Ka rilru tibuaitu chu Kamrul-a boruak leh CYMA, MZP etc

Mizoram sorkar hnuaia cheng nuai 8,815.37 zet mai kum 2018 hnua hna nei tawh Kamrul Mazumdar chu Mizo hming invuahin Kamlova Chhangte a lo inti a, chu pa chu dan lova Mizo anga a lo inchhal hnuah dan hmangin a Mizo nihna hlihsak a ni ta a, he thilah hian ram leh HNAM humhalh duhtu bera insawi Central YMA an ngawi thei hi mak ka ti tawp thei lo. Hnam thila neitu inti ber mai MZP lah chu an reng vung vung a, MSU khan Kamrula kha an zawng ni khan ka lo hria a, anni lam khan eng tin nge an kalpui tak zel? tih hi Zoram mipuiin kan hre chak a ni.

Kamrul-a chungchangah hian zawhna panga ka neihte hi a hriain chanchinbu kaltlang hian rawn chhang thei ula a lawmawm hle ang:

1. Heti taka hna hmu thei contractor hian midang aia thiamna sang bik neih a nei em ni, eng vangin nge heti taka Mizoram sorkar hian a vur bik mai le?

2. Tribal certificate nen hna a thawk a, cheng maktaduai tel tak meuh meuh a thawh hi Tribal a nih vang khan chhiah a awl dawn si a, Tribal a lo nih leh tak si lovah hian chhiah hi a pe leh dawn em? Chhiah hi pe dawn ta se a hmaa a lo awl tawhna (retrospect) aṭang khan an chhut letsak dawn em ni ang?

3. KR Construc-tion hnathawhte hi midang aiin a ṭhain a tlo bik em? A thawk ṭha bik a nih chuan duhsakna a dawng hi pawm theih a ni a, midang aia a thawh ṭhat bik si loh chuan MNF party mi leh sa SEDP hnuaia Rs 25,000 vel dawng tan chuan nuai hlui 8000 chuang contract hna hmu hi a thikawm ang.

4. Kamrul-a hi tunah chuan Non Tribal a lo ni ta a, chutihlaiin Class I Contractor ah kan han puang leh ta hi eng vang nge ni?

5. Kamrul-a hi 2023 inthlanah hian tlinpui lova tlanpui tham a ni mai lo maw?

- Lalremruata