Kut sil fai

Mizote chu fai vak lo kan ni ṭhin a. Zosapte khan fai lam kawngah pawh min vei hle a ni ang, lawmman an siam pawhin sahbawn hi an ti tel zel a ni, an ti. Balh hi chu hnam mawl deuh zia a ni.

City bus/ taxi-ah te kan chuang a, vawn chhan bel han tawhte chu in dawm ngheh nan kan hmang lo thei lo a, hengte hi vantlang thil, mi chitinin an hman a ni. Building chhawng step kal chhohnaah te pawh vawn ban te siam ṭhin a ni a, heng te pawh hi mi chitin hman a ni a, fai lo hle tura ngaih a ni. I motor steering kha i kutin i vuan ṭhin a, hei pawh hi rin aiin a fai lo hle ṭhin. Hengte avang hian kan kut hi a lo bawlhhlawh ṭhin hle a ni.

Limbu lawh hlim i vel a, tuihnai takin i chan a, plate-ah i chhawp a, limbu te chu thei hrisel tak a ni a. Tui ti takin i ṭhianten an ei a, mah se i vel hmain i kut i sil hmasa tlat lo; a thei a pawh chuti bawk, eng eng emaw kha i lo khawih nual si a, i kut ami bawlhhlawh ho chu an ei tel ve ta hlawm a nih chu!

Chhun thingpui in in dawn a, cake tuihnai tak in ei dawn a. Kutin in la a in ei ta a, a tui ngei mai. Mahse, i cake banna kut kha thil chi hrang hrang i lo khawih tawhna a ni tlat mai. Chawei dawnah pawh mi ṭhenkhat chuan kut kan sil uluk ngai mang miah lo. Kan ti liam mai mai ṭhin bawk. Kan kutah hian natna hrik, bawlhhlawh tam tak a bet ve ṭhin a, chuvang chuan kan sil fai loh chuan chaw ṭha tak ka nei rual khan kut bal kan ei tel ve ṭhin a, chu chu kan hrisel loh chhan te pawh hi a ni thei; a pawi hle.

Kut sil fai hi a pawimawh hle. Entirnan- chaw ei-ah mi i sawm a, vai tih dan leh Mizo pa tih dan chawh pawlhin in siam a, a tuihnai ngei mai. Chaw chu in han ei zo ta a, i rawt siam hmaa i inthiar zawk te kha in ngaihtuah a, mah se, inthiar zawh khan i kut fai takin i sil em? Hmm... chaw eia i sawmte chuan i mawng silna kut sil fai loh hmang i thil siam kha an ei tel ngei ang le! Kut sil fai nachang kan hriat chuan natna hrik, bawlhhlawh etc. lakah kan fihlim phah dawn a ni.

Hrilselna hi a hlu a, chumi nei thei tur chuan kan beih nasat a ngai hle a ni. Kan thu a ni lo chung hian malsawm tlaka kan awm ve te pawh hi a ngai a ni. Khawvel pawh hian a ngai pawimawh hle a, khawvel pum kut sil fai ni - Global Hand Washing Day te pawh a siam hial a ni. Chuvang chuan keini pawh kan lo hrisel zawk nan kan kut fai takin i sil ṭhin ang u.

- Lalchhandama Colney