COLLEGE ADMISSION HMANGCHANG

HSSLC ilo passed ve ta a, ka lawmpui hle mai che u. Admission buaipuiin dai ngai loh ramah i kal dawn a, i awlsam zawk nan heng hi lo bawhzui ang che.

1. Mark Sheet/ Document Xerox : Thil man a san zel avangin kan khaw lamah tlawm zawkin xerox sa vek ila, college hrang hrang form fill up tur a nih avangin copy 10 ṭheuh tal neih sa a ṭha hle. Tin, Tribal Certificate, Income Certificate, Residential, etc te mahni khuaa lak lawk a ṭha hle bawk.

2. Attested : Khawpui thlen tawh hnua attest-tu tur zawng a hmel hriat loh office a luh ngai ai chuan mahni khuaah school, office, zirtirtu, doctor, officer, etc remchang apiang attest tir sa vek a ṭha.

3. Passport size photo : Thlalakte hi kan mamawh tam phian a, admission mai bakah college kal chhungin thil hrang hrangah kan la mamawh reng dawn a ni. Chutihlaiin thil man a to zel a, chuvangin mahni khaw lamah tlawm zawkin lo siamtir hram ila sum save na

ṭha tak a ni mai. Mamawh laia thla la tura dawr zawn chuk chukte a buaithlak thei hle. Copy 20 neih pawh a pawi reng reng lo a nia.

4. College location: College hrang hrangah kal kual tur a nih avangin college hrang awmna veng leh a hmun hriat lawk hram a ṭha hle. Tul loa taxi/ bus fare chawi ṭeuh hi a uiawm lutuk. Google-ah zawn mai theih a nih tawh hi.

5. Awmze nei subject: I nih tumah chiang la, chumi mil chuan subject thlang ang che. Zir zawh a awm lo, thiam chiang si lo a zir lawr ai chuan Mamawh tur chin hneh taka zir a ṭha zawk a, hlawhtlin a awl zawk. Hemiah pawh hian college tinah admission desk an siam a, lecturer-ten an kawh­hmuh thei reng bawk e.

6. College luhna tur : Khawi college pawh hi a ṭha deuh vek a, mahni kan pawimawh ber a ni mai. I ngaihnep berah pawh lut la, kum hnihnaah chuan i luhna college aia ṭha i hmu bik lo ang a, hmai sen dawn dawnin i ṭan hlur dawn tho tho a nia. Chuvangin, i chenna/ awmna hmun tur azirin transportation cost sang lo thei tur ngaihtuah tel ang che.

7. Zirlaibu hlui : HSSLC a i zirlaibu hlui kha hralh ngawt suh. In zir ngai tho kha chiang zawk leh thuk zawka in zir leh dawn avangin i en let leh duh ngei ngei dawn a, a ṭhenah phei chuan note ngai rintlak tam tak pawh a la awm dawn a ni. Mi hlawhtling ni tur tan zirlaibu hralh man kha eng tham mah a ni lo e.

8. Subject lak a kan zir tur tlangpui hriat tum a ṭha : I subject lak tuma inzir tur tlang­pui tal hriat hmasak tum ang che. Arts a nih avang khan chhiarkawp i lo thiam loh kha i zir tawh dawn lo-ah ngai ngawt suh - i la zir tur hriat tumin midang rawn hreh suh.

9. In luah tur: Tam tak chuan in luah hi a zalen a, tiin kan duh zawk a, tin, ṭhian hoa in luahte kan chak ṭhin - mahse fimkhur ang che. Tleirawl rual awm khawm chu rin aiin titi a rual a, zalen deuhin a tlak hniam rawih rawih theih a nia. Mahse mahni kan pawimawh ber zel. Tin, in luah tur a vang em em a, duhthusam hmu tur phei chuan vanneih a ngai viau. Chuvangin, tun aṭangin lo ngaihtuah lawk ang che.

10. Be something: Hei hi a pawimawh khawp mai. College-ah hian activities hrang hrang - Evangelical Union (College a Pathian chibai buka inkhawmna), SU, NCC, Adventure Club, Literature Club, Chess Club, Cultural Club etc hi a awm thluah ṭhin a. Mi tam tak chuan Zirnaah insawrbingin hengah hian an inrawlh ve ngai lem lo. Hetihlai hian tam tak chu an inrawlh thuk leh lutuk a, class kal hman lo khawpa buaipui tur lah a tam. Activities a hlawhtling niin mi hriat hlawh mah se zirnaa hlawhchham phah an tam hle.

Ka chah duh che chu, heng activities-ah hian engemaw talah chuan tel ve ṭhin la, Pathian rawngbawl tum i nih chuan EU, sipai lam tuipui tan NCC, chutiang zelin ṭangkai takin a hman theih a ni tih hria la, ṭangkai pui ngei turin inrawlh ve ang che.

11. Superiority vs Inferio­rity complex : Midangte nun leh che phung i thlir anga nei­nung bik leh nuamsa bikah i ngai ang a, nun ngui leh mahni inhmuh hniamna leh inkiltawih nan i hmang ngei ang. Mahse hei hi hre reng ang che; i phak tawk leh i neih tawka lungawi taka i awm khan midangin an awt ngawih ngwih zawk ang che. Chuvangin, i neih loh lam ringawt thlirin, inferiority complex nen hun hmang lo a, i neih leh thlen chin thlir tlat la, superiority complex nen college life hmang turin inpuahchah ang che.

Duhsakna : College ilo rah ve dawn hian zirna tak tak i tan dawn chauh a ni tih i hre dawn chauh a, degree ṭha tak neih ai pawha hlu zawk chu nun tak tak zir chhuah hi a ni e.

He college life i hman danah hian i hma lam hun zawng zawng a innghat vek tih mawlh hi hre reng ang che. Ka thurawn i pawm a, fimkhur leh tum ruh taka i zir phawt chuan “Quantity ai quality ngaipawimawh chungin zir la, quality ṭha tak nen quantity ṭha tak i zir chhuah pui ngei ang tih ka tiam a che.

- Ramdinsanga RD-Muanna In Thenzawl