TANHRIL KUDAM

Kum sawm tam kal ta-ah khan Tanhrilah FCI kudam dah a ni a, chutih lai chuan khawgpui aṭangin a falin a fianrial viau awm e. Chu hmun chu tun thlengin Mizoram eibar ber buhfai phurh luha chhekna hmun leh, Mizoram khaw hrang hranga phurh chhuah lehna hmunpui ber a ni. Khawpui a ṭhangin a zau zel a, Tanhril pawh a hulumin Mizoram University hial awmna hmun a lo ni ta a, truck eibar phur, keuh tur leh phur chhuak tur tan pawh a khawharthlak loh sawtin a rinawm.

Lirthei chevel a pung tial tial a, mihring veivak an tam tial tial bawk a. Tanhril kudama buhfai keuh tur leh phur chhuak tur nghaka ding truck ngaimawh thawm a ri zing ta tial tial a, kudam tlan pel ṭhin mi ṭhenkhat thuneitu lamah an zualko ta fo va, police lahin manah an vau ta fo bawk a. Kudam a awm miau avangin truck a ding lo thei si lo va, a enkawltu leh a neitute lu a hai zing ta hle. Tanhril kawng ring ve mipui tan a buaithlak a, police tan hlei hlei a manganthlak ang.

Mizoram Truck Owners’ Association (MTOA) hruaitute chuan he harsatna sut kian dan tur hi vawi tam tak an ngaihtuah tawh ṭhin a, sorkar hotute pawh vawi tam dawrin dan kengkawhtute pawh an sawipui tawh ṭhin a, MTOA-in kawng awmchhun nia an ngaih chu hengte hi a ni:

1. Tanhrila FCI kudam hi sawn chhuah a, hei aia hmun remchang leh thawl zawka Kudam sawn chhuah.

2. Tanhril FCI kudam hi rauhsan a, Rengtekawn/ Bualpui Rice Depot-a buhfai chhek a, chuta ṭanga phurh chhuah.

3. Rangvamuala Truck Terminal hi MTOA-in enkawl se, chuta ṭang chuan a tawk te-in Tanhril kudamah truck tirh thlak zel mai.

Heng rawtna hrang hrangte hi thuneitute hnenah vawi tam thlen a ni tawh ṭhin a, mahse tun thlengin he harsatna hi a la ngai reng a ni.

Mizoram eibar phurtu truck enkawl­tute hian thlamuang leh ralmuang taka hna thawh a, tumah dipdal lo leh midang harsatna siam lova mipuite chaw phurh hi an duhthusam a ni e.

- Dina Tlau General Secretary Mizoram Truck Owners’ Association General Headquarters, Aizawl