VEN NGAI LO KHUA LEH TUI

Hman zan chu Grace Hospital-a ka u damlo tlawh turin zan dar 7 velah Bethlehem aṭangin kan tlan chhuak chhova. Damdawiin khar hun kha Dar 7 a ni si a, kan hmanhmawh viau mai.

Kan kianga chuang ve kan tunu chuan, “Tun ang hunah hi chuan Bazar chhunga tlan lutin, Power House-ah chhuak pheiin, a luh mai theih asin,” tiin min hrilh reuh a. A thu chu zawm ta lem lo chuan ngawi rengin ka tlan mai a. Bungkawn kan han chhuak chho tur kha kan nuin, “Tun ang hunah hi chuan Zodin Sqare-ah kher kual lo pawhin a tlan theih tawh,” a rawn tih ve leh a. “Ni e, in rawtna chu a ṭha viau a, mahse; dan a ni lo deuh si a, keini rawngbawltu tal hi chuan police te ven ngai lovin, keimahniin DAN hi i zawm phawt mai ang u hmiang. Rawngbawltu leh zel ven kan ngaih chuan Police an indaih mawh awm em mai,” ka ti fiamthu a. Anni pawh chuan, “A ni tak e,” an ti ṭha ve mai a. Zodin Square-ah kan va kual thlap a, Chanmari-ah kan han kual leh thlap a, Bazar parking hmun dik takah kan han park leh thlap chu rilru a nuam ru veng veng mai a. Damdawiinah pawh kan tlai lo.

Eng emaw hun laia kan veng (Bethlehem) leh College veng kawng phei vel metalling hna an thawh lai khan, kan Local Council lamin hnathawktute an lo ṭhutchilh ṭhin thu leh, ṭhutchilh chuan awmzia a neihzia te, blacktoping a chhah ṭhat bik thu te, kawng chhuat pawh an black top zauh bikzia thute a thang vel chiam ṭhin a, ka ngaihtuahna a tithui khawp mai. Kha blacktop hnathawktute kha tute nge tih ka hre lo na a, thil lang chiang tak pakhat chu hnathawktu ‘ven ngai’ an ni. Officer engin nge rawn vil ka hre lo, mahse, ven ngai hnathawktu an ni tih erawh a hriat theih. Tunlaia PMGSY kawng metal hnathawh tur tender chhuah mekah pawh hian a chhawr ṭangkai tur khuate chu contractor leh sawrkar lam mite veng turin an inbuatsaih nasa viau tih thawm a awm. Sawrkar mi leh contractor-te chu an ring zo tlat lo, ven an ngai dawnin an hre tlat. Sawrkar mi leh contractor-te lah chuan sawrkar bungrua leh an mimal hmanraw ven dan tur mawlh an ngaihtuah a ṭul ve thung ang. Leilawn kilhna herh thawla ru duh hnam kan ni miauva!

Hmanni chu Registrar of Farms & Societies office-ah ka leng ve a. Kan khuaa Vaimim chingtuten Society an din a, in register an duh a, tihfel ngai zawng zawng an tifel vek tawh a, an registration certificate lam tura kal ka ni. A kawltu nu khan, a ṭhian nu nen mobile phone-a a thil zawrh kha an lo en dun a. A kiangah ka ding reng a, ka awm ve tih hre awm hmel reng an pu lo. A rei lutuk ta tihah a kianga a thawhpui mipa khan a kianga ṭhutna awm kha min kawhhmuh a. A tawp khawkah a ṭhianpa chuan min han ngenpui a, an en chuan ka thil lam tur chu Champhai lamah, Taxation office-ah an thawn chhoh tawh thu chauh chu min hrilh a. Kha hnawthawktu khan venpuitu a mamawh ngawt mai.

Tuisemtu, a hranpaa tihlawm ngai, tihlawm nana pawisa pek ngai kan awm ṭhinte hi a pawi hle mai. A hawn hun tur chen pawh hawng peih lo, ven tlat loh chuan a hun hmaa off ching, an off loh leh kalsan daih a, tui a chuang a liama luang liam dur dur pawh pawiti lo sawrkar leh mipui tana ṭhahnemngaihna reng reng nei lo te; mahni hlawkna chauh ngaihtuaha mipui hriselna lam ngaihtuah miah lo, thihna khawp hiala hlauhawm damdawi pawh pawlh hnial lo thlaithar zuar te; sa thisawn leh t<ra hrai sa hralh duh sazuar te; mi duhna chu remchanga hmanga manto uchuak taka thil man chhiar ṭhin sumdawng te; kuthnathawktute chanai laksak hnial lo leh mipui rawngbawltu tih inhre hauh lo sawrkar hnathawk te; mahni hlep tur chauh ngaihtuaha sawrkar chan ve tur lama ṭhahnemngaihna reng reng nei lo contractor te; electric pawt ru ṭhinte leh an connection-in a phal b^k load s^ng lo hmang ru ṭhinte hi khua leh tui ṭha an ni lo, v>n ngai mikawlh sakawlh an ni.

He ram, Lalpa min pek ram ziamteah hian v>n ngai lo khua leh tui eng zat tak awm ang maw le! Mahni awmna hmun ṭheuhah, dan kengkawhtute ven kher ngai lo khua leh tui ṭha nih kan zir a pawimawh hle mai. Ṭum khat chu Upper Shillong-ah, Airforce Officer transfer tur bungraw lei tumin kan han kal a. Kan haw leh tur chu ama car khan min thlah a. Sipai hmun hma tih takah, Stop, Look, Go, tih ang vel sign board kha a bak chuk mai si a. Mahse, kha officer khan pakhatmah kha pelh miah lovin a zawm dik vek zu nia mawle!

Vengtu awm miah lohnaa sign board vangin a ding a, sign board vangin a hawi kual te te a, sign board vang khan a kal leh ṭhin. Vengtu a mamawh lova, amahin dan a zawm mai a, a nun pui mai a ni. Ram changkang, ram nuam kan han tihho pawh hi, vengtu sipai ṭhat vang lam ai mahnin, ven ngai lo khua leh tui an nih hlawm vang a ni zawk mah awm asin.

- Rev. Jh. Za Hluna