Political party che vel hi

Mizoramah hian political party lian deuh pahnih a awm a, pakhat chu Congress niin MLA an ngah fal hle. Pakhat chu MNF niin MLA an nei tam lo. Tunah hian kum 2019 atan an inbei leh dawn a, MLA neih sa aṭanga teh chi a ni lova, a boruak thlir hian mipui vote hi chu a tleh leh huk dawn a ni si. Kan political party-te che vel ka thlir hian, inthlan dawnah hian lam ṭang an sawm ve ve dawnin ka hria.

Congress hi chu an thiam ṭhin a, tumah hi an tlawn hurh lova, MNF tih loh hi chu na takin an bei lo bawk. Congress hian ZNP hi MNF nen inkawp lo se an duh ber a, an duhthusam hi a thleng dawn a nih hmel. ZNP hi an thawhpui duh dawn nge dawn lo tih hi chu ZNP tana seat an pek phal zatah a innghat dawn a, ZNP hi seat 5-te an ken chuan Congress chuan kian tam an inti hle ang. Hetihlai hian Congress chuan ZNP hi mal din se, tichuan Vai pawl haw hrim hrimin MNF an vote vek lo vang a, ZNP lamte an hawi ve ang a, chu chu an tan a ṭha dawn tih an hre reng. Tin, ZNP hian hun rei tak chu Congress aiin MNF hi an bei nasa zawk a, an hawi lam a chiangin ka hria.

MNF hian ‘mal din’ an sawi nasat danah an mal din loh rinna hi ka nei lian tawh zawk. A chhan chu BJP che vel ka thlir hian, engtikawng pawha MLA neih ve hrim hrim an duh dawn si a, MLA an neih dan awm chhun chu MNF nen thawhdun a, seat 3-5 vel chan ve. MNF hian BJP an hnar ngam loh chhan tur chu BJP pawisa an mamawh tlat vang leh, India hmarchhak huapa BJP leh MNF hi an thawh dun tlat vang a ni. MNF President hi tuna Mizoram BJP hian ko kal thei lo mah se, Central lam BJP hruaitute chuan an duh hun hunah an ko thei a, an lam ṭangah an siam a, BJP hi chu a haw lo tih a chiang tawh.

Mizoram political party lian pahnih che vel hi ngun takin han zir ila, a tawpah Congress hian ZNP thawhpui an duh a, MNF hian BJP thawhpui an duh ka ring. Political expert lam hi Mizoramah chuan an awm chiah lova, awm theih pawh a ni lova, keia thlirna mawl takah chuan Congress duhthusam chu kil thum aṭanga inepna a ni a, chumi tur chuan an ṭang ang a, MNF chuan mimala din an duh ber a, mahse pawisa an neih loh avang leh Lok Sabha inthlan an thlir avangin BJP hi an kawp leh tho awm e. Eng nge i thlir ve dan?

- Lalchhuanawma