FIFA Congress report (Chhunzawmna) Aw, hnam zawng zawng leh chi tin ṭawng tin...

May 8-ah AFC Congress neiin Asia rama football hruaitu kalkhawmin ro kan rel a, FIFA committee sang ber FIFA Council-a Asia aiawhtu tur mi pali kan thlang a - Zhang Jian (China PR), Chung Mong Gyu (Korea Republic) leh Mariano V. Araneta Jr. (Philippines) thlan an ni. Anni pathum bakah hian 'hmeichhe quota' pakhat awmah Mahfuza Kiron (Bangladesh) thlan a ni bawk.

A mipa pathumte hi ka titi pui vek a, pa hawihhawm tak an ni hlawm a, South Korea Football Association President Chung Mong Gyu hi Hyundai Development Company-a an chairman ngat a ni a, mi hausa tawntaw a ni tih ka hre ve leh hnuhnawh a, kan inkawmlaiin chutiang hmel a pu lo a, a inngaitlawm hle a ni - Korean FA aṭangin thilpek ka dawng nghe nghe a ni!

FIFA development Committee member ni ta, Chinese patereuhte mai Zhang Jian hi Chinese FA lama Senior Vice President leh General Secretary a ni a, ani thlan tlin a nih theihna tur hian China hian theihtawp an chhuah a, tun hmaa an hruaitu hmasate pawh AFC-a an nihna aṭangin an inhnukdawk a, Zhang Jian tan hian kawng an sialsak hial.

Zhang Jian hi China-in FIFA World Cup a thlen ve theinna tura 'campaigner' ni thei tura an ngaih a ni a, khawvela mihring tamna ber ramin FIFA Council-ah hmun an neih tak avangin China hian FIFA World Cup an thlen ngei rinna a lian ta hle a ni.

Bazar-ah Maradona!

May 9 a ni a, hun thawl ṭha ka nei. Bahrain-a ka ṭhian neih ve chhun Hamza chuan chawchhun ei turin min rawn sawm chhuak a, ani hi banker a ni a, kum 2010-a IVLP programme-a USA-a ka zin ṭuma Bahrain aiawha lo kal ve a ni. Ṭhianpa Hamza hian BMW car M5 ngatin min rawn hruai a, India pawisaa nuai 120-170 man inkar vel a ni - car man ka sawi kher chhan chu hei hi Bahrain-ah chuan car 'danglam' a ni phak lo a, hei aia lirthei manto leh nalh hi an khalh fur mai - ram hausa an ni.

Tichuan, an shopping mall lian bulah thil kan ei a, shopping mall-a kan va tei hawi vel chu a chhuat zawl laiah artificial turf hi an lo phah a, 'FIFA' tih intar tam tak hmuh tur a awm a, mipui an zi nuai nuai a, naupang an lo inkhelh tir bawk a.

Ka han zawt chiang a, FIFA lamin mipui hmuh theihin footballer ropui Diego Maradona leh Ronaldinho-te an lo ko chu niin - mipui tam tak zingah ka va phei ve a, a kil hnai pawlah ka ṭang a, ka ṭhianpa ber lah football-a tui a ni ve si lo a, min hawsan mai turin ka chah a.

A tuk lawkah Maradona-te hi hmuh theihna remchang a awm dawn tih hre mah ila ka bazar-na hmuna Maradona lo kal tur hmu loa haw mai kha ka phal lo - Ronaldinho a la chhawm tel zui!

Maradona-te ṭhian dunin bazar (mall) an lo lut boruak chu a thanin a thang huam hi a ni ber a, mipui an au rual a, an zai a, an phu luih luih mai. Inkhelhna tur siam chawpah an lo lut a, ball an sep a, naupang an chhaih kual a, kha ringawt hmu tur khan Saudi Arabia aṭangtein an lo kal chu niin.

Mumang ram chu!

May 10 a ni. Tlai lamah Bahrain National Stadium lamah 'FIFA Legend Match' a awm a, hetah hian mumang ramah ka cheng. Ka naupanlai aṭanga ka 'hero' ka hmu a, footballer ropui rual bulah ka awm a, FIFA hruaitu lawk zingah kan titi a, khawvel ram hrang hrang football hruaitu leh footballer ropui ṭhinte zingah ka khawsa ve - hei hi keini football buaipuitu tan chuan mumang ram a ni.

He mi tlaia ka thil tawn hi Facebook lamah hetiang deuh hian ka ziak a, siam danglam leh paih erawh ka nei:

BUL TANNA TREZEGUET

Stadium ka lut a, dressing room luh dawnah David Trezeguet a lo hawi heu mai!

Ka va kal hnai a, ka titipui a, kum lama ka rualpui a nih thu leh Euro 2000-a Golden Goal a score chungchangte ka sawi a, a nui ve suk mai! Ram tana World Cup, European Cup champion a nih bakah French League leh Italian League champion kawp thei ngat a ni.

MARCO! MARCO!!

Dressing room aṭangin Stadium ka lut chho dawn, ka hawi phei chu suit nena inthuam zar mai, pa inkhaithli nalh tak ka hmu - ka mitvai lah a ni si lo, aw, ka 'childhood hero' Marco Van Basten ngei a ni.

"Marco, Marco," tiin ka au a, a nui a, thlalakpuiah ka sawm nghal a. 1988 Euro­pean Cup final-a USSR lama a goal ropui vanga ka au rinzia leh ka naupanlaia ka 'hero' a nih thu ka hrilh. India aṭanga kal ka nih thu ka sawi bawk a, ka hmel a en a, Indian ang lo min tih hmel hle.

Dutch pachal, AIFF Technical Director hlui leh Netherlands team lama a thawhpui tawh Rob Bann hnena a chanchin ka zawh ṭhin thute, "Van Basten-a training lai kha ka en chak ṭhin a ni," tia Rob-a ka lo hrilh tawh thute ka sawi chhuak.

Ajax tana game 133 leka goal 128 a thun hnua AC Milan tana goal 90 thuntu player ropui hian a ram tan goal 24 a khung hman a; nimahsela vanduai thlak takin kum 28 lek niin inhliam vangin football a chawlhsan hma hle.

European Player of the Year vawi thum ni thei, FIFA Footballer of the Year hlui, FIFA Player of the Century an thlana parukna ni phak kha a ni a, ka naupanlaia ka ngaihsan em em a ni bawk nen, ka va han lawm tehlul em! He pa ropui hi Dutch League-ah top scorer vawi li a ni a, Italy lamah pemin vawi hnih chu top scorer a ni.

1988 European Cup final-a USSR lama a volley goal kha football khawvel goal ropui ber pawl a ni reng tawh dawn a, best player nia top scorer a nih mai piah lamah mihrang Johan Cruyff meuh pawhin a tih theih loh Netherlands chu major tournament-ah a champion pui thei.

Van Basten ka chibai a, kan inkawm thei a, zanriah kan eina lamah Champions League inkhel kan enho leh a ka bulah chiah a ṭhu nghe nghe - hmeichhe tleirawlin an star an hmuha an khek chiam ang hian khek ve ta ni ila, FIFA Dinner hall khawk rum ruma khek tur ka ni ve ang - 1988 European Championship final-a a goal thun kha ka lo au pui tawh tlat a!

Mak deuh mai chu a tûk, May 11-a FIFA Congress luh dawna thingpui/ coffee/ juice in tura kan intlarin ka hma pathumnaah a ding a, chhuna lunch ei dawnah ka hma chiahah a ding zui.

NO CAMERA, NO NO NO!

FIFA legend zinga mipuiin an bawr bik a awm a, chu pa chu Diego Maradona a ni.

May 9 khan Bahrain-a mall pakhatah Ronaldinho te nen football an pet tawh a, ka hmu tawh. Ka bul lawka a lo kal chang pawh a awm a, ka hmu hnai thawkhat.

May 10-a Bahrain Stadium chhungah hi chuan FIFA Congress Palai leh sawm bik mi tlem te chauh luh phal a ni a, Maradona nen pawh inhmu hnai deuh turah ka inngai sa hrim hrim - a khawih pawh ka khawih ngei e!

Maradona nge nge chu an bawr luih luih reng a, mahse thlalakpui a duh tlat lo, "No Camera, no no no," a ti tlat a, thlalakpui a phal chuan an bawr nasa zual dawn tih a hria.

An inkhel ta a, a tlan thei tawh lo tih a chiang a, mahse a la thiam takzet. Cafu leh Valderama-te nen an tangho bawk a, a la pass kual nalh thei hle - kei aiin a thiam zawk mah awm e!!!

Inkhel chawlh laiin ka va pan a, a bul chiahah tak tak hian ka awm a, thlalakpui a duh miau loh avângin tumahin an lakpui thei lo.

Midang inkhelh laiin a ṭawng reng a, a titi a, a au a, a phawk hmel hle.

A bulah, a hnung chiahah ka ding reng a, 'Maradona bula din a khat alawm,' tiin a thla pawh ka la nual mai - thlalakpui tak erawh a rem ti miau lo a, kei leh FIFA Congress Palai tam tak chuan Maradona chu kan 'chang chhuak' zo ta lo. Amah hruaitu leh vil tlattu a agent chuan hrethiam turin min ngen a, ka hrethiam ta mai e!

Tui a in a, tui in zo chu a rawn theh a, ka kawr leh kekawr ṭhenkhat a theh huh a, Maradona a nih miau a vangin ka thinrim lo - a hauh pawh ka hau lo!!

HELLO MR PRESIDENT!

1970-a piang, football khawvela 'thu ber' Giovanni Infantino chu Stadium a lo lut a, inkhel turin a rawn inthuam sa thlap a, a nui sang a, a zangkhai em em a.

Ka zawn a lo thleng a, "Hello Mr President," tih pahin ka lo selfie pui a, a nui var var a, kei pawh ka nui vur vur!

UEFA General Secretary hlui hi February, 2016 aṭanga FIFA President ni ta kha a ni a, FIFA thianfaitu an tih mai a ni.

Switzerland rama piang, thisen lama Italian ni lawi si a ni a, ṭawng chi hrang paruk zuk han thiama mawle!

Zanriah kilna lamah Champions League kan enho leh a, a hrapain thlate kan lakpui leh lawp lawp bawk.

A DANGTE CHU....

Player langsar tak tak an awm - Ronal­dinho chu kan hria a, ani hi mipuiin an lawm ber pakhat a la ni a, FIFA Congress Palai rualin thla lan lakpui nasa hle. 'El Pibe' an tih ṭhin South American Footballer of the Year vawi hnih ni tawh Carlos Valderrama leh Brazilian player ropui Cafu, African football thiam Jay Jay Okocha te pawh thla ka lakpui thei a, ka nihlawh khawp mai.

Croatian 'patriot' player danglam Zvonimir Boban ka hmu zet chu ka va lawm tak em! A vanglaia ka duh em em ṭhin a nih piah lamah a chanchin chhiar ila, Croatia a hmangaihtu dik tak a ni a, Croatian fan kutthlaktu Yugoslavia police pawh kut lo thlak lêt ve siah tawhtu a ni.

A hunlaia ball thiam danglam bik, nau­panlai chu sawi loh a tleirawl thlenga football pangngai khel mang lo, futsal kan tih ang aṭanga inzir Dejan Savicevic nen thla kan la bawk a, European champion a nih piah lama player thiam danglam a ni - hmu ve hman lo tan YouTube lamah zawn chi a ni ang.

Mexican goalkeeper lawm hlawh, 1994 leh 1998 World Cup-a kan hmuh Jorge Campos; Real Madrid tana vawi 250 chuang khel thei khawpa thiam Michael Salgado; Argentine player hmuhnawm Pablo Aimar bakah referee hmingthang ber mai Pierluigi Collina-te pawh thla ka lakpui hlawm a, a nuam ka ti hle.

Rorel inkhawm

May 11 a ni a, FIFA rorelna sang FIFA Congress chu kan ṭan dawn ta. A hmun kan thleng a, ram 211 aṭanga kal khawm tih takah a dum, a var, a eng chi hi kan kim hle mai a, ka sawifiah thiam dan ber chuan, "Khawvel kan kal khawm e," tih a ni mai.

Ṭan hmain thingpui/ coffee/ juice leh chhangte in leh ei tur a awm a, a ṭhenin thla an la sap sap bawk a, ram tin aṭangin kan kal khawm. A ṭhen chu football inpui nia inchhal England aṭanga kalte an ni a, football thiam Brazil leh world champion Germany aṭanga kalte an awm. Football thiam lem lo ram tenau deuh deuh pawh an kim a, Pacific Ocean leh Indian Ocean chhehvela thliarkar tereuh te te pawh hi 'ram' an nih vek avangin aiawh an tir vek a, 'kim lo ban phar tur' an awm miah lo!

Rorel kan ṭan a, FIFA president-in, "A pawi­mawh ber chu football hi a ni," tiin thiam takin thu a sawi a, a football ber theihnghilha rorel chiam mai a rem ti lo.

Inkhawmpuina hmunah a hranpaa thusawi tura dil/ ruat an nih loh chuan thusawina hun an hawng lo. Screen lian takah engkim video leh power point hmangin an tilang a, chumi hnuah an sawifiah a, tichuan iPad kan kawl ṭheuh hmangin vote kan thlak ta zel mai a ni.

Ngaihnawm tak mai chu Palestinian FA leh Israel FA inhnial a ni. Palestinian FA lam hian FIFA Council-ah an rama Israel-te'n football an khelh chu dan lo a nih thu thlenin FIFA Congress-a thusawi an dil. Palestinian FA president Jibril Rajoub hi an ram hruaitu zinga mi a ni, thu a sawi thiamin football piah lam politics-te a sawi tel a, Israel a dem. Muslim rama inkhawmpui kan ni a, Muslim ram aiawh ṭhahnem tak an tel bawk nen kut an beng hluah hluah mai; nimahsela Israel FA lamin thusawi ve an dil a, an sawi zawhah FIFA president-in thiam takin he buaina hi FIFA Council hnena dah turin vote lak a dil a, FIFA Council chinfel turin kan dah ta a ni.

Kan thurelte chu heta ziah lan ngai loin 'news' lamah a lang vek tawh a, khawvel media lian an awm kim thawkhat bawka a darh nasa tawh a, kan thual nawn tawh lo ang.

Ṭialthawnga-te inkhel ena sei lian, naupan laia Chhakchhuakvunga thiam ti em em ṭhin, tun hnua Jeje leh Danmawia-teho buaipui ṭhintu tan chuan Maradona-te bula awm a, FIFA president ruala zanriah kil a, Van Basten 'ngat' a taka hmuh chu sawi tur a va tam em!

Aw, hnam zawng zawng leh chi tin ṭawng tin... an kimna hmasa chu FIFA Congress hi a lo ni e.

- Lalnghinglova Hmar (Tetea) Honorary Secretary, MFA