RTI Act Chapter 1 Section 2 (j) hmangin Grape Wine leh Whiskey (END Minister thil sawi hi fimkhur nan hman a ngai)

May ni 27, 2022 (Zirtawpni) a Excise & Narcotics Department enforcement staff-ten Aizawlah Grape Wine an man a. Alcohol telna chi thil dang pawh an man a, Millenium Centre a Grape Wine man chuan boruak a nei zui nasa hle. Hemi chungchang hi, RTI Act zinga kan hriat lar vak RTI Act Chapter 1 Section 2 (j) hmangin ka ûmzui a, END changtu Minister thil sawi danah dik tâwk lo a lo awm ngei a ni tih ka hriat phah.

RTI Act Chapter 1 Section 2 (j) hi hrilhfiah a nih dan chuan, ‘sorkar thuneituin a kawl information he Dân hmanga neih theih bâkah hengte hi a huam’ a ti a, chutah chuan, ‘docu­ments endik te, records endik te, ziah chhawn’ te leh thil hrang hrang a sawi a. He dan chungchang hi tunhnaia Mizoram Information Commission a hotu rual pathum ka kawmnaah pawh ka zawt uluk hle a, an sawi dan aṭangin he dân hi hman ve hrim hrim duhna ka neih phah ta a ni.

Tichuan, he Dân hmang hian, tuna kan buaina ni mek Grape Wine man kaihhnawih hi July ni 13, 2022 (Nilaini) khan SPIO, Excise & Narcotics Department (Aizawl District) hnenah ka thil hriat duhte chu ka thlen a, ṭha takin min dawngsawng a. RTI Act in a sawi ang hian, an record en a, ziah chhawn dil ka ni. A chhanna min pe mai a, a lawmawm hle. Chuta RTI Act hmanga chhanna ka neih dan aṭanga lang chiang ta chu tarlang pahin, hriat atan ṭha leh a pawimawh zual kan thlir zuai zuai dawn a ni.

May ni 27, 2022 ah hian E&N deptt a thawktute hian Chanmari, Vaivakawn, Babutlang, Millenium Centre leh Zarkawtah zu kaihhnawihte an enfiah a ni (RTI chhannaah hian Zarkawt hi Millenium Centre area-ah khung).

Chanmari-ah hian mi pahnih hnen aṭangin zu man a ni a. Mi pakhat hnen aṭangin Whiskey (Royal Stag) – 13 bots (750 ml each), Majic Moment (Vodka) – 10 bots (750 ml each) 40 Can of Kingfisher Beer (500 ml) leh Soju 32 bots (360 ml each) man a ni. Mi dang pakhat hnen aṭangin Kingfisher beer 14 man a ni bawk.

Kan sawi lar tak Millenium Centre-ah hian mi pathum hnen aṭangin Grape Wine chi hrang hrang eng emaw zat man a ni a. Grape Wine zuar­tute hnen aṭang hian Whiskey man erawh a awm lo. Hei tak hi END Minis­ter-in Kolasib Journalist te hmaa Whiskey man tel angin a sawi a, he lai tak hi a dik lo lai tak chu a ni ta a ni.

Millenium Centre a Grape Wine zuarte hnen aṭangin Grape Wine chi thum – Champ Wine, Fanai Wine, Bcha Wine, Apple Juice tih loh man a awm lo a. Whiskey, Beer leh Vodka man a ni lo (A chunga kan sawi ang hian).

Millenium Centre chhungah tho hian, mi pakhat hnen aṭangin END a thawktute hian Beer, Soju leh Dark Wine erawh an man thung. Hei erawh Minister hian a sawi sual chuang lo. Zarkawt (Millenium Centre huama dah) ah pawh mi pakhat hnen aṭangin Beer leh Soju eng emaw zat man a ni bawk.

Hemi ni hian thawktute hian Babu­tlang leh Vaivakawnah pawh Beer leh Soju eng emaw zat man a ni bawk.

END a thawktute an hna leh tihtur an thawk a, dan phal loh thil tam tak an man zingah, The Mizoram Liqour (Prohibition) Act 2019 in a khap zinga mi Grape Wine pawh man tel a ni tih pawh a chiang.

Minister-in media-a a sawi dan aṭang leh RTI chhanna en kawp hian, END a thawktuten an thil manna hmun leh an man chungchang, Minis­ter aṭanga a lo rik chhuah danah Minister leh thawktute inkarah fuh lo a awm tih a lang chiang ta tihna a ni. Ṭan an lak zui erawh a ṭulin a rinawm.

Heta thil awmdan en hian, Depart­ment dang enkawltu Minister dang leh thawktute inkar atan pawh hei hi darthlalang pawimawh tak a ni. A tawi thei ang ber a RTI Act Chapter 1 Section 2 (j) tlawhchhana chhanna thlir zuina a ni ber e.

- Lalnunṭawma Fanai