FIMKHUR-AH PAWH A ZUAL A NGAI

India ramah lockdown a nih aṭang khan Coro­navirus vei an hmuh belh hi mihring nuai khat leh sing kua vel zet an tling tawh. Virus kai an tam tual tual a, lockdown thlahdul tual tual a ni thung. Hei hi Covid-19 avanga economy a chhiat lutuk loh nana tih a nih a rinawm rualin, hna thawk thei lo mahni awmna state pan an tam lutuk tih tlem nan a nih a rinawm bawk. Hna chi hrang hrang lockdown hnuaiah thawh theih loh a awm meuh tawh lo a ni. 

Hnathawhna hmun te hawn phal a nih rual hian Coronavirus avanga mahni State lam pan a haw hi an awm loh phah chuang lo. Mizoram aṭang pawh hian sang tel fe an haw tawh a, Mizoram aṭanga haw kawngbo 

ṭhenkhat chu Mizorama rawn lut ru emaw tiin kan phawk nasa thei hru hru khawp nghe nghe a nih kha. Kar kal ta pawh khan a sang rual chu Bairabi aṭangin Train-ah an haw ve leh a ni. Lockdown hi thlahdul nimahsela, hnathawhna tur bungrua a tam tawk hlei thei lo a, hna tam tak chu hnathawktuten an thawk ngam lo bawk. 

Mizoram-ah pawh hian a sang rual engemawzat an rawn haw ve tawh a, an la rawn haw mek bawk a ni. State tin hi mahni mum mumin kan mum tlang mai dawn ni te pawhin a lang ta a ni ber mai. 

India ram lockdown hi han phelh dul ngial mahsela, Covid19 hi a pung nasa tial tial a, State hrang hranga haw darh te hian an awmna state ṭheuhah an pu darh chum chum a ni ber mai. Haw khawm te an la haw zel mai bawk si. Kan ṭhenawm District khawpui Silchar pawh hmun hlauhawm bik containment zone an ngah lutuk a, containment lo zone angin chunglai hmun te chu an thlah zalen tawp a ni. Quarantine Centre-ah khawpui laili a Hotel te an hmang a, an quarantine te an han positive ta ngei a, an khawpui laili kawtthler te chu Containment zone ah puan a ngai ta a, a kal zel a, a kal zel a. Kawthler zawng zawng kal theih a lawi a awm tawh lo. 

Chuvangin, contain­ment zone te chu containt lo zone ang maiin an hman a ngai ta a ni.  Khawpui lai lo a quarantine centre dah hi a fuh lo hle a, Farm house nei ho te hi chu an farm house-ah in quarantine hlawm vek se la a ṭha ber ang.  Home quarantine te hi Red zone aṭanga haw an nih chuan tih loh a ṭha khawp mai. Positive an awm palh vaih chuan a veng kha Containment zone-ah puan a ngai dawn a, curfew tenau a ni hawt mai dawn a ni. 

Containment zone-ah hian essential bik phur bak lirthei pawh tlan tlang phal a ni ngai lo a ni. Aizawl tana Quarantine Centre ṭha ber chu Mizoram University hmun te hi an ni awm e. Covid-19 vei pawh lo awm sela, nunphung a ti khaihtlak nep deuh ang. Covid-19 buaithlakna ber hi thil dang vak a ni lo, nunphung a tikhaihlak nasa lutuk hi a ni ber mai. 

Veng tin hian thilphal chhuah a quarantine centre kan hmantir a nih pawhin hmun finrial kan pek thiam a pawimawh hle. Veng lai li lai tak containment zone a puan a nih chuan kan talbuai nasa lutuk palh ang e. Haw runpui rawn thleng mek te hi a khauh thei ang bera quarantine a ngai. Kan lo lawm a, kan huphurh lo tih hi a chiang tawh. Hetihrual hian an ram rawn thleng tawh mahsela zalen emaw an inti tur a ni lo a, midangte tana harsatna siam zawng phei chuan khawsak lohna chang an hriat a ngai hle. 

Tun dinhmuna Mizo­ramin Covid-19 vei a neih theihna chance sang ber chu State dang aṭanga raw haw te hi an ni a, hei hi chiang taka kan hriat a ngai. Anmahni pawh hian an hre ngei tur a ni ang.