Happy Mother's Day

"Dear Mom,

I may not like you always. We may have arguments and fights sometimes. But there's one thing that you should know i love you always and forever."

May 14 hi Nu te Ni (Mother’s Day) a ni. A ṭobul sawi hmasa ila. Nute ni ṭobul hi nu chhulchhuak damlai tawh phawtte tana mellung pawimawh pakhat a va ni em. 1864 Ṭomir thla, ni 12-a USA a piang, Anna Reeves Jarvis fanu Anna Maria Jarvis-ina kum 1905 kuma a nu duh tak maiina a boral san ta hriatreng nana 1907-a a nu thihcham a lo thlenin a ṭhian ṭha zualte sawm khawmin Mother's day serh hran a duh thu hi a lo tlangau pui tawh a ni.

Chu chu hriain an lawina kohhran St. Andrew's Metho­dist Episcopal Church, West Virginia chuan, May 1908 Chawlhni vawi hnihna chu 'Mother's Day' atan an hmang zui ta a ni. Tin, 1912-a General Methodist Conference, Minneo­polis chuan Mother's day dintu-ah, Anna Maria Jarvis chu khawvel pum hriatah a hming an puang chhuak ta bawk kha a ni a. Kum tinin May thla Pathianni vawi hnihna apiang hi khawvel nute ni atan an lo serh hrang ta a ni.

Vawiinah hian nu te ropui­zia leh an tel lova khawvel a famkim theih lohzia te hi kan chhut ngai emaw chu, nu te avangin vawiin niah hian: Pastor, politician, officer, zirtirtu, doctor adt... te kan ni thei a. Hetiang ni thei tura chher puitlingtu che chu i nu a ni - zah hle ang che.

Tu'nge nu te chu...

Nu chu hmeichhia a ni a, pasal pawmlai nei emaw nau hring tawhna zawng hi nu chu an ni. Mahse, Pathianin a ruat dan anga nu nih tling erawh kan damchhung thawnthu atan mellung pawimawh tak a ni si a. Nute tluka nu nihna hian nu te pawimawhna leh an hlutna hi a va pholang chiang em! Hmeichhe hrin tho nute chhulchhuak nu ho te hi in lo hlu teh e.

Nepoleana khan, "Nu tel lo chuan khawvel hi thlaler ram ro, tui awm lohna hmun ang a ni" a lo tih te kha a dik a ni. Nu hmangaihna thuk leh ril tak hi zawng, nu chauhvin nu hmangaihna a hriat rengna hmunah hian a chiang ber mai awm asin.

An lo hlu ber

Nu te hian an nunna hial thapin, thisen tam tak sengin min hring a, an mal chung leh awmte chu kan khum hmasa ber a ni. Nu te tel lo chuan khawvel hi engmah lo mai a ni. Nu te hi leia kan hmuh theih pangpar rimtui leh mawi ber an lo ni. Kan chenna khawvel hian, nu tam a hring chhuak ta. Mahse, nu nihna title phuhru zo thei erawh an tam lo vang. Nu te hi kan lei pathian, kan khawvel tinuamtu leh chhungkaw rangkachak, chhungkaw pangpar mawi leh tlo ber te an ni. Anmahni avangin an fate thla a muang a, a va hlu ngai em...

Zalênna saltangte khawnrik saktu US President, Abraham Lincoln khan,"Ka bat tlak dawn ila, ka nu kaka ka bat hi ka tlak huphurh ber a ni" a lo ti a. A va ropui em. Nu te laka bat tlak turin tunge tling zo awm chuang ang ni?! Chumai a ni lo, Ingmar Bergmana'n a ni lawm ni kha, "Ka upat poh leh ka nu kha ka rilru-ah a lo lang zing ?hin" titu kha ni. A va sawi dik em, kan upat poh leh nu te hi an lo hlu zual ting mai a lo nih hi...

Nu te hi kan khawvel leh kan mit hmuha missionary niin, Missionary ropui William Carey meuh pawhin, "Chhung­kaw hlimna chahbi kawltu chu nu a ni" a ti. Ni e, leilunga robawm chahbi kawltu atan nu te hi Lalpan a lo ruat a ni. Chhungkua hian nu aia rohlu dang a nei ngai dawn lova, a nei ngai hek lo vang.

Hei hi mahniah

Chhiartu duh tak, hei hi ka zawt a che. I nu tan i hlutzia leh a khawvel i nihzia hriattir lovin i nu kha mual i liam tir mai dawn em ni? Nge i nu kha mi fate awtin i la siam zel zawk dawn?

Kei zawngin ka nu hi mi fate awtin ka siam ngai dawn lo a, a thlamuanna ber nih ka tum ang. Ka tun dinhmun min hlangkaitu, tawp lova min hmangaihtu, bang loa min ṭawngṭai saktu ka nu min enkawlnaah hian ka lawm a ni. I nu in a hmangaih che ang bawkin a hlimna thlentu i ni ve em?! Nu te u, nangmahni avang chauhvin khawvel hi a nuam asin.

Vawiinah hian i nu aia nu hmel ṭha dang an awm lo va, i nu aia nu ropui an awm bawk hek lo. I nu kha i khawvel history hrilhtu che, i vanram chahbi kawltirtu che a ni asin. Zah ang che. Dam mawh hritlan ni khua te hian nu te hi an hlu zual a sin. Ram kal leh inchhung sekrek in khawih hlan te, khuallam ram hla taka in zin te hian, nu te tluka fate'na kan ngaih leh thlakhlelh hi an awm chuang lo.

I nu hmangaih rawh

Vawiinah hian keia min hringtu ka nu ngei pawh, kum 55 chuang niin tisa lama awngràwp tak chungin Pathian zarah min la dampui a, ka nu vawiinah hian ka hmangaih che a, ka'n chhungkaw tan nu rangkachak i ni. Nangmah avangin ka nu i fapa nih hi nuam ka ti tak zet. Rei tak min dampui reng ang che.

Nu te ni hmuchhuaktu, Anna Maria Jarvis chuan nu hmangaihna leh kan tana an inpekna te hre reng chunga nu te kan hmangaihna lantir ve

ṭhin turin min duh asin.

Hnam changkang apiangin nu te hlutzia an hria a, nu te hnen aṭangin hmangaihna tawpkhawk an dawng ṭhin a, chutiang mite chuan nu te hlutna an tizual ṭhin a ni. Nu te tluka ngaihsan leh han ngaih ropui filawr láwtlak tur hi leiah hian an lo awm chuang lo. Hmangaih phu leh zah phu ber chu nu te hi an lo ni.

I nu chu, eng ang mi pawh nise : "A damlai ngeiin i nu hmangaih rawh."

- LH.Hauhèng, Nghilhloh Rûn