Gas distributor leh mipuite

Mizo mipui tam tak phun tamna ber leh mi tam takin an sawi tam ber, Mizorama kan tlawmngai pawl lian ber Central YMA meuh pawhin an buaipui gas chungchang hi ngaihtuah ngai tak leh chhuizui ngai tak a la ni. Sawrkar laipuiin thil engkim langtlang leh awlsam zawka kalpui a nih theih nan theih tawp a chhuah mek zel a. India ram hmundang te ang bawkin Mizoramah pawh gas connection chungchangah thil thar kan hmuh/ hriat belh zel a, a lawmawm hle.

India ram hmun tam takah mipuiten Indian Oil Corporation website aṭang emaw anmahni apps hmangin gas cylinder an book a, online vekin pawisa an pe tawh a, tam takin IVRS/ SMS hmangin gas cylinder an book fur ta mai. Hetianga cylinder book te hi Distributor lamin a book-tute hnenah an thlen thlap thlap a, mipuite tan a awlsam phah hle. Sawrkar laipui leh Indian Oil Corporation (IOC) ten mipuite phur tizangkhai thei zawnga nasa taka hma an lakna hi Mizoramah erawh kan la chhawr thei meuh lo niin alang.

Tun hnai khan Aizawl Bawrhsap pisa pui chuan social media kaltlangin IVRS/ SMS hmanga gas booking leh thil pawimawh dang tih theih dan a tarlang a. Amaherawhchu, he an thil tarlan te hi Mizoramah hian a la hman theih meuh loh a ni tih hi an hre lo em ni aw? Mi tam takin online booking emaw IVRS/ SMS booking hi an ti ṭhin a. Amaherawhchu, Distributor-te hian cylinder hi an deliver thei meuh lo. (deliver thei turin hmalakna an nei meuh lo?). Hetiang hi kan dinhmun a la nih lai leh gas agency - distributor-ten mipui hriata online booking/ IVRS/ SMS booking tih theih a nih thu an tarlan duh miah loh lai hian Indian Oil Corporation website lamah erawh heng facilities - online booking/ IVRS/ SMS booking te hi tih theih niin alang thung.

Indian Oil Corporation official website leh apps te hi ngun taka kan en chuan heng facilities - online booking and payment, IVRS/ SMS booking te hi Mizoramah pawh hian a tih theih vek tawh niin a lang. Amaherawhchu, Mizoram lama kan agency/ distributor-te hian an tihlawhtling thei lo emaw an tihlawhtling duh lo mai niin alang.

Kum hmasa lam khan mi pakhatin gas online refill/ booking a tih thu leh distributor-te nena an inhnial thu social media lamah kan hmu nghe nghe a nih kha. Chuvangin, tun hnaia Aizawl Bawrhsap pisapui lamin mipuite chu IVRS/ SMS booking hmang tura min fuihna an tarlan hi a fuh tawk lo hle awm e. Heng IVRS/ SMS/ online booking te hi tih theih chu a ni teh meuh mai. Amaherawhchu, Mizorama Agency/ distributor-te hian a takin an kalpui thei lo a, a tawpah mimal leh distributor-te inkarah inhmuh thiam lohna a thleng duh hle ang tih hi an ngaihtuah pha lo em ni aw? Mipui lamin heng facilities hi lo hmang ni ila, kan distributor-ten min deliver theih loh emaw min deliver duh miau loh chuan awmzia a awm lo hle awm e.

A nihna takah chuan, heng facilities te hi Mizorama kan distributor-te hian duh nise an hmang/ kalpui thei ngei mai. A chhan chu, heng IVRS/ SMS or online booking ti tawh te hnenah cylinder deliver miah lo a, cash memo an generate tawp te, IOC website lamah customer hnena deliver thlap anga 'delivery report' pe thei an ni tlat. Chuvangin, kan distibutor-te hian sawrkar hmalakna hi hlawhtling taka hmang a, lang tlang taka mipuiten kan chhawr theih nan tun aia nasa hian hma min lakpui sela a duhawm hle.

Sawrkar hmalakna te hi mipui hriatah kan puangzar duh a, mipuiten chhawr se kan ti a nih pawhin kan thil tlangzarh te hi a takin mipuite hian an chhawr thei ngei em? Mipui te hian eng harsatna nge an tawh/ an tawh theih tih te hi ngaihtuah hmasak a, en zui bawk a ṭha ṭhin khawp mai. Mahni in lum/ office aṭanga thu ṭha tak tak puanchhuah hi thil har niin alang lo. Amaherawhchu, mipuiten eng angin nge an chhawr ṭangkai a, distributor leh mipuite inkarah eng thil nge thleng ṭhin tih te hriat chian hmasak hi sawrkar hotu liante hian hria se a ṭha ngawt mai.

Mizoram bikah hian kan nitin khaw­sakna atana kan mamawh heng - Ration buhfai, chini, LPG-gas leh thil dang tam tak kan hmuh dan, kan lak/ dawn danah mi tam tak kan lungawi thei lo a. Kan awm hmunah phunin, heng buhfai, gas leh thil dang semtu/ pechhuaktute chungah kan lungawi loh vangin kan phun fo niin alang. Hetia han ngaihtuah mai hi chuan kan phunna/ sawiselna te hi a dik hmel viau lawi si! Amaherawhchu, mahni awmhmuna phun lungawi emaw mi sawisel ringawt hian hmasawnna a thlen lo a, midangte tan buaina leh manganna a thlen let fo zawk ṭhin. Chuvangin, mipuite hian kan tih tur hria ila, kan harsatna leh buaina te hi a ching fel theitu dik tak hnenah thlen zel nachang hria ila a duhawm hle.

- LRN Siama