NAKINAH
Dam chhan ṭha nei lova inhria ṭhenkhatin mual an liam zo va, natna leh lungngaihnaina a rehchhum, a ngam loh natnain a changin hmun sáng lumlai a luah a, vanneihna leh vanduaina inlehthal chhawkna ramah kan cheng ho vek a. Vawiina hlim avanga nuia ṭe chelchul te hi naktukah ṭahnain a buan leh a, hneh tura chakna mamawh ber berte chu mihringte hi kan lo ni vei reuh va.
Mamawh ngah leh mamawh nei vak lo te-in kan hringnun zat ve hi an insulpel a, vàn rahka nun leia nawmna tem pha ve tura mahni tak ngial pawh in hre chiang ṭha ṭhum lo te nena leia vaivut khu tak rah perh sawk sawk hi mihring mi tak zia a lo ni. Ngam huai deuh erawh a ngai, phur tak anga phur lo zet chung chung deuh pawha ding leh ãwn deuh pawha rah luih a ngai hi a lo ni.
Mamawh chhanna famkim hi ziaka lehkha puan hràwm nawk nawka hrual mûm a dahin a him bik a; lei rualrem rap tura vawiina kan nun thuruk lairil te nen hian, a chhanna famkim pawh leiah hian a hîm bik lehzual ṭhin.
Nun dàn zirna ṭha ber nunchan zirna hmunah a ni a, lemchanna ṭha ber chu lemchanna tualzawlah a ni thung si a. Mihring nuna tlo ber pawh a damlaiah ni lovin a thih hnu-ah a inṭan chauh zawk.
Nakinah chuan ti hian ka ngaihtuah fo va, leia vaivut rawng kai i nih avangin mual i la liam ve ngei ang. Chutih hunah chuan leia i hmuhsit, engah maha i ngaih lohte hian i thlan an la lai ang a, mawi takin an la chhilh leh ang. Nakinah thlan ko tlangah tu'nge i nih tih hi nula leh tlangval tlawmngai thlanlaiten titi-in an la sawi chhuak dawn asin?!
Lunglênna leh khawharnaina min tuam velna ram, nat leh lungngaihnaina min kian san ngai lohna tur hmun, mahni ngei pawh inhriat chian theih lohna, lunghnur taka indawm kûn reng erawh a theih ngai lohna tur khawvel mawi ni bawk si hi a chang hian chuan ral daih tawh mai se tih ngawih ngawih chang ka va ngah em! Nakinah chuan a la ral ngei ang, kan vahvaihna ram lei ninawm hi...
Hnah ro a ṭil a, hnah tharin a thlak leh ṭhin ang hian, nakinah zawng kan nun 'tun' leh 'hmanlai' te hi kan la sawi zawm leh ang a, vawiin atana nakin hun hi a va fiah dawn rua em. Chutah chuan nunhlui ngaih lunglenna te, ṭah leh ha ṭhiala kan rumna zawng zawngte hi a la kin vek dawn si a.
É tak a, ‘nakinah’ chuan 'vawiin' hi kan la ngai ber dawn asin.
- LH Hauheng, Nghilhloh Rûn