Aw a har ka ti mang e!
Chanchinbu-ah te leh TV lamah te kan lo hmuh ṭhin angin “2018 Mizoram Legislative Assembly (MLA) inthlan lo awm tur chu Congress ni lo, MNA ni lo thlang tling ve tawh ila” tihna boruak chu thawm lian takin a kal mek niin alang a.
Mizoram hian khawvel ram dang zawng aiin a ṭha lamah danglamna bik kawng thumin kan nei a. Sakhuana lamah Pathian thu sawi tam ber leh ngaihtuah ber kan ni. Politics lamah ni se, politics ngaihsak ber, thingtlangpa emaw, nu emaw pawh ni se ngaihdan nei ve deuh ngat vek kan ni. Mawl te te tih ngawt theih an ni bik lo! Tlawmngai pawl ni se tlawmngai pawl lian ber YMA nei ngat kan ni. YMA hian ram leh hnam tan faktlakin hna an thawk ṭha a ni. Hlemhletna (corruption) hi duha ram kan awm lo chung hian engati nge maw corruption hi a la tam viau reng mai si hi le? Aw a har ka ti mang e!
PRISM hian corruption do thu hi ring tawk tak chuan an rawn tlangau pui ngei mai a. Department engemaw zat sum tihchingpen te pawh an rawn hai chhuak tawh a; mah se eng ruai a ang tak tak thei lo chu a nih hi! Aw a har a ni!
ZONET TV buatsaihin Mizoram politics leh 2018 MLA inthlan lo awm tur chungchangah mi sawm bik engemaw zatte nen sawihona ‘forum’ te a rawn buatsaih a. A bengvar thlakin an thusawi a ngaihnawm hle mai. Neutral tak rilru pua lo ngaihthlak chuan sawrkar thar hlak siam an duh niin a lang.
Amaherawhchu, Mizoram politics-ah hian kum tam tak chu party system hmangin kan lo kal tawh a. Hei hi vawi leh khata tih bo mai theih chi a ni lo. Inthlannaah chuan kut ke neih tam a ngai, fing leh fing lo te vote a intluk vek. Candidate te’n mahni aiawh zo ngei tur khaw tinah neih a ngai. Sum pawh tam tawk i neih ve a ngai; i khingpuiten sum an ngah a, i ngah ve si loh chuan i tling zo lo ang.
Ṭhalai tlimpui hi inthlanah chuan sum hmuh beisei vek an ni tawh - hei hi ka chiang, ka tawn hriat tawh a ni. MPF hian a langa paua sum chelek chu engemaw chen chu an khuahkhirh thei. Mahse puan hnuai thiltih chu a hre thei bik lo - aw a har a ni!
Khawpuia chengte hi chuan mi ṭha leh ṭha lo chu kan hre thei deuh hlawk tawh a. Neutral rilru pu tak tak pawh an tam mai. Mahse constituency tam zawk leh Unit tam zawk hi thingtlang lama awm an ni si a, vote pawh a tam. Helamah hian ṭanlak nasat a ngai.
Pu Sangzuala, Congress khan Pu Hawla Congress ai chuan candidate pawh an nei ṭha zawk a, mah se inthlan an han ‘fight’ tak tak kha chuan khaw tam takah iptepui banna tur pawh an hriat tak mang loh avangin engmah an ang ta lo a nih kha! A har asin!
Third Front a piang dawn em ni? A piang dawn a nih ngai chuan party tenauho zawng zawng nen an ṭanrual a ngai, ‘Union (Unity) is strength’ tih a ni si a. Bel keh phuar khawm tui pai thei lo ang nih erawh a hlauhawm ang. Aw a har ka ti mang e!
- J. Sawilaia