Kan politics hmalam hun a hriat loh
Kum 2023 mai hian Mizoram chuan MLA kan thlang leh dawn ta a, kan hma lamah hian sorkar thar kan nei rup dawn nge ni a, sorkar ngai kan la hrawn zel dawn tih chu mipuite kutah a awm ta vâng mai. Mipui kutah thuneihna a awm leh ṭan mek tawh tih hriain tuna ruling party pawhin mipui lawmna tur lam hawi an zawng leh ta mup mup mai a, he inbumna khawvelah hian tute nge bum theih, tute nge bum theih loh, tute nge hruaitu ngai la duh hrim hrim, tute nge hruaitu thar hlak duh, tute nge hruaitu hmasaa kir leh duh kan bûk dawn a ni.
Mizoram hi chu Congress leh MNF inlal chhawkna ram a ni a, tun hnaiah ZPM an rawn langa sorkar siam tumin an rawn inhrosa ve kuk kuk tawh a, he ZPM hi an lian ve tak tak nge a thawm mai chauh an la ni tih hi inthlan neih tawh aṭang chuan teh a harsa a, kum 2018 ah khan mipui beisei aiin vote an hmuh san bakah MLA an ngah a, VC inthlanah khan ZPM hian beisei phak lovin AMC lamah an invawrh kang leh hret a, Serchhip bye election ah ZPM an vung a, Tuirial bial bye election ah pawh MNF an tiat lo leh a, he mite hi eng tiat nge an nih a la hriat loh.
MNF leh Congress hi chuan neutral an huai fuh chuan tlinna khawp mipui an nei sa tih chu kan political history hian a nemnghet tawh a, chutih lai chuan mipui hian a thlakna (alternative) kan neih loh avangin anni pahnih hi duh lo chung chungin kan pawm ve mai mai pawh hi a ang a, tun hnaia social media nungchang thlir hi chuan ruling party lam hi chuan ngainatu a nei tlem hle. Ngainatu neih tlem hi vote tu nei tlem tihna a ni chuang lo va, voter zawng hian MNF hian an la nei ve leh nual thei a, an intiam anga cheng nuai 3 an sem ngat chuan voter an hui dual thei a ni.
Mipui hian kan duh duh kan sorkartir thei a, kan duh leh MNF sorkartir lehin Pu Zoramthanga hi Chief Minister ah kum nga dang atan kan thlang ve leh thei a, chutih hunah chuan a lo upa ve hret tawh ang a, Congress lamah pawh duh takin kan kir leh ṭhap thei a, ZPM hi a thar tiin kan chhin thei bawk a, kan hmalam hun chhiar theih loh hi kan kutah a awm ve leh lawi si hi thil mak ve tak a ni.
- Lalromawia