MODEL BAMBOO PLANTATION ATAN TUNGE RUA/ MAU PHUN TUR SUPPLY DAWN?

Kan pu ber Chief Minister-in a tuipui em em rua/ mau hi tun ministry-ah phei chuan Flagship programme ang hialin a chhal a, SEDP-ah pawh raw chinna tur leh sawngbawlna tur hian sum tam tak dah a ni bawk. Lengte ramah kan flagship ber rua/mau hardening-na hmun pawh media aṭangin kan lo hmu ṭhin a, hmalak an tum nasa hle niin a lang. 

Hetih lai hian Lock­down vangin hma­lak a khawlhkham tih erawh kan hre ṭheuh a. Amaherawh­chu, kuthnathawktute tan kawng zau taka hawn a nih vangin zalen takin hna an thawk thei thung a ni. Kan flagship programme ber rua/ mau pawh hi thlai dang anga phun hun, season nei a nih angin bulṭan ṭha tur chuan a phun hun dik taka phun a ngai ngei ang. 

Tun kum atan pawh thlai/thing phun hun chu a lo in her chhuak leh ta reng mai a, amaherawhchu rua/ mau phun tur leh a ṭiak supply chungchang erawh thehmeh angin a la reh vang vang thung si a ni. 

Tlem lai deuh khan Lengpui leh Hmunpui rama Model Bamboo Plan­tation hmuna rua/ mau ching tur te tan ṭanpuina sem chhuah a lo ni tawh a ni. Tunah hian rua hi phun hun a inṭan chho mek a, chuvangin Lengpui leh Hmunpui khua, raw chingtu turte hnenah hian raw chin tur a ṭiak emaw, bul kar emaw supply a hun chho tawh niin a lang. Thlai phun hun a nih tawh laiin khawia mi nge rua an phun dawn tih tun thlengin thawm a la awm lo. 

Horticulture Department-hnena RTI chhanna (dated 19.5.2020) aṭanga a lan danin Lengpui leh Hmunpuia Model Bamboo Plantation tur atan hian tun thlengin rua/ mau phun tur supplier tur hi Horticulture Dept. hian a la hre lo a, hetiang a nih chuan khawi a mi nge phun tur ni ang tih hi zawhna lian tak a ni ngei ang.

Govt. of Mizoram (Allocation of Bussiness) Rules, 2019, dated 19th June, 2019-a issued-ah chuan Bam­boo Cultivation & Development hi Environment, Forest & Climate Change Dept kut aṭangin Horticulture Dept. kutah dah a ni tawh a, Horticulture Department kuta nghah a nih aṭang hian Bamboo Cultivation & Development-na tur atan hian kum 2019-2020 khan sum hmuh a ni nual tawh a, chung te chu;

1)    SEDP aṭangin Rs 131.00 lakhs

2)    National Bamboo Mission (NBM) 

    aṭangin Rs  350.00 lakhs 

3)    SMS aṭangin 38.89 lakhs hmuh a ni. 

He mi hnu hian Bamboo Cultivation leh Development atan hian tun thlengin Horticulture Department hian hmalakna ah SEDP sum bik hi Rs 26.875 lakhs a sengral tawh a ni. Bul ṭan tir a la nih vangin hlawkna engmah hmuh a la ni lo thung. Hetih lai hian Lengpui leh Hmunpuia Model Bamboo Plantation tura Beneficiaries te hnena ṭanpuina sem kha Horticulture Dept. kaltlang vek leh hriatpuina veka sem a ni. 

Kum 2019-2020 chhunga Bamboo Cultivation & Development atana kan sum hmuh zawng zawng belh khawm hi Rs 519.89 lakhs a ni. Tichuan, kan hmanral aṭanga la bâng chu Rs 493.015 lakhs hi a la awm niin alang a, hmalakna lian tham tak atan an la khek turah ngai ila. 

Sawi tawh angin rua/ mau chingtu tur beneficiarie-te hnenah hian khawia ṭangin nge rua/ mau chi hi supply tur tih Horticulture Department hian tun thlai phun hun tawh thleng hian a la hre lo a. Lengte rama Nursery pawh hi a hriatpui lo bawk a, D. Brandissi leh D. Latiflorous chi lakluh a la nei lo hrim hrim a ni. 

Mipui, kuthnathawktu tam tak hlawh­chham chhan te, an thlai phun tam tak a hlawhtlin theih loh chhan leh a pamṭul ṭhin chhan chu a hun taka phun a nih loh ṭhin vang a ni. Hlawhtling tura sawrkarin hma a lak dawn chuan a phun hun thlengin a ngai pawimawh tur a ni. 

Tunah pawh sawrkar flagship prog­ramme ber rua/mau hi phun a hun tawh lai hian a chi supply-tu tur hi concern department ber hian a la hre lo tlat mai. 

Hetiang hi kan dinhmun a nih chuan Lengpui leh Hmunpui ram Model Bamboo Plantation-a Mizoram sawrkar Flagship Programme bulṭanna tur hi a kan hlawhtlinpui ang em tih hi ngaihtuah tham tak a ni e.