midang tibuaia innghah ngamna chi a ni lo. Mahse, chutianga kan awm lai chuan Liaison Office (LO) fel tak maiin ruahmanna min siamsak a. VIP Room ṭhenkhat tih ruah mai pawh hnial lo ta chu, keini erawh midang tihbuai ai chuan tiin kan mini-bus-ah chuan riah mai kan duh zawk thu kan hrilh a. Bus-a kan riah kha chu a ngai ngam lo a ni ang, a chhak lama Catholic Pastoral Centre-a 'Father' min biaksak a, ani'n min remtihsak thei hlauh a.

Room pakhatah khum pakhat zel a awm a, riahkhawm theih dan a awm lo'ng maw tia kan sawi chu, kawng chen vel khum awm duahna 'Dorm' chu min kawhhmuh a, chuta innghata riak mai tur chuan kan inti fel ta a.

Kan thlenna kawngkharpui zan lama an khar hun chu dar 10 a ni. Mahse, kan kal chhan ber inkhel kha zan dar 7 pelh hreta ṭan tur a nih te leh, chaw ei na la indap chawp tur kan nih avangte'n ngaihhnathiam kan dil a. Kan dilna chu darkar khata min tih khawtlaisakin min pawmsak a, kan lawm hle. Zu chu sawi loh, meizial takngial pawh centre chhungah chuan pak khuk phal loh a ni. Vanneihthlak takin chanchinthar thehdarhtu zingah meizial zu kan awm lo tih theih tluk a ni a, a tihching ber pawhin - a tihfuh changin ni khatah tlawn hnih/ thum a zu zo ve thei em ang - tih vel chu kan ni. Zan kan mut dawna kan han insawiṭhaih kual vel avanga kan zinga pumraw lian ber mai khan a laia mut a chuh thute chu zep tel lo mai teh ang.

Kan innghah lailawkna aṭanga kan chhuah hma hauh aṭangin Aizawl FC General Secretary Vanlalnghaka Chhawn­chhek chuan stadium gate-ah min lo hmuah tur thu thlengin min chah lawm lawm mah se, traffic management fel loh luatah kawng lakah kan tang rei a. Aizawl khawpui chu nise, kan traffic police te'n remruatna fel tak an siam zung zung mai tur ti rilru pahin 'Polo' lam chu kan pan a. Mizoram House peng aṭanga stadium thleng turin darkar chanve chuang hun kan hmang nia mawle!

Jawaharlal Nehru Stadium pana kan kal chhung ringawt pawhin car pass nen thlapa min lo hmuaktuin vawi eng emaw zat chu, "Khawi lai nge in rawn thlen tawh?" tia min ngaihvenna phone-call a awm nual hman a. Kawnga kan la awm laiin Shillong Lajong FC chuan Aizawl FC lamah an goal khatna an khung avanga au-thawm kan hre hman hial a. "Gate pui berah khan rawn lut rawh u. In lo thlen hunah min lo call mai ula," tiin inchah lawm lawm mah ila, traffic jam kara kan tan rei avanga inthlahrungin kan va be pawp duh ta lo kha a ni a.

Stadium hma lama luhka (gate) ah kan lut a, gate duty-te khan an 'ei-ru' hnem ngawt ang! Gate duty pali (4) lo awmte chuan an ticket bung, midangin luhna atana an lo hman tawh Rs. 150 man kha Rs. 100 in an lei tir ham ham a. Kan thlen ve meuh chuan ṭhutna mang pawh a lo awm tawh lo. A rem remah kan inhnawh ve a. Mahse, fans inṭhut pawlh lutuk kha chu a pawi a, champion thei ve ve inkhel phei chu nise kha ai khan a boruak a ṭang ang a, security chhiat avangin fans intual vuakna pawh a thleng awlsam thei tlat.

Inkhel hun a tawp a, cham­pion tur a chiang ta. Shillong Lajong Football Club leh Royal Wahingdoh F.C. te'n 'home' atana an hman Nehru stadium chhunga champion lawm avanga an tlan lut hum hum kha chu hmuh a nuam viau nain, 'pitch invasion' erawh kha chu inkhap sen pawh a ni tawh hek lo a. Khelmual sir lama gate vengtu lam pawhin khap a hnekin, "Mizo i ni lo'm ni? Ngati nge i tlan luh loh?" ti hiala lo kawhhmuh tawkte an awm phei chuan, indem theih vak pawh a ni tawh lo a. Mizoramin bung thar a ziak lai 'witness' ah ṭang mai lo a, 'enjoy' kha an ni vek tawh mai.

Kum 2011-a Indian foot­ball captain Baichung Bhutia-a'n 'pitch' a lo sawisel hnu lawka, Meghalaya sorkar in stadium chei ṭhatna atana Rs 555,000,000 a thehchhuah hmanga an chei ṭhat leh chhunga tarmawi ka mit la em emtu pakhat chu hei hi a ni - Thank You Shillong Lajong FC for keeping I league alive in this football loving city - tih hi. Kan Rajiv Gandhi stadium-a 'Apex Bank' tih intar thluah ai chuan rilru a khawih bik tlat!

Mi tam zawk an haw hum hum laia Aizawl FC fans ṭhenkhat la chambangin, sta­dium chhung hnawk zualpui thianfaia an 'hnatlang' zui nghal mai hmuh te fak an phu khawp mai. Fak an phu tluk zetin social media lamah pawh hnam dang aṭangin fakna ri a ri ring viau a nih kha. Shillong-a awmsa Mizote pawhin khual thlen an thiam a, an ngaihven bawk a. Hriat leh hmuh phak chinah buaina tawk kan awm meuh lo kha a lawmawm tak zet a ni.

- CHD-A, Bawngkawn