‘DUCK’ NGE ‘DUCT’

Tun hnaiah Lung­lei Convention Cen­tre-ah vanduaina rapthlak tak thlengin Pu Glory-a, pa la valai tak, hman deuh lawka nupui neia chhungkaw duhawm tak din chho mek chuan inthiarna emaw tia inthiar tura kawngkapui a hawng chu he building la sak peih chiah loh, nakina lift an la fitna tur niawm tak khur thuk takah chuan a tla a, ka pawh chhawn lohin a boral a nih kha.

Kha thilah khan inpuhmawhna te pawh a awm nual awm e, khati taka khur thuk hlauhawm, tlakhlum hial theihna awm reng kawngka kha engatinge kalh a nih loh, engatinge khur thuk tak a awm tih hriatna ‘warning sign’ tal tar a nih loh tih thute whatsapp leh facebook-ah kan chhiar hlawm a nih kha. He thilah hian a mawhphurtu chu chowkedar a ni tih te, a contractor mawh zawk a ni tihte pawh an post chuai chuai mai. Hei hi chu thuneitute chinfel turah dah ta ila.

Miin vanduaina an lo tawk a, nunna hial chan a ni a, a tuartu chhungte lai­natawmzia, khaw­ngaihthlakzia leh an hrilhhai turzia kan hria a, kan tuarpui em em a ni. Kha thil lo thlen tirh khan mi pakhat chuan facebook/ whatsapp-ah ‘Duck Hole’ tih tar tur a nia, an tar lo kha a pawi a ni tih ang deuhin a rawn post a.

Tun hnaiah whats­app group pakhatah kha vanduaina thlenna hmun ni ngeia lang kawngkapuiah khan ‘Warning : DUCK. Do not open’ tih in tar an rawn post leh a. Heta DUCK tih tak mai hi he vanduaina thlen zarah hian sawi fiah a ngai ta niin a lang.

An sawi tum hi DUCT tih zawk hi a ni thei ang em? Duct tih awmzia English dictionary hrang hranga ka en hnu in an sawi tum dan a inang vek a, Oxford English dictionary-in a hrilhfiah dan hi a chiang viau : ‘A tube or passageway in a building’ tiin a hrilhfiah. Duck tih erawh chu ‘kun hniam’ tihna emaw varak chi ho sawina emaw a ni. He kawngkhar hi a hniam viau in, lut turin kun hniam deuh a ngai te a nih hmel lem si lo a, chuvangin DUCK tia an lo ziak tawh khi DUCT tihna a nih zawk lo’m ni? ka han ti ve a ni.

Kan sawi fo angin kan global ve tawh a, hnam hrang hrang chi hrang hrangin min tlawh pawh ve tawh a, a dik zawk kan hria a nih chuan a dik lo hi paihin a dik zawk hian sawiin ziak ta ila a ṭha ngawt mai. SUPER pawh SAPAR tia Supermarket aia SAPARMARKET ti tlat te hi tlemte mahni se, an la awm tlat miau a.

Mi changkang awm pui puiin grant in aid tih tura awmze bo phah vek khawpa ‘GRAND in aid’ tia la ziak te pawh an awm leh zauh ṭhin a, a dik zawka ziak leh lam hram a ṭha ngawt mai.

- Ramhluna Hnamte