Pasalṭha huaisen...

Hmanlai Mizote chuan an ngaihsan ber zinga mi chu pasalṭha huaisen te hi an ni. Pasalṭha huaisen ni tur chuan mi tlawmngai tak te, sa kap thei takte nih a ngai ṭhin. Pa sakap thei tak chu an ngaisang ṭhin. Thangchhuah Pa kan han tih ngat ang chi phei hi chu an dah sang hle a, tunlai ang ni ta se, India President chawimawina sang ber dawng thei ngat ang tluk hial an ni ngei ang.

Thangchhuah tur chuan sa lukim kah te a ngai a ni. Tunlaiah chuan sakap thei ngaihsan a hnekin, sorkar pawi khawih leh environment tichhetu anga ngaih an ni tawh. Kan tunlai khawvel changkan dan a zir zelin ngaihsan zawng a lo danglam ta. Ram­sa humhalh theiten ngaih­san an hlawh ta zawk a ni.

A nih leh Pasalṭha huaisen chu tunlai hunah hian tute nge ni ta ang le? A tlangpuiin mipa phei hi chuan huaisen nih hi kan duh viau a ni.

Tunlai khawvelah erawh chuan mi huaisen ni tur chuan mi dik nih a ngai thung. Politician a ni emaw, sorkar hnathawk leh contractor a ni emaw, dik taka thil a ti a nih chuan atan hlauh tur an awm lo.

Tunlai hunah hian mi dik leh thil tisual duh ve hauh lote hian lawm an hlawh lo fo. Christian ram intihna hmun si ah hian dikna hian ro a rel ta lo emaw tih mai turin ei theih tur zawng hian kan phe ruai ta mai. Chutih rual chuan mi dik takte chuan a ruka zah an hlawh tho. Mi tam takin hnawksak lo ti mahse, mi dik takte an dikna avang khan an huaisen tlat. Dikna avanga tuar ngam, chan ngam te hi a ni mi huaisen Pasalṭha dik tak chu an ni.

Tripura State a Chief Minister ṭhin Manik Sarkara te kha a huaisen asin. Amah kha eiruk emaw thilah han puhchhiatna tur a awm lo a, kum 20 chuang CM a nih chhung khan in leh lo ṭha pawh a nei lo, ro tih tham pawh a neih thu sawi a awm lo. A Bank account an han check te khan pawisa tih tham a nei lo.

A CM lai khan a nupui pawh sorkar hna thawk a ni a, office kal nan auto rickshaw a phar mai ṭhin. Biplap kumar Deb CM a rawn nih hnuah khan a nih tan ṭirh laiin (He tih lai hi Tripura kan awmlai a ni) Manik Sakara hunlaia Cabinet minister hun rei tak lo ni tawh chu a boral a. CM thar chu a vuinaah a va kal ve a, chuti chen Minister lo ni tawh in chu chhia a ti lutuk a, a khawngaih em em mai a; a fapa hnenah chuan “In in sakna tur chu ka ngaihtuah sak ang che u” tiin a tiam ringawt mai a ni.

Anni hi ring lo mi, Pathian pawh awm ring lo an ni. Manik Sarkara hunlaia khawpui zauhna tura an hnathawhte khu a ropui khawp mai. Kawngpui dala in nei warning an pek tawhte chu an hun tiam a pelh tawh a, hma la duh lo chu JCB hmangin an in leh dawr te an nawr chhe mai a ni. Eng vanga khati taka huaisen ngam nge an nih kan tih chuan an dik tlat vang a ni.

Kan ramah chuan dikna aiin, pawisa, mi hausa, mi thiltithei leh politician-te hian thil an ti thei zawk emaw tih mai tur a ni. Ringtu inti tho si, sum leh pai hmachhuan leh hmelhriat neih ṭhat avanga dik lo taka mi ram ṭhalai chhuhsak duh tlat te kan awm ta nawk a nih hi.

Kan ram hi he ti khawpa a chhe tawh kan tih ruala Pathian thinurna kan la tawngbuak loh chhan chu - Mi dik tlemte leh Pathian mi leh ṭawngṭai mi la awm tlat te vang a ni. Sodom leh Gomora khua Pathianin a tihboral dawn khan, mi fel 10 chauh an awm pawhin a tihboral loh tur thu a sawi a. Mahse, mi fel 10 pawh an awm loh avangin a tiboral ta a nih kha.

Kan ram sualna hi rin aiin a thuk a, a nasa hle tawh a ni. Eirukna a hluar a, sex hmansualna, mahni anpui kawp te, mi duham leh dawheh kan pung tulh tulh a, Pathian ṭihna reng kan nei tawh lo.

Kan ramah hian simna tak a thlen lova, dikna hi sira hnawl a nih zel chuan kan sualna avang hian chhiatna nasa chu kan la hmabak ngei ang. Kan ram hian dikna/ felna avanga chan ngam, tuar ngam, Pasalṭha huaisen kan mamawh.

- Reuben Lalnunthara Hnamte