FIFA Congress report Aw, hnam zawng zawng leh chi tin ṭawng tin...

Ram 211 aṭangin kan pungkhawm a, ‘khawvel’ chu kan kim e! Iraq leh India, USA leh UAE, Brazil leh Bhutan... kil tin aṭangin football buaipuitute kan inhmu khawm a, hei hi khawvela football intawhkhawmna sang ber 'FIFA Congress' an tih chu a ni.

Football tuipui ve ṭhin tan chuan FIFA Congress-a kal vea ngawih bopui mai hi thil ‘theih loh’ a ni a, sawi chak leh sawi chhawn atana

ṭha tam tak a awmin ka hria. All India Football Federation-in executive committee member zinga naupang ber leh mi thar ni bawk si, India aiawh tura min thlang ve nalh maite hi a mak a, football khawvel rorelna in sang berah ka ṭhu ve ta vang mai a, mumang lah a ni der si lo.

FIFA Congress chu?

Football khawvel rorelna in sang ber hi kum khatah vawi khat an inhmukhawm ṭhin a, chu chu FIFA Congress tih chu a ni.

He rorelnaah hian football kaihhnawih hrang hrang an rel ṭhin a, FIFA President thlangtu chu Congress hi a ni. Hetah hian a ni World Cup thlengtu turte an rel fel ṭhin - tunah erawh FIFA Council kutah an dah ta thung.

Kum hnih dana neih ṭhin kha 1998 aṭangin kum tin neih a ni ta a, hei hi football inkhawmpui lian ber chu a ni. FIFA hnuaia ram 211 aiawh kan kal khawm a, ram pahnih erawh hrem an nih avangin vote an nei ve thei lo thung a ni.

FIFA Congress-ah hian ram tin aiawh mi pathum an tel thei a, India aṭangin AIFF President Praful Patel leh General Secretary Kushal Das nen kan kal. Patel hi politician leh Union Minister hlui a ni a, Kushal hi thiamna lamah Chartered Accountant niin International Cricket Council lamah pawh lo awm tawh ṭhin a ni. Kei chu heti zawng hi ka ni a, MFA lama thawhpuite zar zoin ka kal ni berin ka hria.

A kalkawng chu...

Zin report pek dawna Sumo chuanna number aṭanga pe ṭan ang deuh ka ni dawn. Aizawl

aṭangin New Delhi ka pan a, hotel-ah thil a dang­lam nghal - thil fûn chhah ṭha zet mai hi reception counter-ah min lo pe a, FIFA Manual, Agenda, Finance Report leh hriat tur ṭul dangte a ni a, ka phur tawhin mak ka ni a, a nuam ka ti ngei mai.

FIFA nge nge chu a hma kar thum velah visa, thlawhtheihna ticket, ka thlenna hotel room number chenin min thawn fel vek tawh. May 7 zanlaiah Bahrain kan thleng a, airport-ah min lo hmuak a, an airport-ah pawh FIFA Congress an thlen tur chu hmuh hmaih rual lohin an tar kiau kuau a, a football em em tawh a ni.

Motor changkang zetin min lo hmuak a, Bahrain-ah pawh an hotel ṭha bera sawi Four Seasons-ah kan han lut. Tuipui chungah he hotel hi a ding luah mai a, a awmna hi tui a ni ṭhin a, lei an chhung khat a, chutah chuan hotel hi an sa a ni - zan khat riah man Rs 50,000 chuang a ni e an ti a, football vangin 'a thlawnin' ka inziak lut ve ta mai a, ka nihlawh teh e.

Bul ṭanna AFC Congress

FIFA Congress hmang turin khawmualpui tin aṭangin kan kal khawm tho tho a, Asian Football Confederation chuan a hranpaa AFC Congress hmun danga koh ngai loin Bahrain-ah hian an ko ve nghal mai a, May 8 khan kan thlenna hotel-ah Asia khawmualpui football inkhawmpui lian chu kan nei ta a ni.

Asia ram 47 aiawh kan kim a, AIFF president Praful hi AFC vice president a nih vangin AIFF aiawh angin a ṭhu thei lo a, AIFF palai chu pahnih kan ni. AFC President hi Sheikh Salman Bin Ibrahim Al-Khalifa a ni a, Bahrain lal chhungkuaa mi a ni bawk nen, kawng engkimah AFC Congress palaite hian duhsak kan hlawh a ni ber mai.

Kan han inkhawmpui ta a, Mizoram lama inkhawmpui angin an indin chhawk sek lo a, "In sawina êng aṭang khan kan sawi ve ang a," tih lam a awm lo. Engkim mai hi a hmaa ziaka sem vek a ni a, ngun taka zir chian vek a ni tawh bawk nen, screen lian takah presentation an nei a, chumi hnuah 'vote' kan la ta.

Ram tin hnenah iPad pakhat ṭheuh min pe a, chumi hmang chuan agenda tinah kan vote mai a, indin chhawka sawifiah sek ang a awm lo a, hun reilote chhungin thil pawimawh tam tak kan rel hman.

Asia-a intithei deuhte!

Ka ṭawngkam hman hi chu a dik chiah lo a; nimahsela 'intithei' tih hian South Korea leh China palaite hawiher kha a sawifiah berin ka hre tlat - Asia ram awm khawmah na na na chuan Korean leh Chinese an tlangnel ber mai.

Praful leh Kushal-te chuan hmelhriat sa an nghah a, kei atan erawh mi zawng zawng kha mi thar vek an ni. Hmelhriat neih tam hman ka tum ve bawk nen, ka Indian ṭhiante hi ka kawp lem lo a, ram dang palai bulah ka awm ber.

Korea ho chu a football zawngin Asia-a thiam ber an tih ngam bawk a, palai pathum mai bakah anmahni sensoin an Football Association mi leh sa pawimawh ṭhahnem tham tak an kal tel. China ni se mi 10 zet an rawn thawk chhuak bawk a, palai tak chu mi pathum chiah an ni tho a, an inzui a, an ri ham ham reng mai.

Hengho hi ka kawm nual a, Korea rama football ṭhan zelna tura an hmathlir an sawite chu ngaihnawm a tling a, anni chuan 'Europe an el' daih tawh mai. Chinese FA-a an foreign relations lam hotupa thusawi lah a ngaihnawm, "Keini chuan kum 2030 kan thlir a, hetah hi chuan football ram lian nih ve kan duh," a ti a; sorkar lamin na taka football-a hmasawntir tuma an nawr dan a sawi zui a, "Sorkar berin hlawhtling lo thei lo turin min nawr a, pressure sang tak hnuaiah hna kan thawk mek a; nimahsela kan ramah football-in hma a sawn hi chu kan ring. Chutih rualin Chinese league-a player langsar leh hlawh tam lo lutte hi kan hlawhtlinna tur a ni lo. Grassroots leh infrastructure lama kan hnathawh hi kan hlawhtlinna tur zawk chu a ni. Player langsar lo lut hi chu boruak siamna mai a ni," a ti.

Football chu Football

Asia ram hrang hrang aiawha kal khawmte hi kan inang lo hle a, nimahsela a tam zawk hi chu an rama mi challang tak tak an ni. Ram khat minister an awm a, Arab mihausa tih hriat reng reng, kawrfual var leh lu tuamna nen an ther fur a, khawchhak ram hrang hranga, "Ṭhianpa," tia koh mai theih tur awm anga langte pawh an kim hle. Hmel Vai deuh hlek chite pawh an awm a, USSR keh them aṭanga lo kal European hmel pu zawkte pawh an awm a, Australian tih hriat ngawih ngawihte pawh an awm.

Kan inkawm khawmnaah reng reng 'football' avangin kan inkawm ngeih tlang a, titi a rual a, kan nui ho ham ham ṭhin. Sorkar lam thu ni ta se North Korea leh South Korea palai an thleng ho vek a, India leh Pakistan pawh kan inkawm a, ram inhal tak takte pawh kan inchibai nawk nawk mai.

Football-ah chuan hmelma an awm tak tak lo a, politics-a inhmelmate pawh football vangin hotel pakhatah kan cheng a, tukṭhuan eihoin zanriah kan kil tlang thei a, a ropui khawp mai.

(Chhunzawm tur)

- Lalnghinglova Hmar (Tetea) Honorary Secretary, MFA