Hlawh lâk theih loh chhan a chiang ta

Finance Commi­ssioner Pu Vanlal­chhuanga chuan, Centrally sponsored scheme (CSS) hnuaia March 31, 2022 hma lama sum an hmuh tawhte chu a neitu tur department-te account-ah July 20, 2022 hmaa pe chhuak vek tura cen­tral sorkarin state sor­karte a hriattir avang­in Mizoram sum din­hmun a harsat phah rih dawn thu Vanglaini-ah kan hmu a.

Vanglaini chan­chinbuin a ziah danin, Finance Commi­ssioner khan Central-in CSS programme-a hman tur sum rawn pe mah se, Financial Rules-in sum hman nghal tur ni lo chu lâk chhuah a phal loh vang te, department-in sum tam tham tak rei tak an kawl phal a nih loh vangtein RBI-a state account-ah dah ṭhin a nih thu a sawi tih kan hmu bawk a.

Finance Commi­ssioner thusawi hian tun hma aṭanga in­hnial­na leh thu inchuh awm ṭhin a rawn tichiang ta. Chu chu, Mizoram sorkar hian Central aṭanga CSS sum a hmuh te a hun takah a neitu/ hmangtu tur department-ah pe loin, a hréng khaw­tlai ṭhin tih hi a ni. A hrèn khawtlai chhan pawh Finance Commissioner sawi angin, revenue expen­diture atan hman an duh vang a ni tih a hriat theih bawk.

A hre zawkte sawi ṭhin dan chuan, CSS hrang hranga sumte chu state sorkarin a dawn aṭanga ni 15 (?) chhungin a hmangtu tur department hnenah pek tur tih a ni a (CSS programme zawng zawngah a ni kher lo thei). Mahse, Mizoram sorkar chuan zâwm duh lo luiin, a hrêng khawtlai ṭhin a, CSS programme leh a buaipuitute'n harsatna an tawh phah ta ṭhin tih a lang.

CSS programme hrang hranga thawk­te'n harsatna an tawh fo chhan te, a hun taka thla tina hlawh an lâk theih loh chhante pawh a chiang kuar ta a; chu chu Mizoram sorkarin an hlawh tur a hrên khawtlai ṭhin vang a ni.

CSS programme kan hriat lâr ber pahnih, National Health Mission leh Samagra Shiksha hnuaia thawkte'n a hun taka hlawh lâk an nei mang lo niin a lang a, lungawi lohna pawh an lantir tawh ṭhin chhan zinga mi a ni. A hun tak leh thla tina hlawh an lâk theih loh chhan hi Central-in sum a rawn pek tlai ṭhin vang aiin, Mizoram sorkarin a hrèn khawtlai ṭhin vangah ngaih loh theih a ni ta lo. CSS hnuaia thawkte'n harsatna an tâwk ṭhin kan Mizoram sorkar hian pawi a ti lo tihna pawh a ni thei ang.

Finance Commi­ssioner khan CSS sumte chu ni 21 chhung­in department account-ah pe chhuak zel tawh turin state sorkarte a hriattir thu a sawi bawk a. Sum pek chhuah hun bithliah hi thil thar a ni hran lo a, a hma pawhin kaihhruaina (guidelines) angin, sum hmuh aṭanga ni 15, etc. chhunga pek chhuah tur tih a awm sa reng a, a zawm duh lo mai zawk a ni.

Tuna thupek thar hi eng anga khauh tur nge kan hre ve lo a, Mizo­ram sorkar hian a zâwm dawn rêng em tih chu hunin a la rawn hrilh ang chu.

- Zoramchhana