'HOCKEY GROUND-AH I HMANG ANG U' TIH HI...

Vanglaini June 12&13, 2022 chhuakah khan Pu Vanhmingliana (Dawrpui) in, "Assam Rifles ram luah hi" tih chanchin bengvarthlak tak chu a rawn tarlang a. Assam Rifles chanchin lam chu sawi zui lovin a ziaktu duhthusam pakhat kha han duhpui emaw han sawizuipui hi ka phur mai ni lovin a ṭul tak meuhin ka hria. Chu a duhthusam pathumna chu: "Football Ground-ah hmang lovin Mizote pian leh thiamna mil Hockey Ground-ah i hmang ang u" tih hi a ni.

A ni taka Zoram buai (1996) hun hma lam kum 20 zet chhungte khan National Game Semi-Final thleng zak zak thei Assam Hockey Team tihmingṭhatute kha Mizo tlangval hlang an lo ni tawh ṭhin a. Chutiang bawkin Assam Regiment Centre Hockey Player-te pawh Mizo tlangval deuh vek an lo nih tawh ṭhin kha.

Mizoram (Mizo District) chhungah ngei pawh Project Cup (Inter Block) Championship siam niin Zoram pumin a tuipui hle. Inter High School Sports-ah pawh Hockey Game khan hriat a hlawh ber ṭhin. Mizoram Olympic Game-ah pawh khan hriat hlawh ber leh lar ber chu Hockey Game tho a nih ṭhin kha.

Hockey Game tana harsatna

Khawvel hmasawnnain a rawn ken tel pakhat chu Hockey Ground-ah phul lem phah (Astro Turf Ground) a lo ni ta hi a ni. Hetiang Ground-a Hockey Game khelh nan a bika siam Hockey Stick neih a ngai a, a to bawk si. Phul lem phah nan leh a kalpui buatsaih nan cheng vaibelchhe 5 aia tlem lo a ngai bawk.

Netherlands ramin Astro Turf Ground 400 an neih tawh khan India chuan pahnih/ pathum chauh kan neih renrawn lai a awm. Kan State tan chuan beisei phak a la ni lo. Hockey Game-in harsatna bang pakhat a neih leh chu khawvela game tam takte hi Professional Game niin an player-ten an club aṭangin hlawh an nei. Hockey game erawh chu Professional game a la ni ve lo. Chuti chung chuan ngaih pawimawh em em, National Game hial a la ni reng bawk si.

Aizawl ngeiah Astro Turf Hockey Ground

Pu Vanhmingliana duhthusam chungchanga ka sawi zawm duh tak ka thlen hmain ka sawi duh tak tichiang thei turin hriat atana ṭulte ka han dap kual hmasa a ni.

India ram pawh sawi loh aleng, International Competition te chu Astro Turf Ground-ah vek an khelhna a rei ta hle.

a) Hockey Game-a hmasawn zel duhna avangin North East Sports-te thleng turin State khawpui bera neih a ṭul tlat.

b) Mizoram Inter District Championship neih nan Aizawl lo chuan harsatna a nei. Astro Turf Ground awmna a nih vangin Kawnpui leh Thenzawl khua ten an thleng pha lo.

c) National Age Group Competition - Under 14 years, Under 18 yrs leh Junior thlengin thlen ve a chakawm ṭhin hle. Aizawl khawpuiah Astro Turf Ground a awm tlat loh avangin sawi thu a cheng lo a nih hi. Aizawl-ah ngei phul lem phah Ground a awm chuan thlenna remchang leh Hotel an awm a. Ei leh in tur lam khawm pawh a harsa lo bawk. Tin, Medical attendance bakah hospital ṭha tak tak mamawh huna pan tur a awm bawk.

Astro Turf Hockey Ground remchang

Aizawl khawpui ngeiah Hockey Game tan phul lem phahna tur hmun kan lo en tawh ṭhin a. Hmun ṭha bera kan hual chu Lammuala Football Ground hmar lam A.R Cinema Hall awmna vel saw kan lo teh ṭhin a, harsatna awm lovin Hockey Ground a leng thei. He hmun hi hun hmasaah pawh khan Mizoram Olympic Committee-ah pawh sawiho a lo ni tawh.

Tleirawl-tlangval lai pawha Lammuala Hockey Game en ṭhinna hmun ngeia phul lem hring mawi takah Hockey Game han en leh a chakawm hle. Rual u zawkte lunglen a kai tho ngei ang. Ṭhalaite pawh he hmun mawi tak leh game hian a hip ngei ang.

Astro Turf Hockey Ground lunglentute thusawi

a) Kum 2000 khan North-East mipa tleirawlte Exhibition cum Hockey Training nei turte Barcelona-a hruaitu-ah ka awm ve a. Barcelona Junior vs N.E Boys inkhel chu Pu K. Lalthlengliana Sr. Hockey Coach (tuna Kolasib District SPO) chu umpire a ni.

Barcelona Junior leh kan naute an inkhelh zawh chuan Pu Thlenga chu a hawi kual vel a, "Sir. Ka damchhung hian hetiang ang ground hi kan ramin a nei ve awm si lova, thi tawh mai ila" a han ti tawp mai chuan rualawh a natzia a tilang chiang hle.

Thil mak tak chu, Pathian zarah vanneihna kan dawng tlat - Pu Thlenga ngei chu Mizoram Astro Turf Hockey Ground hmasa ber tur bulṭantu leh a enkawltu a ni zui ta bawk.

b) Kum nga(5) dawn kal tawhah khan Lammual hmar lam (AR Cinema Hall Area) kan en lai chuan Pu F. Lawmkima, Sr. Hockey Coach, Sr. Vice President chuan, "He lai hmunah ngei hian phul lem phah hring mawi tak chu ka dam chhung ngei hian hmuh ka va chak em," a lo ti tawh bawk.

Kan Sorkar hian Aizawl khawpuiah ngei Astro Turf Hockey Ground hi Zoram hian a mamawh tih hi min hriatpuiin kan hria. A hlawhtlinna min buatsaihsak ngei turin Hockey Game lovers-te hmingin ka ngen a, beiseina nen kan lo nghak e.

- Capt. Hmingdailova Khiangte IPS (Rtd) Honorary Life President Hockey Mizoram