Zak lova sum hmachhuan politician an tla fo tawh

Kan politician zingah hian mi inngaitlawm tak tak, milian an ni tih pawh hriat hran loh tur khawpa inngai tlawm an awm. Kan politician zingah tho hian nihna lantir deuh arh reng mai, sum chanchin ringawt atchilh ruling ngawih ngawih an awm bawk.

Kan ram hruaitu zingah an hruaia te mawl tak anga min ngai a, an duh duh min sawi khum, sum min tiama a chang leh sum awm loh thu min hrilh leh si ṭhin an awm avang hian alawm Mizo mipuite hian min zah lotu kan hriat chu kan paih mai ṭhin ni.

He kan ram din­hmun hi han thlir teh mah u, kan politician ṭhenkhat hian sum awm miah lo hi tam tak awm angin an sawi an sawi a, ṭhenkhat lah hian sum a awm loh thu an sawi bawk.

Sum hmanga mipui min thlem tum tlat, sum hmachhuana hna thawh ropui tak tak neih tuma insawi a mipui hip tum ran an awm avang hian kan ramah hian politics inbumna a lo thleng fo tawh ṭhin.

Chumi buma awm tawh mi­hringte chuan keimahni bawk kan intihrehawm tih hriain kan vote tlin hnu kan paih leh mai ṭhin a, kan vote tlin hnu paih leh turin tunah pawh hian kan inring ta a ni.

Congress khan NLUP an sem tak tak kha chuan an sum hmachhuan khan thu an sawi nasa a, nuai 1 kha hmun tam takah chuan an dawng tling (a pawisa a nih loh pawhin a hlutna zawngin) tak tak a, mipui khati zozai nuai 1 an sem kha chuan tla thei tawh lovah in ngaiin sum an hmachhuan a, mak tak maiin an tla thum dawp a ni.

Tunah hian cheng nuai 3 sem min tiamtu an sorkar mêk a, nuai 3 pek chu sawi loh nuai 1 pawh an sawi ri ngam tawh lova, 25,000 an sawi a, kum 4 dâwn sorkar hnuah nuai 3 tiama sum hmachhuantuten Mistiri thlà khat hlawh pawh tling lo sum sem hmanga mipui vote lei an tum ta mai hi chu an tih fuh ka ring lo.

Tangka sum ngainat hi sual tinreng bul a ni tih i hre thar leh ang u Zoram mipuite hian.

- Lalthanmawia