MADC Sawrkar inṭawm siamnaah lemchanna a awm em? ṬHATLOH THEIHLOHNA BAWM X-RAY - 3

Kumin May thla-a MADC inthlanah khan party mal sawrkar siam thei an awm lo tih kan la hre ṭheuh awm e. Ṭhian hlun leh hmelma hlun awm lohna politic khawvelah hian, Ui leh Kel pawh thlun pawlh theih chang a awm ni ngei tur a ni. State politics lama inbei tawn reng INC leh MNF chuan MADC-ah sawrkar inṭawm an siam a, mipui hriat khawpin harsatna an neih thu hriat a ni rih lo.

Hetiang deuh bawk hian, kum 2018 khan NDA anga thawkho ve ve, BJP leh MNF khan CADC-ah sawrkarna siam dun thei lovin, BJP leh INC ten sawrkarna an lo siam tawh bawk a ni. Heng thil pahnih aṭanga a landan chuan, tunhma deuha MPCC President-in, MPC Party chu YMA no ang deuha hawh kual theih an ni, a tih ang dinhmunah khan Congress party hi a ding ve ta niin a ngaih theih awm e. Sawrkar nghet tak an siamna ṭhin ADC pathum zingah chau-rau êk an thai mek a, Chhim lama ZPM an awm mumal rih loh avangin, BJP leh MNF ten an hawh kual ve ṭan a ni ber mai.

Ṭhatloh theihlohna bawm leh MADC drama

MADC lama sawrkar inṭawm siam thuah hian mi ṭhenkhat chuan 'drama' tenawm tak awmin an hria a ni. Chawngphûl Sihsawm huanga ziah tura kan thudawn ṭhenkhat han tarlang teh ang aw...

1. MADC-a MNF + INC te'n sawrkar inṭawm an siam hnua MPCC President Pu Lalsawta'n Delhi aṭanga Press Statement a tihchhuahah khan, eng party mah thawh pui loh kha an Party PAC thu a ni tih a sawi nawn rualin, an MDC leh SDCC hruaitute chu Show Cause Notice pek an nih tur thu a sawi a. Notice pawh an pe ngei tura ngaih a nih laiin, an pek hma hauh hian he notice chhang tura SDCC hruaitute an inbuatsaih fel tawh thute pawh kan hre hlawm a nih kha!

2. Show Cause Notice pe tur hian MPCC lam chuan, Displinary Action Committee an hrilh tih thleng hi mipui lam hriat chin chu a nih hmel. Pek an ni ta em? tih leh an chhang em? tih chu 'open secret' tih ang deuh a ni ber mai.

3. MADC a sawrkar siam thei lo party pathumte hi in hmel huat hle anga sawi chu a dik chiah lo maithei a, chutih rual chuan an inngaina lo tlang vek tih erawh a chiang thung. Chuti chung chuan INC leh MNF chuan inneih zungbun an inbun tir ta tho si a ni! He thil hi tunhnai khan, MPCC President chuan sawi zuiin, nakum inthlan hunah sawi tur an neih a rin loh thu a sawi hial.

4. MADC lama inngeih bîk lo tak party pahnihte'n sawrkar an siam duh tlat chhan chu, nakum inthlanpui lo awm tura BJP-in chhim bial lam an dominate thut theihna laka BJP tana rokhawlh siamna (Siaha District lama party pahnih hruaitute ve ve inremsiam rûkna) tura ṭanhona anga ngaih theih a ni bawk an ti.

5. Tuna BJP lam MDC 12 te saw INC mi leh sa (hlui) deuh vek an nih avangin INC aṭanga tling MDC 4 te nen hian mimal takin an inpawh hle a ni awm e. Hetiang a nih avang hian INC lam hian BJP nena thawhho (a ruk chuan) an duh zawk niin sawi a awm. SDCC te pawh hian MPCC hruaitu lam hi engkim an hrilh vek ṭhin an ti bawk a, hei hi a awihawm viau bawk. Hetiang a ni chung hian, MPCC PAC thutlukna chu a hming chuan SDCC hruaitute pawh hrilh nawn a nih ngei hmel. Chutih rual chuan, re-election cho ber chu BJP lam an nih miau si avangin inthlan ṭhat pumpelh duh ve ve chu inhmel duh vak lo chunga inneih mai a ngai ta niin sawi a ni.

6. MPCC President hian, MNF emaw BJP emaw, tumah thawhpui loh hi kan party duh dan a ni, ti chungin he thu hi vawi thum rel a ni tawh a. A vawi 4-na atan kan dinna hi kan puang nawn leh a ni, tiin Dt 15 July 2022 khan Congress Bhawan Political Session-ah a sawi nawn leh bawk. Mi ṭhenkhat ngaihdan chuan, Siaha lam Congress hruaitute hian anmahni thua MNF hi thawhpui an nih an ring thei lova, hun kha zawng han thlir kir pawhin Congress kalphung a ni ngai lo an ti deuh. A awihawm zawk viau.

Tun hma kha chuan, hetiang thilah hian Pu Hawla khan mam nalh takin thutlukna kha a siam fel mai ṭhin a, party dang nena thawhhona an neih ṭum pawhin midang puh buai lovin fel hmul takin a kalpui mai ṭhin. Tun ṭuma MPCC President ve thung hi chuan, an tih ngai loh angin ralkhat aṭangin Press Statement a siam thul. Ama hriatpui tho nia langah District Congress hruaitute'n PAC thutlukna ang lovin thil an kalpui a ti thul. Thu ngai pakhat mai ni si, vawi thum lai an rel nawn thute a sawi bawk, Congress PAC hian he thu hi an va rel uluk tehreng em! tih te pawh ngaihtuah tel awl tak a ni.

7. Thu dik chu hetiang hi a nih hmel ta ber mai.

MNF leh INC hian an beisei an phak chiah lo ve ve a, chutih rual chuan BJP pawhin beisei an pha bik lo. Sawrkar siam ngei inbeisei an ni. Inthlan ṭhat cho chiah lo party pahnihten nakum inthlanpui thlir ran chungin, rem lo chungin sawrkar inṭawm an siam ta, tih hi.

Inthlan ṭhat a nih chuan, BJP-in sawrkarna an siam palh thei a, chutiang a nih chuan Palak bial lam MDC Seat 13 ah BJP in Seat 12 ngawt an la bawk nen, Siaha bial lama BJP insawh nghet tur venna ṭha ber chu Sawrkar inṭawm siam mai a ni tih hi an chiang dun ta em em ang tih a rinawm hle.

TLANGKAWMNA

Congress Party hian, kan thiam­puipa rulin chuk tih ang maia, an hruaitu pa a chawlh tak si-ah chuan, ngaihtuahna fing tak nen, President thar thluak hmangin 'Ṭhatloh Theihlohna Bawm' an ngaihtuah chhuak ta hlauh mai. Beisei piahlama mipui ngaihven a hlawh chhoh takah chuan, MNF sawrkar lo ṭawinawk ve bawk nen inthlan leha sawrkar leh theih mai an inbeisei ta hial a. An President chuan, an sawrkar a, Chief Minister a nih ngat chuan Minister eirû chu ka ban nghal ang tih leh insiamthat tum lo tan Congress Party ah hmun a awm lo adt. tih thute a sawi ta hial a. Mahse eng chin nge eiru a ban tur tih zawhna chu, pehhel angreng deuhin a chhang thung. Hmingchhiatna nei hrim hrim nge, eiru finfiah chin tih lai-ah thu a saisa nghal viau!

Kan thu dawn aṭanga khaikhawm­na chu hei hi a ni. MADC-a Sawrkar inṭawm siamthu-ah hian MPCC PAC thu zawm lohna awm anga sawi hi, lemchanna mai a nih duh hmel hle. A chhan pawh, Siaha District Congress hruaitute hi Cabinet Minister hlui leh Senior Politician hruaina hnuaia awm an ni. Party PAC thu palzut duh tur khawp a nih a rinawm lo.

MPCC President hriatpui veka thutlukna an siam hi 'Ṭhatloh Theihlohna Bawm' nen inmil dawn lova a lan avangin, MPCC President hian Politics hmai-thinghawng vuah in acting mawi hnai play chungin, a lungawi lo der vel mai mai a nih duh hmel an ti a nih chu.

Dt 15 July 2022 Political Session ah hian, PAC thu hi humhalh duh tak tak nise chuan, Show Cause Notice chungchang leh action lak a ni dawn em? tia Vanglaini palai zawhna hi, hei aia chiang zawka chhang ngei tawh tur ni-awm tak a ni.

Engpawhnise, TLTLB hian tun apangin a mizia tur a puang chiang nghal ang pawhin a ngaih theih ve tho awm e.

- Vanlalhuma Kawlni