Phullem versus sikul building

Tun hnaiah Aizawl District Football Association chuan thuchhuah an rawn siam a. Mizoram sorkarin Aizawl leh a chhehvelah phullem an siam belh dawn avanga lawmthu sawi te, Mizoram hmun hrang hranga phullem an phah avanga lawmthu an sawina a ni a, football pawl tan chuan lawmthu sawina tur a ni. Zirlai lam, Mizo Zirlai Pawl kan nihte hian sikul building ṭha tak tak leh sikul hmunhma ṭha tak tak siam a nih avanga lawmthu sawina tur thuchhuah an siam hlan ka lo nghakhlel a ni.

Kan ṭhianpa football ngaina ve tak chuan ka rin loh danin phullem phah hi a sawi a, 'Mizoram hi India ramah chuan population aṭanga chhut chuan artificial turf football khelhna nei ngah ber kan nih ka ring a, football field siam hi chu contractor tan leh hna hmutu tan chuan thil lawmawm a ni a, mahse sports hmasawnna tur hian association lamah sum awm si lovin infrastructure atan sum an hmang nasa a, hei hi chu hmasawnna lam a nih ai hian infractructure din hi party worker lam leh construction lam ti mi tan pawisa hmuhna ṭha tak a ni,' a ti daih a, a thu sawi hi dik kher lo mahse a ngaihnawm hle a ni.

ADFA thu chhuah aṭanga kan lo hmuh chu Aizawl chhehvelah hian phullem pakua an phah mek a nih hmel a, chuti a nih chuan kan hnianghnar dawn a, lawmte lawmpui thiam hi a ṭha. Chutih mek lai chuan a lehlama thlir chuan mahni hlawha lungawi lo ni lova ṭhiante hlawh thik sorkar hnathawk ang thovin khelmual lam hmasawnna hian sikul building hi a ti lang hluiin a ti ṭhing ṭhiap ṭhuap a. Sikul building cheina tur sum a dawna dawn pawh ni lo, NABARD aṭanga a puka puk chawp hmanna chu a lo chiang lo ruai si nen, ṭhalai lawm a kim ta lo a ni.

Politics hi chu party dang beih lo beih let chu a harsa lova mahni party chhunga beihna beih let a harsa an tih zawng zawng hi kan ruling party lamah hian a lo thleng ve mek a ni. Hetia phullem an siam mup mup lai hian party mi leh sa culvert leh side drain chhe te te siam ve beisei kum li vel nghak tawhte hian an lawm pui ve thei lova, department dang changtu Minister leh an kid rual hian an sum bawm nghawng ni lova phullem lo in phah hring ve dup satliah hi chu an thlir liam mai mai lovin an itsik ru a, chu chu kan rama thil thleng mek hi a ni.

Kan sawi kual hnuah a hmawr han bawk dawn ta ila. Thil hi a inbuk tawk zela kan kal pui thiam loh chuan mi pakhat kal fawr hian midang a beng hniam a, mi dang hian mi hnuaia awm reng duh bik lovin arpa chan changa khuang larh larh hi hnung lam aṭanga vawm an duh mai zel. A vawm phaka awm hnaite chu party dang mi leh sa ni lovin mahni party chhung mi tho niin an vawm chak zek zek a, an lo in vawm zauh zauh tawh ni te pawh hian a lang. An la in vawm fuh nge nge a nih pawhin hotupa berin duat bik neia fate a enkawl chuan Josefa meuh pawh kha a unaute khan an sumdawng hnenah an hralh daih mai a ni.

Unaute pawh ni lem lo hman ni lawk lawka party khata inhmu thar satliah tan chuan pa berin duat bik nei anga a lan chuan unau zinga upa lam tan chuan an department chan lama an tlak bal dan sawi ve siah siah mai a chakawm chho ṭan a ni.

Politics hi chuan thil ṭha a thlen apiangin a lehlam hi an awm a, tunlai ṭhangthar ṭawnga Side B an tih ang hi a nia. Phullem phah avanga lawm em em ṭhalai sing an awm chuan thil dang an tih loh sawi chak em em ṭhalai sing an awm ve zel tho a ni. He Zoram khawvelah hi chuan rorel hi a harsa dawn phiangsen si a, phullem phah avanga awm ngaihna hre lo an awm ang tho hian Mizoram hmun tinah sorkar sikul building chhia leh hmun hma tlabal lutuk avanga awm ngaihna hre lo an awm bawk si; a harsa keih keih a ni rorel dan pawh hi.

Tunlaia kan buaipui football hi a buaipuitu pawl chuan lo buaipui mup mup se, a thei chuan an khelmual pawh lo siam sak zel rawh se. Chumi buk tawk chuan kan zirna in te, kan kawngpui te, kan vawk farm te, kan eizawnna huan leh leilet panna kawng te, kan khaw vantlang in te, kan Hospital leh Health Sub Centre pawh hi siam ṭhat lo ni ve zel se, chu chuan kan ram hi hma a sawn tir dawm a ni. Phullem phahna tur chauhva sum a awm hian miin an thik a, ei leh bar lam a ken tel tlem em si avang hian sorkar sum chhawr ve thei lo sector danga mi te hian an sawisel ta a ni.

Tunah hian sikul building tlabal em em tam tak an awm ang. Health Sub Centre building chhe lulai tawh te, Anganwadi Centre lam pawh ṭha lo, thawktu indaih lohna tam em em sorkar hna chi tinte hian kan phullem phah hi an thik ta a nih chu. Hei vang hian kan ram kalphung hrim hrim hi kan en chuan Minister chak hian thik an hlawh dawn, sorkar hnuaiah miin hma a lak pup pup theih laia hma la thei ve lo duhsakna dawng lo department leh an chhungkua chu an vuivai reng dawn a ni.

Ramin hma a sawn dawn chuan sector hrang hrang hmasawn rual a ngai si a ni. Kan ram hian thawh chhuah a neih ve tak tak hma loh zawng kan phun zel dawn niin a lang ta a ni.

- Mavena