Champion Nomawi Lawmna Hla
Mizo te hi hla sak uar tak kan ni a, Pathian fakna leh chawimawina lam hla tha tak tak kan ngah viau mai a. Hla lenglawng, ram ngaih hla, nula tlangval inhmangaihna lam hla te kan nei nual a, chutih laiin Birthday lawmna hla kan han nei leh a, Inneih lawmpuina lam hla kan nei leh a, zirlai pass lawmpuina lam hla pawh kan nei leh ta zel a. Chutih laiin infiamna Champion lawmna hla hi kan nei lo hle thung a, Champion team leh an fan te pawh mual sirah emaw, hawn kawngah pawh kan sa rak mai mai a, ṭhenkhatin 'Pi buh deng Pi buh deng' te an ti mai mai a. Heti taka infiam uar, Football leh a dangah pawh Champion tamnaah hian Champion lawmna hla kan nei lo hle mai.
Kan naupan laiin Champion Nomawi lawmna hla hi kan sa ṭhin a, tlar hnih khat emaw lek hi ka la hria a, upa deuh ka zawh apiangin an hre tawh lo va, hriat chhuah tumin hun rei tak ka bei a. Dt.19.11.2019 tuk khan kan kawmchhak lawkah Pu Pc.Lalbiaka kum 77 miin a lo hre chhuak hlauh mai a, ka ziak ta a, kan sa dun a, ka lawm hle mai a, inkhelh Champion apiangin mualah leh mual aṭanga hawn kawng Motor-ah tea sak ṭhup ṭhup thin ila, a inhmeh hle ṭhin dawn a ni.
Tichuan, a phuahtu ka hriat mai loh avangin, a phuahtu ka zawng leh ta a. Pu Biaka hian chhimlam aṭanga lo chhuak nia a hriat thu a sawi a, Mampui khuaah Champion Nomawi lawmna hla phuahtu a awm thu ka hriat avangin ka chhui chiang ta a. Mampui khuaah hian Champion Nomawi lawmna hla chu phuah ve mah se, he hla kher hi a phuahtu an hriat thu an sawi lo va. Tichuan ka chhui zel a, Pu Sangkhuma Hnamte (L) Hnahthial Bazar farnu Pi Zamuali pasal Pu LP. Lalnuaia Hnahchang khawmi phuah a ni tih ka hre ta a, ka han chhui chiang zel a. Rev.C.Ngurhnema Hnahchang khaw chanchin ziaktuin a hrechiang ber ang an ti a, tichuan Rev.C.Ngurhnema chu ka zawt chiang ta a, ani chuan chiang takin min hrilh ta a ni.
He Hla lo chhuah dan – Kum 1958 March ni 6 khan Hnahthial khaw bul Thiltlang khua-ah Lalruata Volleyball Cup Tournament buatsaih a ni a. Pu Lalruata hi Pangzawl khua, sipai bang a ni a, a Tournament Trophy hi a sipai tanna hmuna Pistol kah thiam lawmman niin an sawi. He Tournament-ah hian CI Bial pawn aṭangin Hnahchang khua pawh an tel ve a, chuta team telte chu :- Thiltlang, Rawpui, Khawngbawk, Pangzawl, Hnahthial, Hnahchang leh Aithur te an ni. Pu LP.Lalnuaia chuan an Champion ngei dawn tih hriat lawkna nei ang hrimin Nomawi lawmna hla a phuah lawk a, vanneihthlak takin an Champion ta reng a, final khelh zawhah mual chhungah ṭingṭang kenglutin an sa nghal a, Nomawi chu an lampui ta chiam a ni.
Tichuan hemi hnu hian Khawhri-ah Volleyball Tournament lian kum 1960 vel khan a awm ve leh a, chutah chuan Aithur khua an tel a, an Champion ta nghe nghe a, khaw dang la hriat ve loh, he hla hi an sa a. Tichuan Khawhri khua leh helai vel khaw hrang hrangten he hla hi an lo hre ve ta a ni. Keini pawhin kan naupan laiin kan hre ve riai ruai a ni.
Aizawl-ah pawh hian tun thleng hian Champion Nomawi lawmna hla hi a la lar lo hlein a lang a, sipai lammuala Football Champion an awm ṭumte hian lawm dan kan thiam lo fo ṭhin. Tun ṭum MFA buatsaih Inter Village Football Championship-ah te hian Champion tura inringte chuan lo inzir se la, Champion team te chuan inkhelh zawh veleh mualsirah sak ṭhup ṭhup a inhmeh hle ang.
Pu PC Lallunghnema Hnahthial Bazar vengin a thluk (Solfa) min dahsak a, a dik turah kan ngai.
1. Chang khawpui mualmawiin val kan ngir e,
A chhingzo khuavel awm tak ang maw ?
Chhak thlang chhim hmar van hnuai kan thang leh ta,
Champion val Nomawi latu kan ni.
Thunawn
Thanlai hawl sang lur lur e chhimtlanga’n,
Chhim thlipui iang vangkhaw lengdang tawnah;
Champion val Nomawi latu kan ni.
2. I lawm ang u,i chawi sang zel ang u,
Vanhnuai hril Dhyanchand party iangin;
La nu leng leh hrinhniang naufa zawng nen,
Champion val Nomawi i lawm ang u.
3. Khuarei kumsul puan ang lo thar mah se,
A chhingzo an awm leh hlei lawng e;
Thlangsappui leh chhaktiang val pawh chhaii,
Hip Hurray ka ban ka phar lawk e.
: m.r Ṭ d : d / d.m : r .d Ṭ l, : s, / s, .s, : s Ṭ l.s : m.r / d .m : r Ṭ–: -
/ m.r : d Ṭ d :d.m / r.d : l, Ṭ s, : s,.s, / d .d : t,.s, Ṭ m.r : d /–: -
Ṭ d.m : s / l.s : m.rṬ d.m : r /–:–Ṭ m.r : d / d : d.m Ṭ r.d : l, / s,
: s,.s, Ṭ d.d : t,.s, / m.r : d ṬṬ
Hla thu sawifiahna
“Chang khawpui” Chang khawpui tih hi Hnahchang khua sawina a ni mai a, lam thum (Sylable thum) a ni a, Aizawl tan chuan Zawl khawpui tih mai tur a ni a, Lunglei tan Leitlangpui tih leh mai tur, chutiangin khaw hrang hrangin mahni khaw mila an phuah mai thu Pu Biaka hian a sawi.
“Dhyanchand party”– Hmanlai chuan India mi Hockey khelh thiam em em mai Dhyanchand-a hi a awm a, khawvel huap pawha lar pha a ni a, chuvangin a hming chawia phuah a ni.
“Hip Hip Hurray” Inkhelh zawha Trophy hlantuin Team Captain hnenah Trophy a hlan a, Team Captain-in a lak zawh veleh, hetiang hian a chham ta ṭhin a- “Three Cheers for” Tournament siamtu, an hneh team leh anmahni team (entirnan : Three cheers for MFA Cup, Hip Hip Hurray !, Three Cheers for Lengpui FA Club, Hip Hip Hurray! Three Cheers for Champhai Club, Hip Hip Hurray an ti a, mipuiin, Hip Hip Hurray tiin an au rual ṭhup ṭhup ṭhin a ni.
- F.Zosangliana, Hnahthial