Financial Secretary nge, Finance Secretary?

Kan Missionary Sapten kum 1935-a YLA (YMA) min dinsak khan hotute nihna hetiang hian an ziak a - Preseident; Vice President; General Secretary; Assistant Secretary; Treasurer; Financial Secretary. Tun hnai deuh aṭang khan YMA chuan Financial Secretary chu Finance Secretary, tiin a thlak ta a. NGO dangte pawh hian an ti ve ta deuh sup sup a. Missionary Sapho tih kha a lo dik lo a ni tih hre thar thut ta ang maiin an thlak ta hmiah mai a, tu rawt chhuah nge tih phei chu ka hre lo va. A hman apiangin English Medium School kan din a, heta ṭang hian Sapṭawng dik zawk kan zir chhuak ta em tih erawh ka hre lo va.

Mizote hian a dika dawk pawh thlu lova mi tihdana tih ve mai pawh kan duh ve zel mai dawn en ni ang? Webster’s Encyclopedic unabridged Dictionary of the English Language hian engtin nge a hrilhfiah i lo en teh ang.

Finance : The management of Revenue; the conduct or transaction of money mathers generally, especially those affecting the public, as in the fields of banking and investment.

Financial : Pertaining to the receipts and Expenditures, pertaining or relating to money matters, pecuniary, financial operations.

Cambridge School Dictionary-ah chuan hetiang hian a sawi.

Finance : The control of how large amounts of money should be spent.

Financial : Relating to money or how money is managed. (a financial adviser)

Heng Dictionary pahnihte hrilhfiah dan hi chuan kum 1935-a a ṭawng neitu Missionary Saphovin an lo hman kha a dik zawk a ni tih a lang. Anni ai chuan an ṭawng chu kan thiam zawk lovang, an rama an hman dan pawh a nih ngei a rinawm.

Mizo chuan Sapṭawng ang deuh,

Sapṭawng dik ni miah si lo hman kan nei nual mai. A thawh dik loh avanga a dinhmun an dah hniamsak sawrkar hnathawkte hi Mizo chanchinbu mite chua ‘promodown’ an ti mai ṭhin; Mizo mipui pawh hian a dik emaw tiin kan hmang ve ta zel mai a. Bus-a ka chuannaah Mizo pa, chinchang hriat hmel tak hian mi pakhat an promodown thu tih tak zetin a sawi a. Chanchinbu mite Sapṭawng phuahchawp chu a dikah pawmin, a hmang ve hmiah mai tih a hriat hle. Mahse, Sapṭawngah promodown a awm miah si lo. Heng thumalte hi a rem dan azirin an duh duh an hmang. Demote, declass degrade, disrate, downgrade, kick downstairs, relagate, depose, unseat, displace, oust te hi.

English Medium kan din sup sup a, naupang dang an ban hnu-a naupang an hren khawtlaite hi stay back an ti tlat a. Stay Back an hmanna dik tak chu Titanic lawng keh chhiat khan lawng aṭanga chhuah an tum ṭheuh va. Lawng sipaite khan chhuah tum tam takte kha lo la chhuak rih lo turin a hrilh nasa a, chhuah luih tum pakhat phei chu a kah hlum hial kha. Katah khan lawng sipaiin ‘stay back’ tiin a vau a ni. Kha kha an hman dan dik tak chu a ni. Keini ramah chuan a dik lovin kan hmang fo mai. A ṭawng neitu Sapho chuan naupang an hren khawtlaite chu ‘stay on’ an ti; an hman lai hi hmang ve ila English Medium School-te pawh hian kan hmang dik ni mai tur.

Naupangte hi Sapṭawng kan zirtir hian zawhte tihna chu cow a ni ti ila, a dik emaw a ti tho ang a, mah se a dik si lo ang chauh hi a ni. Pawi tak a ni, pawi tak. Bus-ah Mary Mount Skul naupang ka bulah a ṭhu a, “Pawl eng zat nge i nih?” ka ti a. Ani chuan, “Pawl ruk,” a ti a. In Miss-ten an stay back tawh che em? tiin ka zawt a. “Kan pawl pumpui min stay back tir tawh,” a ti a. Mary Mount School-ah te meuh pawh stay back chu an lo hmang a ni tih ka hriat phah a. Naupang dang ban hnua ṭhenkhat an hren khawtlai hi chu an dictionary-ah pawh an ziak chiang hle. I lo en lawk teh ang.

Stay on = continue to study, work or be somewhere after others have left.

Mizo chuan underpant pawh kan nei, underpant chu ‘thaw huam huam hnuai’ tihna a ni. Sapho chuan underpants an nei a, chu chu kekawrte tihna a ni.

Financial year pawh hi Finance year ti law law mai ila. Financial Assistance te pawh hi Finance Assistance ti tawh mai ila, a ṭha kan ti emaw chu! Zirtirtute phei chu English dictionary aṭang hian a dik leh dik loh i inzir thar reng ang u. A dik lo naupang kan hrilh hian a nghawng thui hle a ni.

- Isaac Zoliana