Inter Village Football leh a boruak

‘Dirty Old Man’ (Tar tenawm) tia hming lem an vuah Kushwant Singh khan tihian a lo ti pek a. “Tute emaw nena kan thu a inhmuh loh ṭum hi chuan anmahniah ka han inchan a, an rilru ni awm hi ka zu hmuhpui thei ruak ṭhin! Kan buaina ber chu dik zawka kan inngai ve ve ṭhin hi a ni,” tih lam hawi (The trouble is we never can see our own faults.Whenever I have difficulty with people, I put myself in their shoes and see their point of view) thu a lo vaw thla tawh a.

Kha vai putar thukhawchang khan, tun hnaia Inter Village Football Tournament ram pumin kan khelh mup mup lai khan, mihlim ṭawng takin min pawl ve teh tlat a. Football avangin veng leh veng, khua leh khua kan inzimin, kan inchemhar a. Social Media lamah ṭawngkam dengkhawng leh chaltlai tak taka invawmzuinate bakah, inkhel lai video clip, youtube lama upload hmuh tur a awm nual bawk. Chu’ng video comment na lamah pawh chuan a lu ruh ring ring, a dang nal nal, a kutzungpui chak chak an dingchang emaw tih tur a ni. Heti taka Football ruih chilh a, mahni veng/khua tana lu chhum ban chhum kan huam hial hian Mizote hi Football ngaina leh atchilh hnam kan lo ni ve reng reng a ni tih a nemnghet awm e. Kan Kushwant Singh-a thukhawchang tlawhchhanin ‘eng vanga a chak lo team ṭhenkhatte kha lungawi lo em em nge an nih’ tih hre thawi tur talin an pheikhawk emaw an Football Boot emaw tal i han bun hawh (“....I put myself in their shoes...” ) ve chhin teh ang u hmiang. An rilru ni awmte pawh kan zuk hriatthiampui mahna le!

Kum 20 dawn liamtaa Inter Village Football Match ṭhenkhatah kha chuan a tikimtu ni awm tak, “VC Secretary i nih manah i khel ve a ni maw,” tia kopang lama ṭhute’n an lo chhaih fiam ngam kha an awm fo mai. Tunah erawh chuan India rama Football inelna sang ber Indian Super League player ni satliah mai lo, Club-in an rinrawl ni phate hial an ther ta fur a. Chu’ng player te chuan an career hlanin, inhliam palh avanga an eizawnna kal zel tur a chhe vek thei a ni tih hre chung leh, chutiang thap chuan an veng/an khaw tan an rawn feh chhuak a. An lu an rawn zuar a ni deuh ber awm e. He laia kan tualchhung player te leh a enkawltute paw’n mahni hna, chhungkaw ṭul kalsanin, thahrui, thlantui leh ngaihtuahna tam tak an seng a. Thingtlang VC player, mahni chhungkua ṭheuha a fit ber leh awmkhauh ber ṭhiau, Aizawla inkhela an thang bo hian an khawtlang work schedule a buai nghal a. Khawtlang ṭangrualin an khaw tana pen chhuakte chu an lo hmui hial ṭhin, a namai lo asin.

Chutianga thi leh thau pawlh a, sum leh pai tam tak seng a lo inbuatsaih tawhte rawn fuankhawm chuan YMA Day-a ‘A thau team leh a cher team Football Match’ boruak ang mai mai kha rawn hip an tum hauh lo vang le! An inkhel lo hamtu leh lo pharsaktute pawh ti vel mai mai hmuha an hmuh chuan lungawi a har duh ngawt ang. Player-te’n hma an sawn a, India ram ril thlengin kan inzar pharh ve ta, kan khelmual pawh ngal chen chena dai tur chirhdiak a awm tawh lo. Hetih rual hian kan hmasawna hi a kai rual em? Indian Super League khel theite tihsual leh tihfuh hmu fuh chat chat tur chuan in-fit ve fe tho a ngaih hmel. Khuangchera Section leh Neuva Section inkhel ham tawk vela kan standard a la awm reng chuan kan inbihchian a ngai hle tawh tihna a ni ang. Whistle, a rik hun tura ri lo, a rik loh hun tura ri hian mit khap kar lekin khaw pakhat khaw pum mipuite rilru a tikehsawm thei a, a thla tela an lo thawhrim tawhna kha boruakah kan thamraltir thei nia!

Mahni khua/veng team tan a khelmual sira awrawl tawpa au ṭhinte hian inthlahrun lohna lianpui an nei ṭhin. An neih chuang liam pawh ni lo, an neih ang ang, an ei ai hialte pawh an team tan an lo hlan fo va. Chumi avanga intineitu leh duh fir tak pawh an ni ṭhin. Mipui tel lo, entu awm lova inkhelh tur ni se Inter Village Football hian a hlutna a hloh rang khawp ang. Khawvel hmasawnna avangin khawvel pum hi thingtlang khaw pakhat (Global Village) ah a lo chang zo ta. Khawvel letliama thil thleng hi ‘Kristian ram’ kan nih vang ngawtin kan pumpelh bik ta lo fo. Khawvelin a buaipui ‘Match fixing’ te hian kan kawngka biang a rawn nul ve thuak thuak tawh em? Nge ni a, a rim a ra pawh kan la hre lo zawk le? Kan khawvel tar lam tawhah hian inrin mai harsat ta deuhte pawh a awm theih ta awm e.

Engpawhnise, Inter Village Football Tournament hi kan mizo player te’n hma lam panna’n hmang se, buaina han awm leh laih ṭhin hian a ṭha zawngin nghawng nei se. Player te, Match official te leh mipuite pawh hian kan hma zawn ṭheuh enfiahin, inzirna tur kan neihte i zir tlang zel ang u, tih hi tualchhung football ngainatute thunawn a la ni ta zel a nih hi.

- Hminga Hlondo