AIZAWL KHAWPUI PARKING

Aizawl khawpui hi han leng chhuak i la motor pawh in pelh hleih theih loha motor hung an tam ta hle mai.

Kawngpuite lah hi a hman hman hian kan thai rang ta emaw tih mai turin a ṭial buai mai a, mumal taka buaipui a nih loh chuan khawpui a tiṭawp lutuk palh ang e. Hetia han en reng reng pawha kawngpui nek lutuka tuten emaw an duh duha an rin ve ringawt hmuh phei hi chuan rilru a na a, a thinrim thlak zawk hial a ni.

Ka hriat sual loh chuan Aizawl khaw­pui parking control hi AMC lo din hma kha chuan SP Traffic thuneihna niin ka hria a, sawrkar pawhin thuneihna a pe a ni awm e. AMC a lo din takah hian SP Traffic thuneihna chu la pangngai reng tho siin AMC hian thuneihna a nei ve leh a. Tunah phei chuan Local Council pawhin an duh dan danin an area a mi parking line an rin ta emaw tih mai tur a ni.

Hetia khawpui khata parking control a hman hman kuta a awm hi a fuh lo hle a. Ṭhenkhatin motor tlan tluang lai dal pha khawpin parking-na hmun siamin line an lo rin a, ṭhenkhatin a piah lawkah an duh danin hmun dang an lo rin ve leh a, ṭhenkhatin midang parking peksa leh rinsa a hnawksak e tia an lo sawisel bawk si chuan a buai nuai ve thei tlat a ni. Hetiang teh nuaia kan kal chuan parking control chungchangah hian kan la buai telh telh dawn niin a lang a, thuneitu mi hrang kan tam chuan inrelbawlnain a tuar ang a, a tawpah chuan mipuite vek hi a tuar nasa ber tur kan ni ngei ang.

Heti hian rawtna kan siam teh ang - Ai­zawl khawpui par­king control hi tun hmaa leh tun thlenga thuneihna nei SP Traffic kutah hian awm se. Anni hi tunhma aṭanga traffic lo enkawltu leh a hre ber te an ni bawk a, Aizawl khawpui traffic enkawl tura sawrkarin a din chhan ang tak hian parking control hi chu a thuneihnaah awm se.

Traffic police-te traffic jam hre chiangtu an nih avangin parking siam leh tihboah an mawhphurhnaah ngai ila.

Tuna kalpui ang hian Parking fee lakkhawm (collection of parking fees) leh hmanral chu tun ang hian AMC kut vek nise. Local council te pawhin an area an duh duha parking lo siam ve mai lovin Traffic police-te pawmpuina leh enpuinaa hnuaiah kalpui zel nise.

Hetianga kan kal chuan Aizawl khaw­puia kan buaina tam tak hi kan chin fel theih ka ring a, traffic jam leh motor park hnawk tam tak pawh hian ziaawm lam a pan theih ka ring.

- Zoramliana