RAWTNA - CHIAHPUAM PUNG CHAUH TAL HI A HMAN THEIH LAWM NI?

Covid 19 vangin kan buai ta hle a. Ram hruaitu tan pawh a luhai thlak hle ang. 

Sum leh paiah kan indaih lo a, kan CM pawhin kan sum dinhmun dik tak report a harsat thu a sawi mek a nih hi. 

Kan sum thalna hnar central sum bawm pawh a kang telh telh mai si a, a thlaler lama awm phei chu kan te tial tial dawn a ni mai lo maw? 

Kan ram hruaituten sum zawn dan an ngaih­tuah vat vat a, tuialhthei man aṭanga tax lak pawh an han tipung ta a. Mahse motor veivak a tlem avangin a hralh chhuah a tlem tho si a, kawngro a su thui lua thei lo mai thei. 

Ka rilrua lo lang ta chu, kum 2008-a Mizorama chiahpuam kan buaipui luai luai kha he hun harsa kan tawh mek atan hian hman ṭangkai dan a awm thei mai ang em le tih hi a ni. 

October 24, 2013 Vanglaini chanchinbu chhuakah chuan heti hian kan hmu: 

Chiahpuam sum tuna Aizawl SP hminga account siam pathuma pawisa awm mek, Rs. 117,661,489 chu sorkarah pe kirin, sorkar chinfel turin a dah a. Chiahpuama mawhphurtua puh mi eng emaw zat a chhuah zalen bawk, tiin. Pawisa hi vaibelchhe 11 chuang a ni. 

Kha pawisa kha a chiahpuamtute hnenah sem han tum ṭhin mah se fumfe taka a depositor-te hming chhinchhiah a nih loh vang nge, vawiin thlengin sawrkarin a sem tak thu kan la hre lo a ni. 

Kha pawisa tam tham fe mai kha eng tikah emaw chuan a depositor-te hnenah sawrkarin a la pe mai thei. Pe ngei se tih pawh kan duhsak tlang a, lo thlir zel ila.

Kha pawisa kha an man kum 2008 aṭang khan khawih chet a la ni leh lo niin a lang a. Tun kum 2020 hi a kum 11 na vel lai a lo ni ta reng mai. 

Khawih chet loh na na na chuan a pung ve zel lo thei lo. Tuna SBI a Fixed Deposit interest rate hi 6.10% a ni mek a. Chumi base chuan kum 11 chhunga a punna hi chhut ta ila Rs. 111,343,872 (crore 11 chuang) a lo ni daih. 

He chiahpuam pawisa pung hi tun hun harsa atan hian sawrkarin lak dan ngaihtuah se, ṭangkai leh rualkhai taka hman dante hi zawng ta se kan indaih lohna zualpui hi a phuhru thei mai lo ang maw? 

A capital erawh mimal ta a ni a, kan khawih thiang lo ang a. 

Lalnu Estheri khan hun harsa lai takah lalnu a nihna a hmang ṭangkai ang khan he kan hun harsa lai takah hian kha tih hun laia mi tam takin thil ṭha zawk beiseia an sum an deposit, tang ta daih si kha ṭangkai taka hman hun a ni dawn lawm ni?

Rawtna tlawm tak ka han siam ve e.