PARTY THAWHHO KAN VA HARSAT EM
India ram political party hlun ber leh independence sual chhuaktu Indian National Congress chuan kum 30 vel lai ro a rel zui a. Leadership an neih ṭhat chhung chuan an buai ngai lo tih theih a ni. A hnu zelah BJP te lo piangin National Democratic Alliance (NDA) thawhhona hnuaih intilian zelin leadership-ah Congress lehpelin sawrkarna an chang ta a ni. Leadership-ah inhuphurh tawnna a awm chuan party thawhhona a hlawhtling mawh hle a ni.
Mizoramah Mizo Union Lal ber sual chhuaktu party khan District Council-ah kum 20 vel zet sawrkarna an chang zui thei a ni. A hnu deuhah Congress Party-ah an inchhunglut ta a ni. Kum 1979 PC-a lungawu lo PC-‘B’ leh Congress ṭangdun khan PC zidung an hneh zo ta lo a. Kum 1989-ah Congress leh MNF ‘D’ ṭangdun khan MNF an hneh a, a hnu lawkah Congress-ah an lut ta dial a. Kum 1993-ah Congress leh MJD ṭangdun an sawrkar a mahse an thurual rei lo hle. Congress khan an sawp deuh niin a hriat a ni.
Kum 1998-ah MNF leh MPC (a hmaa MJD) ṭangdun an sawrkar a, mahse kum khat zet bak an thawk ho hleithei lo. Hemi ṭum hian MPC kuhmumah MNF-in par an chuang ti ila a sual tampui awm lo ve. Kum 2003 leh 2008 inthlanah MPC leh ZNP an thawk ho nain an sawrkar zo ta rih lo a ni. Heng thil thleng tawh aṭanga hriat theih chu Party pahnih emaw thawhhona ringawt aiin thawhhona hming neia hrui khat vuana thawhhona chu a hlawhtling zel zawk tih a hmuh thei. Kum 2013 inthlana MNF leh MPC thawhhona pawh a hlawhtling ta chuang lo a ni.
Mizorama Party inthlana thawk ho ṭhinte hian India rama Party-te thawh ho dan leh an hlawhtlin dan aṭangin zir tur an nei tih hriat a hun hle tawh a ni. Mipui rilru hria inti tam takin kum 2018 tawp lama inthlan lo awm turah Congress ni lo, MNF ni lo sawrkar se an duh tih chu a dikna chen a awm ngei ang. Mahse tawnhriat tawh aṭanga lang reng chu mahni party symbol leh flag ṭheuh ringa an thawk ho a nih chuan eng vak an ang dawnin a rinawm loh a ni.
Amaherawhchu, party pakhata ṭang ho anga ṭanhona hming nei a, office te pawh siama hmun khat aṭanga campaign te pawh ruahmanna siama election manifesto pawh hmun khata an ti ho thei a nih chuan an beiseiawm hle turah ngaih a ni.
An vaia an thawk ho thei lo a nih pawhin Party pahnih/ pathum chauh pawh party pakhat anga an inhlawmkhawm thei a nih chuan an beisei awm hle thoin a rinawm. Kum 30 vel zet party pahnih Congress leh MNF in lal chhawk tir chhen hi mipuiin an kham tawh tih a hriat theih a ni.
Heng hun chhung zawng hian ei leh barah intodelh tih a awm lova, power-ah intodelh a awm lova, corruption-ah an hmingchhe em em reng a, ro tling thil (infrastructure) hnutchhiah tih tham an nei lova, hna nei lo (unemployment) an tam tual tual bawk. Mipuite hian engemaw tak beisei an nei tawh niin a hriat theih a ni.
- KC Muana, Bungkawn