Ran leh thlai lak luh

Mizoram hi kan intodelh lo a, ei leh in tur state pawn aṭangin kan lalut nasa hle. Hengte hi kan nunna atana thil pawimawh a nih avangin, kan intodelh hma hi chuan kan la lalut zel ang. Tuna sawi ka tum tak chu ran vulh tur leh pangpar eng ila vel kan lakluh hi a ni.

A duh leh thei apiangin Mizoram pawn aṭangin ran vulh tur, a bikin ui leh zawhte te kan lalut a, chu mai bakah sap pangpar leh Mizorama awm ngai lo pangpar te, thing te kan lalut a, Mizoramah kan phun a. Kan intihhmuh a, hetiang nei thei nih hi kan tum a, mi ta kan lei chhawng a, kan phun a, kan vulh ṭhin.

Hetiang, ran vulh tur leh pangparte kan lakluh kawngah hian thuneitute hi an fimkhur a ngai hle. Ecology-a thil pawi tak thleng ṭhin pakhat chu Alien Invasion an tih hi a ni. Ram pakhata awm ngai lo thil an lakluhin an rama nungchateah nghawng ṭha lo nasa tak a nei ṭhin a, an ram sum leh pai tam tak an hloh phah hial ṭhin. Hemi kawngah hian sorkar lam hi engmah a nih loh hmel a, hlauh nachang pawh hre lo khawpa thil hre lo niin alang.

Ui leh ran dang hi a duh apiangin an lalut mai a, hetiang ran lakluh hi AH & Vety hian an vilpuiin, an control em le? Khawchhak lam aṭanga vawk leh bawng tawlh thlakte hi chu an hre na meuh mai a, amaherawhchu in chhunga vulh tur kan lakluh kawngah pawh an ṭhanharh a ngai. Mizorama ui leh zawhte kan vulhten natna an hriat ngai loh pai ran kan lalut palh ang a, chu chuan kan rama rante hi a suat mai ang tih a hlauhawm. Natna chungchang hrim hrim bakah hian ui leh zawhte vulh tura Mizorama lakluh chungchangah hian AH & Vety emaw, hemi kawnga thuneitute hi khirh deuh teh se, zo ui thlahpawlh loh lak tur pawh a awm tawh mang lo a nih hi.

Pangpar lam hi milian nutena an buaipui a ni a, mi tam takin eizawn nan pawn an hmang. Amah­erawhchu khuah­khirh loh leh enfiah awm mang loa an duh ang ang an lalut ringawt mai hi chu hri laka kan ram pangpar leh thlaite a him lo ang tih a hlauhawm hle.

Mizoram pawn aṭanga lakluh turah hian kawng hrang hranga enfiahna paltlang chin chauh lakluh a nih theih nana hma lak a ṭha.

Mizorama thil awmte humhalh kawng­ah hrim hrim hian sorkar hi a chak loh mai bakah hetiang hi a hrethiam lo emaw tih mai tur a ni. Ram pawn aṭanga duh ang ang ran leh thlai lakluh hi nakin zelah Mizoram tan a pawi thei tihte hi an ngaihtuah ngai miah lo a nih hmel. Sorkar hi harh se la, Mizorama tualṭo leh awm sate humhalh nachang hi hre teh se.

- Lalhlimawma Ralte