Police officer aṭangin aw

Hun tam tak liam ta aṭang khan chief minister Pu Lal Than­hawla hian hun a vawng dik em em a, a fakawm khawp mai. Hman deuh, an sorkar hmasak lam kha chuan nghah ṭhuap ngai khan a awm ṭhin a, a upa tawlh tawlh a, hun a vawng dik tulh tulh maite hi a zahawm khawp mai.

Sorkar hnathawk pawh chief secretary order angin hun vawng dik tura tih an ni a, officer tam tak leh sorkar hnathawk dang tam takin an vawng dik ṭha hle. Mahse hun vawng dik ber tura ngaih police officer zingah entawntlak loh khawpa hun vawng dik lo an tam ta viau. Force an nih angin ‘inti lal’ ringawt loin hun vawn dik kawng­ah te, hnathawh ṭhat kawngah te mipui entawntlak an nih kan beisei hle ṭhin.

Officer pakhatin hun a vawn dik loh chuan a hnuaia mite tan pawh hun vawn dik a har tawh ṭhin a, sorkar sum tam tak a kalral ṭhin tih hi kan hre ve kur si a, mipui lam hian harsatna kan tawh phah fo.

Hmanni khan Home department-a office pakhat ka dawr ve a, thawktu pakhat chu darkar khat dawnin a kal tlai a, chu mi chu officer pawh a ni lo a, mahse a dawrtute tan harsatna a siam mai a ni lo; a thawhpuite tan nasa takin harsatna a siam a ni.

Police officer sawi takah chuan hman­ni khan battalion pakhatah ka leng a, an officer pakhat police headquarters-a a awm laia a thawh ṭhatzia te, eiruk lam aiin sorkar tana a inpekzia min hrilhtu an awm hlauh a, a lawmawm ngawt mai. Khatiang officer kha ka hre khiau a, zahawm pawh ka ti khawp mai. Chutiang bawk chuan battalion pakhatah officer pakhat hi term khat a awm a, a awm tirh aṭangin a hmaa awmte sulhnu pawr tam tak a ching fel tih min hrilh a, kha officer kha ka hre reng tawh dawn a, ka thinlungah a zahawm reng tawh bawk dawn a ni.

Police officer zingah department dang officer aia eiruk leh vua leh vang duhsak uchuak an tam tih mit ngeia hmuh a, benga hriat tur pawh an awm nual. Eiruk leh chhungte vulh viau ṭhinte hian anmahni hnuaia thawkte chungah ngilneihna an nei tlem viau niin a lang bawk. Transfer & posting chungchangah pawh sawipuitu nei ve lo chu hmun kilkhawr ber berah an awm a, sawipuitu nei ṭha leh officer vua leh vangte chu hmun ṭha ṭhaah an awm reng mai. Hei thil hi police officer zingah a nasa hle.

Police officer han sel leh lawk teh ang, MNF sorkar laia central aṭanga police tihchangtlunna (police modernisation scheme) sum tam tak lokal kan hmanral dante kha thlirlet a chakawm tak zet a ni. Kha sum zozai khan engtin nge police tana thawmṭhat an neih le? Thawh ṭhat chu tam tak nei mahse, kha sum kha dik lo tak takin a kalral hnem viau niin a lang.

Khangte kha CBI chhuitir hial ngaiin eirukna a tam niin a lang.

- Lalhmingliana