LABOUR CESS LEH LABOUR BENEFICIARIES
Labour Cess chungchang leh Labour Beneficiaries chungchang-ah hian sawi tur tam tak ka nei v e a, sawi vek sen erawh a ni dawn lo. Tlem azawng ka rawn sawi ang a, heng baka hre chiang duh leh puih ngai kan awm a nih chuan theih ang anga inpuih kan tum dawn nia.
Labour, Employment & Industrial Training Department hnuaia din Mizoram Building & Other Construction Workers Welfare Board-ah "Contractor zawng zawngten Labour Cess 1% (zaa pakhat) an chhunglut tur a ni" tih a ni a, he pawisa hi building leh a kaihhnawih a inhlawhfa ten hamṭhatna hrang hrang an dawn theih nana hman tur a ni.
He dan hi central sawrkarin a ruahman a ni a, India ram state hrang hrangah kalpui niin Mizoramah pawh kalpui a ni. Building leh a kaihhnawiha inhlawhfaten hamṭhatna an dawn theih chi hrang hrang hi dawng pawh an tam tawh a, ṭangkaipui pawh chhungkua leh mimal tam tak an awm tawh.
Welfare Board dintirhah hmalakna a chak ṭha viau nain mipuiin an bawh nghal lem lo a, thawktute ṭhahnem ngaihna a nasat em vangin members pawh sing chuang an awm tawh. 29 May 2016 ah thuneitu inthlak niin hmalak a harsa ang reng viau a, Department officer hrang hrangte kutah thuneihna hlan ni mah se mahni hnaah an buai avangin duh angin hma an la chak thei lo. Welfare Board a beneficiaries inziaklut thar an tlem a, inziak lut tawh renewal ti turten harsatna nasa tak an tawk bawk.
Labour Cess pawh ahmaa Welfare Board a chhunluh ṭhin chu Department officer-te kutah thuneihna (collector) hlan a nih tak avangin mi tam tak tan cess chhunluh awlsam phah viau mahse notification hre ve loten harsatna an tawk nasa em em thung. District hrang hrangten mahni chhunluhna tur hmun chiang tlang ila chu awmsam tak tur erawh a ni lawi si.
Contract hna thawk zingah kawng hmang hre lo ve tak tak tam tak an awm ve ṭhin a, heihi chu khawvel ken tel a nih avangin tumah ka dem lem lo. Heng harsatna tawkte hi engtik lai pawhin ka pui thei tihhi kan zep tel hram a nge.
Department hrang hranga kan hotute pawh hian mahni hnuaia contract hna thawk turte hi thil tih ngai ang angte hrilh hre zel thei i la. Contractor-ten hna an thawh dawnin enge contract hna thawk turin neih ngai a, enge tih ngai tihlam kan ngaihtuah lo tlangpui niin a lang a. Contract hna thawk turte chuan hna an thawh hmain BOCW-ah registration an tih a ngaih thu hi contractor zaa sawmkua pakua (99%) velin an hre lo niin a lang bawk. Mizo chhawr tur chuan Contract Labour Licence a neih a ngai a, hnamdang chhawr tur chuan Inter State Licence a neih a ngai tih pawh hre lo hi atam zawk kan ni. Ni e, hriattirna lam chak loh/ ṭhat tawk loh vang pawh a ni thei tho mai thei e.
Member inziaklutten mahni chanvo hamṭhatna an dawn tur ang an dawn zel theih nan ruahmanna ṭha siam a ṭul tak zet a, renewal ti turten kal manah senso a hautak avangin kuthnathawka eizawng tan chuan Aizawl, Lunglei, Siaha leh Champhai pan mai a harsa tak zet, heng mite harsatna sukiang tur hian Field Assistant te anmahni hna thawkin buaipui theih nise chuan thil a awlsam hle tura ngaih a ni bawk.
Welfare Board siamṭhat a nih tur thu thuneitu lamin an sawi a, siamṭhat a nih hunah chuan tuna harsatna tawk tam tak te hian harsatna an tawk tawh lo turah ngai i la, field a thawk tur pawh indahin awlsam taka thil tih zung zung theih a nih tawh beisei bawk i la a ṭha awm e.
- C. Lalremmawia