Mizoram infiamna leh zirna

Hei tunlai chu Mizoramah Inter Village Football Tournament an kalpui mup mup, hetih lai hian kan infiamna khawvel hi buaipui mah ila zirna khawvel zawk a pawimawh thu hi inthlahrung takin ka lo zep ve teh ang.

Zirna kan han tih hian lehkhazir pangngai a kawk a, hemi kawngah hian kan zirlaite hian inkhel thiamte hnen aṭangin zir tur an ngah hle a ni. Mizo footballer tam tak hi chu India ramah pawh lang phak an ni ve hlawm tawh a, zirna lamah hian kan chet ṭhat chhoh a hun tawh a ni. Zirna inelna hi chu pass ṭhat leh ṭhat loh lam aiin UPSC lamah a ni ve dâwn a, chutah chuan India rama lang phak hi kan nei lo tlat a ni.

Hetia Mizoram Youth Commission lamin mi eizawnna tur IAS an tlin theihna atan pawisa an sên luai luai lai hian an tlin ve a ngai a ni. State dangin UPSC atan sorkar sum an theh chhuah dan hi kei mi mawl hian ka hre ve thiam phak lo va, UPSC tling thei deuh deuh state hian mimal neihna zar an zo nge an sorkar an chet ṭhat vang tih hi ka hre chak.

Kan Inter Village Football Tournament buaipui aṭanga thil lo lang leh ta chu, Mizoram hian inkhelh kan tuipui em em tih a ni a, inkhelh thiam pawh kan ngah a ni. Kan ram hian lehkhazir hi tun aia nasa hian uar ila (inkhelh hi chu kal reng tho se), zirna kan uar nâ nâ nâ chuan zirna lama hlawhtling India rama lang phak pawh kan chhuak zel ang.

Kei zawng, kan ṭhalai inkhel thiamte hi an chhuanawm ka ti a, lehkha thiam awm belh zel bawk se kan ram hian hma a sâwn sawt sawt dâwn a ni.

- Lalthanmawia