Traffic jam leh intlanchhawk

Aizawl khawpui chu kan hmuh angin engtikawng mahin traffic jam-in kian ni a nei dawn ta lo a nih hi. Kan insak danin a zir tawh si lo, kawngpui humhalh kawngah sorkar a bikin a concern department-te'n hun kal tawh aṭangin an hmalak a zau hek hawk tawh bawk si lo. Traffic jam nasa reng mai hi engtia tihreh tur nge ni ang?

Traffic jam tih ziaawm nan traffic management commi­ttee chuan taxi intlan­chhawk a kalpui mek a, hei hian nasa takin min chhawk ngei mai. Mahse lirthei a pung zel a, kawngin zauh lam aiin zim lam a pan hret hret zel mai si a. Kawng kamah lirthei zanriak emaw, chhunah parking atan kan hman tlat bawk si avangin kawngpui thawl deuh lai pawh a khat ṭhup zel mai zawng a nih hi.

Motor parking lam­ah ngaihtuahna kan sen lem loh avangin kawngpui kama dawr neitute pawhin an dawr bul kawngpui sirah an lirthei an hun a ngai a. Hetiang a nih chuan anmahni dawrtute tan lirthei han hun zeuhna tur takngial pawh a awm lo tluk a ni. A nihna tur dik taka parking kan neih len ber chu millennium centre hnuai hi a ni a, hei lah hi tun dinhmunah chuan a zau tawk lo hle mai. Chuvangin, sorkar hian kawngpui hnuaiah parking-te hi a ngaihtuah vat vat a ngai ta hle.

Traffic jam tih­reh tur chuan taxi intlanchhawk ringawt hi a tawk ta lo hle tih chu a chiang a ni. Chumi atan chuan kei chuan lirthei zawng zawng hi intlanchhawk tawp mai se a ziaawm deuh berin ka ring.

Vawiinah number kawpkim zawng tlan se, naktukah number kawpkim lo zawng tlan leh se, lirthei chanve vel nitin a indinchhawk dawn tihna a ni a, a ziaawm pha viau-in a rinawm.

Hetianga kawng kan indaih loh mek laiin Bible House bul kawng chu two wheelers kal theih a ni ta si lo a, hei hian traffic a nghawng nasa em em a ni. Kulikawn lam a ṭanga hmar lam pan zawng zawng deuhthaw chu Khatla chhukah tlan a ngai a, hmar lam aṭanga new secretariat complex pan tur tam lutuk nen Khatla junction-ah a tahtawlin intlan­chhawk a ngai a, hei ringawt pawh hian Aizawl khawpui lirthei che velah nghawng a nei lian hle a ni.

Khawpui lirthei thunun leh parking chungchangah ram hruaitute'n mutmawh hnarmawha an neih a hun ta e.

- Hmangaihzuala