Aizawl traffic jam helna kawngpui

Aizawl paho buaina lian ber pakhat chu ‘traffic jam’ hi a ni. Sorkar pawh a mangang a, taxi a in­tlanchhawk tir thul, kawngpui hrang hranga motor kal dan a thlak kual thul, awmzia a nei thei lo. Tuna ka sawi duh chu Aizawl traffic jam hel ṭhin te harsatna tawh, kawngpui chhe lutuk hi a ni.

Bawngkawn aṭanga hmar lam, Dur­tlang leh Undivided Zemabawk pawh tiamin, heng veng aṭanga Aizawl chhim lam leh Aizawl laili (Central Aizawl) hna­thawk ṭhinte chuan Aizawl Bye Pass Road (World Bank Road) hi kan zawh ṭhin a, hetah hian kawngpui pangngai aṭanga kawng peng chiah hi chhiat namen lovin a chhe vek a, kan sorkar ‘chak tak’ anga kan chhal hian a siam ṭha tur a ni a, a tichhetute pawh hi a khak tur a ni don lo’m ni?

Falkland aṭanga Chite thleng hi chhiat namen lovin a chhe ta a, a chhiat chhan ber nia lang chu leivung paih motor-in an dai nasat vang a ni. A chhan chu Chite to Armed Veng South lam hi a chhe tel ve tlat lo. Chuvangin, KṬP Youth Recretional Centre sakna turin a mual tawp mai an rawt hniam a, chu leivung zozai chu lirthei tam takin nileng zan khua­in Falkland-Chite Road-ah hian an thiar a, keini pisa kalkawng ve chu an rap chhe zo tawh a, he kawnga kal tur tan chuan lirthei dim loh deuh a ngai.

Ka ngaihdan chuan leivung paihtute hian an pawisain kawng hi an siam tur a ni don lo’m ni? A chhan chu Chite-Armed Veng road a chhe ve tlat lova, leivung phur motor lianin vawi sang tel an rap tih a chiang si a, a chhiatin a chhe vek tawh a ni. Kan sorkar hian kawngpui chhia hi heti hian a dah mai mai dawn nge ni a, a rap chhetu lamin an siam dawn nge, sorkar hian a siam dawn? tihte hi Aizawl hmar lama chengte chuan kan ngaihven hle.

Hemi ni lo tra­ffic jam hel paha Aizawla kan luhna kawngpui pawimawh chu Bethlehem Vengthlang mawng aṭanga Chite kama kawng lo kal BS Farm bula lo chhuak hi a ni a, hei lah hi kan ‘changkanna tur’ an tih mai SIPMIU project avangin chhe mang khengin an kai bawk a, lirthei dim deuh tan chuan kal loh law law mai chi a ni.

Heng kawngpui pahnihte hi Aizawl Traffic jam helna kawng pawimawh a ni a, heng kawngte hi a ṭhat chuan lirthei sang dawnin ni khatah an zawh ka ring a, chu chuan Aizawl traffic a ti thawl dawn a ni.

Kan sorkar hian Falkland to Chite kal­kawng leh Chite to Bethlehem Veng­thlang road hi siam ṭha vat se, hei hi in direct taka Aizawl traffic jam harsatna (problem) ṭhenkhat sut kianna a ni tih hi a man phak em aw? Aizawl kawngpui titawt zual tur ni khata motor za tam tak an pen bona a nih avangin kawngpui pawimawh tak a ni si a.

- Nuntea, Zemabawk North